MATÍO 21

1Kate' bžin Jesusen' ḻen benne' ka' žónḻengake' Ḻe' tẕen gawze gan že' yež Jerusalén, na' nníta'gake' gan že' yež Betfagé ẕan Ya'a Yag Olibo, bseḻe'e Ḻe' chope benne' wsedle chie' ka', 2na' gože' ḻégake': —Le chej ḻo yeždon' da' žen' ḻawle ga zoažo ni, na' chejx̱áka'le to burro wná' da'ba' ga na', ḻen to burro byodo' cheba'. Le chejseže-ba', na' le yedjwá'-ba' chia'. 3Cha' no benne' bi da' yi'e ḻe'e, le ye'e: “X̱anžon' žénele'-ba'.” Naž seḻe'e-ba' chia'. 4Ki goken, bžin da' bzoj bennen' bchaḻje' ḻo wláz Dios, katen' wnné': 5Le ye' benne' ka' nníta'gake' yež Sión: “Le wia nga, Benne' nna bi'e ḻe'e ze'e chele. Ḻo yeḻa' gax̱jw ḻaže' chie' ži'e x̱kože' to burro. Ži'e x̱kože' to búrrodo' che to bia žwa'ba' ywa'.” 6Naž jak benne' wsedle chie' ka' ga na', na' béngake' kan gož Jesusen' ḻégake'. 7Beché'gake' burro wná' na' ḻen burro byodon', na' bx̱óagake' laže' yicha' chégake' ka' x̱kóže'ba', na' wžé' Jesusen' ḻaw laže' ka'. 8Ḻezka' wnníta'gak benne' zan ga na', na' bchíljgake' laže' ka' žx̱oa yéngake' ḻo nez. Yebaḻe' bchíbgake' zin da' bx̱óagake' ḻo nez. 9Zižje wnnegak benne' ka' zjake' ḻawle, na' benne' ka' zjákḻene' Jesusen', na' wnnágake': —¡Ga'n ẕen Ḻe', ẕa'só Dabí! ¡Ba nez ẕen naken che benne' ni ze'e ni'a che La X̱anžo! ¡Ga'n ẕen Dios! 10Kate' wyáz Jesusen' ḻo yež Jerusalén, yógo'te benne' che yežen' béngake' žo'osbé. Benne' zan góžgake' ljéžgake' ka', na' wnnágake': —¿Noẕ bennen'? 11Yezika' benne' ka' wnnágake': —Benne' ni Jesús, bennen' ẕchaḻje' ḻo wláz Dios. Nak laže' Nasaret gan nbab Galilea. 12Kate' wyáz Jesusen' ḻo ḻi'a yodo' che Dios, blage' na'le yógo'te benne' ka' žóte'gake' na' benne' ka' žá'wgake' ḻo ḻi'a yodon'. Ḻezka' bžix̱e' blag ka' chegak benne' ka' ẕchá'gake' mežw che yež zi'to' ka', na' da' ka' želbe'le benne' ka' žóte'gake' plomdo' ka'. 13Naž gože' ḻégake': —Nyejw ḻe'e yiche la'y da' ẕnnan: “Liža' sin' yo'o gan wcháḻjḻengak benách ka' Dios” san ḻe'e ba benlen kan nak to yo'o chegak benne' wbán ka'. 14Kate' ne zoa Jesusen' ḻo ẕchil yodo', baḻe benne' ḻo choḻe ka' ḻen benne' ka' bi žak sá'gake', wbíga'gake' gan zoe', na' Ḻe' beyone' ḻégake'. 15Kate' bx̱oz wnná bia' ka' ḻen benne' yodo' wsedle ka', bḻé'egekle' yeḻa' wak ka' da' žon Jesusen', na' ḻezka' béngekle' ẕnnegak zižje x̱kwide' ka' ḻo ẕchil yodo', na' ẕnnágakbe': “¡Ga'n ẕen ẕa'só Dabí!” 16naž bžá'agake', na' góžgake' Jesusen': —¿Bi ženlo' da' želnná x̱kwide' ki? Bechebe Jesusen', na' wnné': —O', ženlan'. ¿Batkle beḻ-le da' nyejw ḻe'e yiche la'y da' ẕnnan kikze žaḻa' gaken? Ki ẕnnan: “Beno' Le' ga žoḻgak x̱kwide' ka', na' bi' že'n ka', bi' ka' ne žáẕe'gakbe', da' žoe ḻáwgakbe' neda' da' naken dot ḻi ḻaže'.” 17Naž Jesusen' bezé'e gan nníta'gake', na' bežoje' ḻo yež Jerusalén. Wyeje' ḻo yež Betania gan bga'ne' dot yele. 18Kate' za' ža'ní', na' zeyéj Jesusen' ḻo yež Jerusalén, ẕdone'. 19Bḻe'ele' to yag higo da' žen' kwit nez, na' wbige'e gan žen', san bi be bžeḻ-le' da' ẕbian. X̱láge'ze žian. Naž Jesusen' gožen': —Biž kwia da' ẕix̱ chio'. Naž ḻa' wbižte yag higon'. 20Kate' bḻé'egekle benne' wsedle chie' ka' da' ni, bebángekle'. Wnnábgekle' Jesusen', na' wnnágake': —¿Nakx̱ goken, ḻa' wbižte yagen'? 21Bechebe Jesusen', na' gože' ḻégake': —Da' li žapa' ḻe'e, cha' chejḻe'le che Dios, na' bi gak chope ḻáže'le, kégeze wak gonle kan bena' che yagen', san cha' ye'le ya'a nga: “Bkwas na'le, na' bejsóa ḻo nisdo'” gaken kan nnale. 22Ḻezka', yógo'te da' nnable kate' wcháḻjḻenle Dios, cha' chejḻe'le che Dios gonen' chele, si'le dan' nnable. 23Wyáz Jesusen' ḻo ẕchil yodo', na' kate' ne žsedle' benách ka' nníta'gake' ga na', bx̱oz wnná bia' ka' ḻen benne' gole ka', wbíga'gake' gan zoe'. Wnnábgekle' Ḻe', na' wnnágake': —¿Biẕ yeḻa' wnná bia' nzi' ḻo no'o, žono' da' ki? ¿Noẕ benne' bdie' ḻo no'o yeḻa' wnná bian'? 24Bechebe Jesusen', na' gože' ḻégake': —Ḻezka' neda' nnabla' ḻe'e to. Cha' ye'le neda' kan naken, neda' yapa' ḻe'e bi yeḻa' wnná bia' nzi' ḻo na'a žona' da' ki. 25¿Noẕ benne' bseḻe'e Ẕwan' nich bezóe' benách ka' nis? ¿Dios bseḻe'e ḻe', o bséḻa'gak benne' ka' ḻe'? Naž wzó ḻawgak benne' yodo' ka' ẕnnágake' ḻa' ḻégakze': —Cha' nnažo: Dios bseḻe'e ḻe', ḻa' ye'tie' žo'o: “¿Biẕ chen' bi bejḻe'le chie'?” 26San cha' nnažo: bséḻa'gak benne' ka' ḻe', žébežo da' gongak benne' wláž ka', dan' žejḻé'gake' yógo'tegake' bchaḻj Ẕwan' ḻo wláz Dios. 27Che ḻen beží'igake', na' góžgake' Jesusen': —Bi nnezlto'. Jesusen' gože' ḻégake': —Ḻezka' neda' bi yapa' ḻe'e bi yeḻa' wnná bia' nzi' ḻo na'a žona' da' ki. 28Naž Jesusen' gože' benne' yodo' ka': —¿Biẕ nnale ḻe'e? Wzóa to benne' wnníta'gak chope x̱kwide' byo chie'. Gože' to x̱kwide' chien', na' wnné': “Ẕi'na', wyéj na'a chjeno' žin ḻo yežlyó chia' gan naza' lba uba ka'.” 29Beží'i x̱kwiden', na' gožbe'-ne': “Bi žénela' cha'a.” Wdé na' beyát ḻáže'be', na' yjenbe' žin na'. 30Naž bennen' gože' yetó x̱kwide' chien', na' toze kan wnné'. Beží'i x̱kwiden', na' gožbe'-ne': “O', x̱e. Cha'a.” San bi wyéj x̱kwiden'. 31¿Nole x̱kwide' chope ka' benbe' da' žaz ḻaže' x̱abe'? Beží'igake', na' góžgake' Jesusen': —Bi' nežw. Naž Jesusen' gože' ḻégake': —Da' li žapa' ḻe'e: benne' wechiẕjw ka', benne' žóngake' da' kegle, na' no'le ḻe'e ka', chjake' zgá'alegake' ka ḻe'e, na' chó'ogake' gan ẕnna bia' Dios. 32Ki gaken dan' Ẕwa, bennen' bezóe' benách ka' nis, bḻe'e gan zoale, na' bsedle' ḻe'e da' naken chawe' kan žaḻa' gonle, na' ḻe'e bi bejḻe'le chie', san benne' wechiẕjw ka' na' no'le ḻe'e ka', bejḻé'gake' chie'. Ḻa'kze bḻé'elele da' ni, bi beyát ḻáže'le nich chejḻe'le chie'. 33Ḻezka' wnná Jesusen': —Le wzé nag yetó da' wsaka' ḻeba'. Wzóa to benne' x̱an yo'o, na' beyaze' lba uba ka' ḻo yežlyó chie'. Wbeke' to le'je chen, na' bche'ne' to bloj ḻo yej gan wsíe' x̱is uba ka'. Ḻezka' bene' to yo'o ža'le gan gak to benne' wie' dot yežlyó chien'. Naž bdie' yežlyón' ḻo na'gak benne' wen žin ka', nich sí'gake' late' weje, na' wyeje' to yež zi'to'. 34'Kate' bžin ža wchíbgake' uba ka', x̱an yežlyón' bseḻe'e baḻe ni'a ne'e gan zej nnita' benne' wen žin ka' nich sí'gake' da' žeyaḻa' chie'. 35Naž benne' wen žin ka' béx̱wgake' ni'a ne'e ka'. Béngake' toe' we', na' yetóe' bétgake' ḻe', na' yetóe' bžé'egake' ḻe' yej. 36Da' yoble x̱an yežlyón' bseḻe'e yebaḻe ni'a ne'e ka', na' gókgake' benne' zanže ka benne' ka' bseḻe'e zga'ale, na' tḻebe bengak benne' wen žin ka' chégake'. 37'Kate' ze ḻawte, bseḻe'e ẕi'ne' gan nníta'gake'. Wzá' ḻaže'e, na' wnné': “Gápegake' x̱kwide' chia' ba la'ne.” 38Kate' benne' wen žin ka' bḻé'egekle' ẕi'ne' na', ḻa' wnnátegake' ḻa' ḻégakze': “X̱kwide' ni gak chebe' yežlyó nga. Le cho'o, gotžo-be', na' da' žaḻa' gak chebe' gaken chežo.” 39Naž béx̱wgake'-be'. Bebéjgake'-be' na'le ḻo yežlyón' gan zej naz lba uba ka', na' bétgake'-be'. 40Naž Jesusen' wnnable' benne' yodo' ka', na' wnné': —Kate' yeḻá' benne' x̱an yežlyón', ¿nakx̱ gone' chegak benne' wen žin ka'? 41Beži'igak benne' yodo' ka', na' góžgake' Jesusen': —Wžía yi'e benne' wen da' ẕinnj ka', na' yežlyó chien' wdíe' ḻo na'gak yebaḻe benne' wen žin ka', benne' wnéẕjwgake' da' žeyaḻa' chie' kate' žin ža chíbgake' uba ka'. 42Naž Jesusen' gože' ḻégake': —¿Batkle beḻ-le dan' nyejw ḻe'e yiche la'y kan nak da' ni? Ki ẕnnan: Yej na' da' bzoa cheḻa'ale benne' wen yo'o ka', na'a naken yej ḻen yo'o blo che ze'e. X̱anžo na'kze bene' ga naken ki, na' naken to da' žonen ga žebanlžo. 43Che ḻen žapa' ḻe'e, latje chele gan ẕnna bia' Dios yeké'n chele, na' gatan' chegak benne' ka' góngake' kan žaḻa' gon no benne' nzi'e latjen'. 44No benne' wtope' ḻo yej na', ḻa' kwinze' wžía yi'e, na' cha' yej na' chejbagan' no benne', wzoẕjen ḻe'. 45Kate' bx̱oz wnná bia' ka' ḻen benne' yodo' fariseo ka' béngekle' dan' bsaka' ḻebe Jesusen', gókbe'egekle' bchaḻje' kan nak chégake'. 46Gónegekle' góx̱wgake' Ḻe', san bžébegake' benne' zan nníta'gake' ga na', dan' žejḻé'gake' nak Jesusen' to benne' ẕchaḻje' ḻo wláz Dios.

will be added

X\