MATÍO 7

1Ḻezka' wnná Jesusen': —Bi chog bia'le chegak lježle ka', nich bi chog bia' Dios chele ḻe'e, 2dan' chog bi'e chele ḻe'e tḻébeze kan ẕchog bia'le chegak lježle ka', na' kan ẕžix̱le che lježle ka' ḻezkan' gonkze Dios chele ḻe'e. 3¿Biẕ chen' ẕwio' bebdo' da' yo'on yej ḻaw lježo', na' bi žákbe'lo' to da' ẕenḻe'e yo'on yej ḻawo' le'? 4¿Yi'o lježon': “Wleze, nich kweja' bebdon' da' yo'on yej ḻawo'” na' le', da' ẕenḻe'e yo'on yej ḻawo' le'? 5Le', benne' žḻoé'ezele chawe' kwino'. Zga'ale wléj da' yo'on yej ḻawo' le', nich gak ḻe'elo' binlo nich kwejo' bebdon' da' yo'on yej ḻaw lježon'. 6'Bi cho'nle da' zej naken la'y nich gaw beko' ka' ḻen, ka chéchjgakba', na' gáwya'agakba' ḻe'e. Bi cho'nle da' záka'ḻe'en chele nich gaw koch ka' ḻen, ka wléj chóchjgakban'. 7Ḻezka' wnná Jesusen': —Le nnab, na' Dios gonnen' chele. Le chilj, na' gonne' latje žéḻ-lelen. Le wḻíž ža yo'o, na' Ḻe' wsaljwe' chele. 8No benne' bi da' ẕnnabe', gatan' chie', na' benne' bi da' žilje', žeḻ-len', na' benne' žḻiže' ža yo'o, yaljwn chie'. 9'Cha' zoa no benne' ládjwle ḻe'e, zoa x̱kwide' chie', cha' nnablbe'-ne' yet x̱til, ¿wneẕjwe' yej chebe'? 10Cha' nnablbe'-ne' to bel, ¿wneẕjwe' bele snia chebe'? 11Ḻe'e bi nakle chawe', san nnézlele wnéẕjwle da' naken chawe' chegak ẕi'nle ka'. Wak wx̱én ḻáže'le X̱ale Dios, Bennen' zoe' ya'abá, gonne' da' naken chawe' chegak benne' ka' bi da' nnábgekle' Ḻe'. 12'Che ḻen, kan žénelele ḻe'e gongak benne' ka' chele, ḻezka' le gonte chégake'. Ki ẕnna da' bchi'le Moisés žo'o, na' da' wnnagak benne' ka' bcháḻjgake' ḻo wláz Dios. 13Ḻezka' wnná Jesusen': —Le cho'o gan žo'ogak benách ka' ga nak to lyido'. Laga' nak gan žo'ogak, na' nez ẕen naken da' žjakḻen benne' ka' gan kwia yí'gake'. Žo'ogak benne' zan ga na'. 14Lyido' nak gan žo'ogak, na' nez ḻas naken da' žjakḻen benne' ka' gan gata' yeḻa' nban da' zejlí kanne chégake', na' babze benne' ka' žežéḻgeklen'. 15Ḻezka' wnná Jesusen': —Le gape chi'i kwinle nich bi gon ḻáže'gekle benne' wen ḻaže' ka' ḻe'e, benne' ka' ẕnnágake' ẕcháḻjgake' ḻo wláz Dios. Ḻa'gak benne' ka' gan zoale, benne' ca' wḻoé'el kwíngake' gax̱jw ḻáže'do' kan zej nak ẕíla'do' ka', san ḻo yichj ḻáẕdo'gake' zej nake' ka beko' yix̱e' snia ka'. 16Da' ka' žóngake' zej nak bian' kan zej nake'. Bi ẕchibžo da' ẕbia lba uba ḻo yag yeche', na' bi ẕchibžo da' ẕbia yag higo ḻo yix̱e' laye'. 17Ki naken, yógo'te yag ẕix̱ želbían da' zej naken ẕix̱, na' to yag yix̱e' ẕbian da' bi zej naken ẕix̱. 18Yag ẕix̱ na' bi gak kwian da' zej naken ka'ze, na' yag yix̱en' bi gak kwian da' zej naken ẕix̱. 19Bíte'teze yag da' bi ẕbian da' naken ẕix̱, chóggaken', na' wzéygaken' ḻo yi'. 20Ki naken, da' ka' žongak benne' ka' zej nak bian' kan zej nake'. 21Ḻezka' wnná Jesusen': —Benne' zan yé'gake' neda': “X̱an, X̱an” san kege yógo'tegake' cházgake' gan ẕnna bia' Dios ya'abá. Ḻégakze benne' ka' žóngake' da' žénele X̱ažo Dios, Bennen' zoe' ya'abá, chejnníta'gake' ga na'. 22Kate' žin ža ze ḻawte ža ka' che yežlyó nga, benne' zan yé'gake' neda', na' nnágake': “X̱an, X̱an, bchaḻjto' x̱tiža' Dios ni'a che lo' Le'. Bkonlto' žin lo' nich bebejto' be' x̱iwe' ka', na' bkonlto' žin lo' nich bento' da' zan yeḻa' wak ẕen ka'.” 23Naž neda' yapa' ḻégake': “Bi nónbi'a ḻe'e. Le kwas ga zoa' ni, ḻe'e, benne' wen da' ẕinnj ka'.” 24Ḻezka' wnná Jesusen': —Ḻezka', no benne' ženle' x̱tiža'a ni, na' žone' kan ẕnnan, nake' ka to benne' žejni'ile', benne' bene' liže' gan že' ḻo yej x̱e. 25Kate' gok yéjwsio', bedób nis wbá'a, na' gok be', na' wdíb nisen' kwit yo'on', san bi wbix̱en, dan' žen' ḻo yej x̱e. 26Na'a, no benne' ženle' x̱tiža'a ni, na' bi žone' kan ẕnnan, benne' ni nake' ka to benne' bi žejni'ile', benne' bene' liže' ḻo yo yach. 27Kate' gok yéjwsio', bedób nis wbá'a, na' gok be', na' wdíb nisen' kwit yo'on', na' wbix̱en, na' ḻa' wbía yi'ten. 28Kate' beyóž Jesusen' bcháḻjḻene' ḻégake' da' ni, bebán ḻáže'gak benne' zan ka' kan nak da' žsedle', 29dan' žsedle' ḻégake' kan žon to benne' nzi' ḻo ne'e yeḻa' wnná bia', kege kan žongak benne' yodo' wsedle chégake' ka'.

will be added

X\