MARKOS 11

1Bžin Jesusen' ḻen benne' ka' žónḻengake' Ḻe' tẕen, gawze gan že' yež Jerusalén, gan zej nnita' yež Betfagé, na' yež Betania, gan že' Ya'a Yag Olibo. Naž Jesusen' bseḻe'e chope benne' wsedle chie' ka', 2na' gože' ḻégake': —Le chej yeždo' da' žen' ḻawžo, na' kate' cho'ole ḻo yežen', chejx̱áka'le to burrodo' nžejba' ga na', na' bi na' kwia-ba' no benne'. Le sež-ba', na' le yedjwá'-ba' chia'. 3Cha' no benne' bi da' yi'e ḻe'e dan' žonle ki, le yi'e: “X̱anžon' žénele'-ba', na' ḻa' yeséḻa'tie'-ba' chio'.” 4Naž jake', na' bejx̱áka'gake' búrrodon', nžejba' gan žo'ogak benách ka' ḻi'a to yo'o da' žen' žoa'a nez, na' bséžgake'-ba'. 5Benne' ka' nníta'gake' ga na' belyi'e ḻégake': —¿Biẕ da' žonle? ¿Biẕ chen' ẕsežle búrrodon'? 6Bechébegak benne' wsedle ka' che Jesusen', na' belyi'e ḻégake' kan ba gožkze Jesusen' ḻégake', na' benne' ka' bnéẕjwgake' ḻégake' latje. 7Naž bché'gake' búrrodon' gan zoa Jesusen'. Bx̱óagake' laže' chégake' x̱kóže'ba', na' Jesusen' wžíe'-ba'. 8Wnníta'gak benne' zan ga na', na' bchíljgake' laže' chégake' gan nak ḻo nez. Yebaḻe benne' ka' bdíchjgake' zin da' bx̱óagake' ḻo nezen'. 9Wzó ḻawgak ẕnnegak zižje benne' ka' zjake' ḻaw Jesusen', na' benne' ka' zá'gake' x̱kóže'le', na' wnnágake': —¡Ga'n ẕen Dios! ¡Dios gon chawe'e Benne' ze'e nga, Bennen' bseḻa' X̱anžo Dios Ḻe'! 10¡Dios gon chawe'e Bennen' za' nna bi'e kan wnná bia' x̱a x̱to'žo Dabí! ¡Ga'n ẕen Dios! 11Ka' goken, bžin Jesusen' ḻo yež Jerusalén, na' wyoé'e ḻa' ḻi'a yodo'. Kate' beyóž bwie' yógo'te da' zej den dot kwitle, bežoje' zaka' yež Betania dan' za' žaḻe, na' zjakḻen benne' wsedle chie' ka' Ḻe'. 12Kate' za' ža'ní' yetó ža, na' zežój Jesusen' ḻen benne' ka' žónḻengake' Ḻe' tẕen, ḻo yež Betania, ẕdone'. 13Zí'to'le bḻe'ele' to yag higo da' žian x̱lage'. Wbige'e gan zoa yagen' cha' chejx̱ake'e late' da' ẕbian. Kate' bžine' ga na', bi be bejx̱ake'e da' ẕbian. X̱láge'ze žian dan' bi na' žin ža kwian. 14Naž bdiḻe Jesusen' yagen', na' wnné': —Biž gaw no benne' da' ẕbia chio'. Béngekle benne' wsedle chie' ka' da' ni. 15Kate' bžin Jesusen' ḻen benne' ka' žónḻengake' Ḻe' tẕen ḻo yež Jerusalén, wyoé'e ḻa' ḻi'a yodo', na' wzó ḻawe' ẕbeje' na'le benne' žote' ža'w ka' ḻa' ḻi'a yodo'. Bžix̱e' blag ka' chegak benne' ka' ẕchá'gake' mežw che yež zi'to' ka', na' ḻezka' da' ka' žé'gekle benne' ka' žóte'gake' plomdo' ka'. 16Ḻezka' bi bi'e latje no benne' bi da' we'e, na' kege no benne' wzóe' nez ḻa' ḻi'a yodo'. 17Jesusen' bsedle' benne' ka' nníta'gake' ga na', na' wnné': —Nyejw ḻe'e yiche la'y da' ẕnnan: “Liža' sin', yo'o gan benne' zá'gake' dot yežlyó nga wcháḻjḻengake' Dios.” Ḻe'e ba benlen kan nak ližgak benne' wbán ka'. 18Kate' bx̱oz wnná bia' ka', na' benne' yodo' wsedle ka' béngekle' da' ni, naž wzó ḻáwgake' žíljgake' nakx̱ gótgake' Jesusen', san dan' ẕžébegake' benne' yež ka', bi be béngake' chie', dan' žebángekle yógo'te benne' ka' kan nak da' žsedle Jesusen'. 19Kate' za' žaḻe ža na', bežoje' ḻo yežen'. 20Kate' za' ža'ní' yetó ža, wdé Jesusen' ḻen benne' ka' žónḻengake' Ḻe' tẕen, gan že' yag higo dan' bdiḻe' Ḻe', na' bḻé'egeklen', ba nbižen dot lwen. 21Naž bezá' ḻaže' Bedw dan' goken, na' gože' Jesusen': —Benne' wsedle, bwia nga. Yag higon' da' bdiḻon' neje, ba nbižen. 22Bechebe Jesusen', na' gože' ḻégake': —Le chejḻé' che Dios. 23Da' li žapa' ḻe'e, cha' no benne' yi'e ya'ado' ni: “Bkwas nga, na' bejsóa ḻo nisdo'” na' cha' bi gak chope ḻaže'e, san dot ḻaže'e chejḻi'e che Dios gone' kan wnné', na' gaken. 24Che ḻen žapa' ḻe'e: yógo'te da' nnable kate' wcháḻjḻenle Dios, le chejḻé' che Dios ba benne' chele dan' ẕnnable, na' gonnen' chele. 25Katen' ẕcháḻjḻenle Dios, cha' zoa no benne' ẕža'le, bennen' zoa bi da' bene' chele, le yenít ḻaw che bennen', nich ḻezka' X̱ale, Bennen' zoe' ya'abá chie', yenít ḻawe' chele ḻe'e doḻa' da' nbága'le. 26Cha' bi yenít ḻawle chegak benách ka', X̱ale, Bennen' zoe' ya'abá chie', bi yenít ḻawe' chele ḻe'e doḻa' da' nbága'le. 27Naž beyéj Jesusen' ḻen benne' ka' žónḻengake' Ḻe' tẕen ḻo yež Jerusalén. Kate' ne ẕda Jesusen' gan nak ḻo ẕchil yodo', bx̱oz wnná bia' ka' ḻen benne' yodo' wsedle ka', na' benne' gole ka', bžíngake' gan zoe'. 28Wnnábgekle' Jesusen', na' wnnágake': —¿Biẕ yeḻa' wnná bia' nzi' ḻo no'o žono' da' ki? ¿Noẕ benne' bdie' ḻo no'o yeḻa' wnná bian'? 29Bechebe Jesusen', na' gože' ḻégake': —Ḻezka' neda' nnabla' ḻe'e to. Cha' yechébele chia', yapa' ḻe'e bi yeḻa' wnná bia' napa' žona' da' ki. 30¿Noẕ benne' bdie' ḻo na' Ẕwa bezóe' benách ka' nis? ¿Dios o to benne'? Le nne na'a. 31Wzó ḻáwgake' žóngake' x̱tíža'gake' ḻa' ḻégakze', na' wnnágake': —Cha' nnažo Dios bseḻe'e ḻe', yi'e žo'o: “¿Biẕ chen' bi bejḻe'le chie'?” 32¿Yé'ažo-ne', bséḻa'gak benne' ka' ḻe'? Ki bezá' ḻáže'gake' dan' ẕžébegake' benne' yež ka' nníta'gake' ga na', dan' žékgekle yógo'te benne' ka' bchaḻj Ẕwan' ḻo wláz Dios. 33Che ḻen belyi'e Jesusen': —Bi nnezlto'. Naž Jesusen' gože' ḻégake': —Ḻezka' neda' bi yapa' ḻe'e bi yeḻa' wnná bia' napa' žona' da' ki.

will be added

X\