TITO 2

1Na'a, da' ẕchaḻjo' žaḻa' gaken tḻebe ḻen da' chawe' da' žsedlžo. 2Bsedle benne' byo, benne' gole ka': Žaḻa' wcháḻjgake' diža' chawe' ka'. Žaḻa' gákgake' benne' chawe' ka'. Žaḻa' gákgake' benne' žejní'igekle'. Žaḻa' chejḻé'gake' che Benne' Criston' dot ḻáže'gake'. Žaḻa' ží'igekle' ljéžgake' ka'. Žaḻa' sóegekle' da' gak chégake'. 3Bsedle no'le gole ka': Žaḻa' góngake' da' žaz ḻaže' Dios. Bi žaḻa' nnégake' che ljéžgake' ka'. Bi žaḻa' yé'jgake'. Da' žóngake' žaḻa' wsedlen da' nak chawe'. 4Bsedle x̱kwide' no'le ka'. Žaḻa' ží'igeklbe' benne' byo che chégakbe', na' ẕí'ngakbe' ka'. 5Žaḻa' gákgakbe' no'le žejni'ile. Žaḻa' gákgakbe' no'le chawe' ka'. Žaḻa' gape chí'igakbe' da' de lížgakbe'. Žaḻa' gákgakbe' ži'i ḻaže'. Žaḻa' gápegakbe' ba la'ne benne' byo che chégakbe'. Žaḻa' bi góngakbe' da' gonen ga no benne' nnie' che x̱tiža' Dios. 6Bsedle x̱kwide' byo ka': Žaḻa' gákgakbe' x̱kwide' žejni'ile. 7Žaḻa' góntezo' da' naken chawe', na' ki wḻoe'elo' ḻégakbe' kan žaḻa' góngakbe'. Kan žsedlo' žaḻa' wḻoe'elen nako' ḻi ḻaže', na' gax̱jw ḻaže'. 8Žaḻa' wchaḻjo' diža' chawe' ka' nich bi soa da' gak no benne' nnie' chen, nich yedoe'ele no benne' wži'e chen, na' bi gak nnie' chele ḻe'e. 9Bsedle lježžo ka', benne' žejḻé'gake' che Benne' Criston', na' zej nake' benne' ndo'w ka': Žaḻa' gákgake' gax̱jw ḻaže' ḻen x̱ángake' ka'. Žaḻa' góngake' yógo'te da' žaz ḻáže'gak x̱ángake' ka'. Bi žaḻa' wží'igake' che x̱ángake' ka'. 10Bi žaḻa' wkache' lángake' da' naken che x̱ángake' ka'. Žaḻa' wḻoé'el kwíngake' chawe' ḻo yógo'te da' žóngake'. Yógo'te da' žóngake' žaḻa' wḻoe'elen nak chawe' x̱tiža' Dios, Bennen' beslé' žo'o. 11Yeḻa' ži'i ḻaže' che Dios ba bḻa' ḻawn ḻawgak yógo'te benách ka' nich yelágake'. 12Ḻen žsedlen žo'o biž žaḻa' gonžo da' bi žaz ḻaže' Dios, na' bi dan ḻáže'žo da' naken che yežlyó nga, san žaḻa' gakžo ẕen ḻaže', na' gakžo chawe' ža ni zoažo na'a, na' gonžo kan žénekzele Dios. 13Žaḻa' kwezžo da' žx̱en ḻáže'žo gonen ga gak yeḻa' ba nez ẕen chežo, dan' gaken ža na' katen' ḻa' ḻaw Jesús, Benne' Criston', ḻo baní' ẕen chie'. Nake' Dios ẕen, na' Bennen' žeslé' žo'o. Ḻekze' bchebe ḻaže'e gone' da' ni. 14Ḻekze' bde kwine' ḻo wlazžo žo'o, nich beya'we' žo'o ḻo yógo'te da' bi naken chawe', na' žeyone' žo'o chawe' nich gakžo benách chie' ka', na' nich yénelžo gonžo da' naken chawe'. 15Bsedle da' ki, na' bzejni'ilen benne' ka', na' ḻen yeḻa' wnná bia' bdiḻ-gake'. Bénteze ki, nich bi gak no benne' wka'ne' x̱tižo'o ka'ze.

will be added

X\