ẔWA 9

1Kate' ne ẕda Jesusen' to latje, bḻe'ele' to benne' golje' ḻo choḻe. 2Benne' wsedle chie' ka' wnnábgekle' Ḻe', na' wnnágake': —Benne' Wsedle, ¿noẕ ben doḻa', dan' golje' ḻo choḻe? ¿Benne' ni, cha' x̱a x̱ne'e? 3Bechebe Jesusen', na' gože' ḻégake': —Bi naken dan' ben benne' ni doḻa', na' kege dan' bengak x̱a x̱ne'e doḻa', san naken nich ḻa' ḻaw yeḻa' wak ẕen che Dios ni'a che benne' ni. 4Žon byenen gonžo x̱chin X̱a', Bennen' bseḻe'e neda', kate' ne nak ka te ža. Žin ža gak choḻ che yeḻa' got, katen' bi gak nitó benne' gone' žin. 5Kate' ne zoa' yežlyó nga, naka' baní' chegak benách ka' nníta'gake' yežlyó nga. 6Kate' beyóž bchaḻj Jesusen' da' ni, bži'e ẕene' ḻo yo, na' bene' góna'do' ḻen ẕene' na', na' wdeben' yej ḻaw benne' ḻo choḻen'. 7Naž gože' ḻe': —Wyéj, na' bejtíb ḻawo' ḻo bej nis da' nzin' Siloé. (Siloé naken to diža' hebreo da' ẕnnan: nseḻa'.) Naž benne' ḻo choḻen' wyeje' ga na', na' bejtibe' ḻawe'. Kate' bezé'e ga na', ba ẕḻe'ele'. 8Naž bebán ḻáže'gak benne' ẕjo'o ḻi'a ka', ḻen benne' ka' bḻé'egekle' ḻe' zga'ale katen' goke' ḻo choḻe, na' wnnágake': —¿Kege benne' ni bennen' wži'e, na' wnnable' no benne' bi da' wneẕjwe' chie'? 9Baḻe' wnnágake': —Ḻekze'. Yebaḻe' wnnágake': —Kegen', san kan ẕnna' ḻaw bennen', ḻezka' ẕnna' ḻaw benne' ni. Ḻe' wnné': —Nedan'. 10Naž wnnábgekle' ḻe', na' wnnágake': —¿Nakx̱kze goken, byaljw yej ḻawo'? 11Bechebe bennen', na' gože' ḻégake': —Bennen' lie' Jesús bene' góna'do', na' wdeben' yej ḻawa', na' gože' neda': “Wyéj žoa'a bej nis da' nzin' Siloé, na' bejtíb ḻawo'.” Wyá'a ga na', na' bejtiba' ḻawa', na' ḻa' byáljwte yej ḻawa'. 12Naž wnnábgekle' ḻe', na' wnnágake': —¿Gaẕ zoa bennen'? Ḻe' gože' ḻégake': —Bi nnezla'. 13Naž bché'gake' bennen' goke' ḻo choḻe, na' bejzégake' ḻe' ḻawgak benne' yodo' fariseo ka'. 14Dan' nak ža la'y chégake' kate' ben Jesusen' góna'don', na' bsaljwe' yej ḻaw bennen' goke' ḻo choḻe, 15che ḻen benne' yodo' fariseo ka' wnnábgekle' ḻe' da' yoble nakx̱ goken byaljw yej ḻawe'. Ḻe' gože' ḻégake': —Bdebe' góna'do' yej ḻawa', na' bejtiban', na' ẕḻe'ela'. 16Naž bchaḻjgak baḻe benne' yodo' fariseo ka', na' wnnágake': —Bennen' bi nake' che Dios, dan' bi žape chi'e ža la'y. Yebaḻe' wnnágake': —¿Wak to benne' doḻa' gone' yeḻa' wak ka' kan zej nak da' ka' žon bennen'? Ka' goken, bžoj chóplegake'. 17Da' yoble wnnábgekle' bennen' goke' ḻo choḻe, na' wnnágake': —¿Biẕ ẕnno' le' che bennen', ẕnno' bsaljwe' yej ḻawo'? Ḻe' wnné': —Nake' benne' ẕchaḻje' ḻo wláz Dios. 18Benne' judío wnná bia' ka' bi bejḻé'gake' cha' goke' ḻo choḻe katen' golje', na' byaljw yej ḻawe'. Che ḻen bḻížgake' x̱a x̱na' bennen' byaljw yej ḻawe'. 19Wnnábgekle' ḻégake', na' wnnágake': —¿Nak benne' ni ẕi'nle, ẕnnale golje' ḻo choḻe? ¿Nakx̱kze naken ẕḻe'ele' na'a? 20Bechébegak x̱a x̱ne'e ka', na' belyi'e ḻégake': —Nnezlto' benne' ni nake' ẕi'nto', na' golje' ḻo choḻe, 21san nakx̱ goken, ẕḻe'ele' na'a, bi nnezlto', na' noẕ bennen' bsaljwe' yej ḻawe', bi nnezlto'. Le nnable' ḻe', dan' ba nake' benne' wak. Ḻekze' nne'. 22Ki wnnagak x̱a x̱na' bennen' goke' ḻo choḻe, dan' ẕžébegake' benne' judío wnná bia' ka', dan' ba ben x̱tíža'gake' cha' nóte'teze benne' nne' nak Jesusen' Benne' Criston', to chi'ize kwéjgake' bennen' ḻo yo'o gan ẕdobgak benne' judío ka' nich yéngekle' x̱tiža' Dios. 23Che ḻen wnnagak x̱a x̱ne'e: “Le nnable' ḻe', dan' ba nake' benne' wak.” 24Naž benne' judío wnná bia' ka' da' yoble bḻížgake' bennen' goke' ḻo choḻe, na' belyi'e ḻe': —Ni'a che X̱anžo Dios wnné da' likze. Neto' nnezlto' nak bennen' benne' doḻa'. 25Naž bechebe bennen' goke' ḻo choḻe, na' wnné': —Cha' nake' benne' doḻa' bi nnezla'. To da' nnezla'. Zga'ale goka' ḻo choḻe, na' na'a ẕḻe'ela'. 26Wnnábgekle' ḻe' da' yoble, na' wnnágake': —¿Biẕ bene' chio'? ¿Nakx̱ bene' nich bsaljwe' yej ḻawo'? 27Bechebe bennen', na' gože' ḻégake': —Ba gožkza' ḻe'e, san bi gónelele si' ḻo na'le x̱tiža'a. ¿Biẕ chen' žénelele yénlele da' yoble? ¿Žénelele gónḻenle Ḻe' tẕen? 28Naž bká'ngake' ḻe' ka'ze, na' wnnágake': —Le' žónḻeno' bennen' tẕen, san neto' žónḻento' Moisés tẕen. 29Neto' nnezlto' Dios bcháḻjḻene' Moisés na', san kan nak che benne' ni, bi nnezlto' noẕ benne' bseḻe'e Ḻe'. 30Naž bechebe bennen', na' gože' ḻégake': —Da' ni žonen ga žebán ḻaža'a. Ḻe'e bi nnézlele noẕ benne' bseḻe'e bennen', na' Ḻe' bsaljwe' yej ḻawa'. 31Nnezlžo Dios bi ženle' chegak benne' doḻa' ka', san ženle' che no benne' ẕka'n ẕene' Ḻe', benne' žone' ka žénele' Ḻe'. 32Ža ni'te na' zejte na'a bi ženle cha' no benne' bsaljwe' yej ḻaw to benne' golje' ḻo choḻe. 33Chela' bi nak bennen' che Dios, bi be gak gone'. 34Naž beži'igak benne' yodo' ka', na' belyi'e ḻe': —Kan goljo' nak bian' nbago'o doḻa'. ¿Žénekzlo' le' wsedlo' neto'? Naž bebéjgake' ḻe' na'le. 35Benle Jesusen' kan bengak benne' judío wnná bia' ka', bebéjgake' bennen' goke' ḻo choḻe. Kate' bežage' ḻe', gože' ḻe': —¿Žejḻi'o che Ẕi'n Dios? 36Bechebe' ḻe', na' gože' Jesusen': —¿Noẕen', nich chejḻi'a chie'? 37Jesusen' gože' ḻe': —Ba bḻe'elo' ḻe', na' neda' nga ẕcháḻjḻena' le', naka' Ẕi'n Dios. 38Naž bennen' byaljw yej ḻawe', bka'n ẕene' Jesusen', na' gože' Ḻe': —Yoa'a ḻo no'o, žejḻi'a chio' Le'. 39Jesusen' wnné': —Nich wchi'a ḻaža'a benách ka', bḻa'a yežlyó nga, nich ḻé'egekle benne' ka' zej nchóḻgekle', na' gakgak ka benne' ḻo choḻe benne' ka' žékgekle' ẕḻé'egekle'. 40Kate' benne' yodo' fariseo ka', benne' nníta'gake' gan zoa Jesusen', béngekle' da' ni, naž belyi'e Ḻe': —¿Nakto' benne' nchóḻgekle'? 41Bechebe Jesusen', na' gože' ḻégake': —Chela' nchoḻze yej ḻawle, bi nbága'le doḻa'. Na'a ẕnnale: “Ẕḻé'elto'.” Che ḻen nbága'le doḻa'.

will be added

X\