ẔWA 21

1Wdé gok da' ki, bḻoe'e ḻaw Jesusen' da' yoble ḻawgak benne' wsedle chie' ka' gan nak žoa'a nisdo' da' nzin' Nisdo' Che Tiberias, na' ki goken kan bḻoe'e ḻawe' ḻáwgake'. 2Zej ndobe Smon Bedw, na' Mas, bennen' ḻezka' lie' Benne' Kwach, na' Natanael, benne' yež Kaná, yežen' nbaben Galilea, na' ḻezka' ẕi'n Sebedeo ka', na' yechope benne' wsedle ka' che Jesusen'. 3Smon Bedwn' gože' ḻégake': —Cha'a chejx̱ena' bel ka'. Yezika' benne' ka' belyi'e ḻe', na' wnnágake': —Sá'ḻento' le'. Naž jake', na' wžéngake' to ḻo barkw, na' yelen' nitó bel bi wẕéngake'. 4Kate' za' ža'ní', bejsé Jesusen' žoa'a nisdon', na' benne' wsedle chie' ka' bi gókbe'egekle' cha' Jesusen'. 5Naž Jesusen' gože' ḻégake': —Ẕí'na'do' ka', ¿bi de bel chele? Beží'igake', na' belyi'e Ḻe': —Nitoba'. 6Naž Jesusen' gože' ḻégake': —Le wsé yix̱jw bel chele cheḻá'a ḻi ža barkwn', na' senle-ba'. Naž bségaken', na' biž gok yeká'agaken', dan' nža'te yix̱jw na' bel ka'. 7Naž benne' wsedle, bennen' nži'il Jesusen', gože' Bedon', na' wnné': —¡X̱anžon'! Kate' benle Smon Bedon', “X̱anžon'” beyakwe' laže' gokwe', da' beké'en zga'ale, na' wyaze' ḻo nis. 8Yezika' benne' wsedle ka' bsá'gake' barkwn', na' bedjẕóbgake' yix̱jwn' dan' nža'ten bel ka'. Bi nak zi'to' gan de yo biž, da' nakze ka to gaywá' lka' ní'ažo. 9Katen' bžíngake' ḻo yo bižen', na' bḻé'egekle' že' to yi' balje ga na', na' ẕoa to bel ḻawen', na' ḻezka' de yet ga na'. 10Jesusen' gože' ḻégake': —Le yedjwá' bel ka' ba wẕéngakle-ba' ga zoa' ni. 11Bebén Bedon' ḻo barkwn', na' wẕobe' yix̱jwn' zaka' ḻo yo bižle, na' nža'ten bel ži'a ka', to gaywá' chonne-yonba'. Ḻa'kze zej nak bel zanḻe'e, bi bžeza' yix̱jwn'. 12Naž Jesusen' gože' ḻégake': —Le da gawle. Nitó benne' wsedle chie' bi bežogle' nnable' Ḻe', bi nne': “¿Noẕ Le'?” Nnézkzegekle' nake' X̱anžon'. 13Naž wbiga' Jesusen', na' bex̱we' yet ka', na' ḻezka' bel na', na' bi'en chégake'. 14Da' ni naken da' chonne chi'i bḻoe'e ḻaw Jesusen' ḻawgak benne' wsedle chie' ka' wdé bebane' ḻo yeḻa' got. 15Kate' beyóž bdáwgake', Jesusen' gože' Smon Bedw: —Smon, ẕi'n Jonás, ¿nží'iželo' neda' kan zej nži'il benne' ki neda'? Bechebe Bedon', na' gože' Ḻe': —O', X̱an. Le' nnézkzelo' nži'ila' Le'. Jesusen' gože' ḻe': —Bwaw ẕíla'do' chia' ka'. 16Jesusen' gože' ḻe' da' chope chi'i, na' wnné': —Smon, ẕi'n Jonás, ¿nži'ilo' neda' dot ḻažo'o? Bechebe Bedon', na' gože' Ḻe': —O', X̱an. Le' nnézkzelo' nži'ila' Le'. Jesusen' gože' ḻe': —Bwaw ẕila' chia' ka'. 17Jesusen' gože' ḻe' da' chonne chi'i: —Smon, ẕi'n Jonás, ¿nži'ilo' neda'? Gok nyache' ḻaže' Bedon' dan' chonn chi'i wnnable' ḻe', na' wnné': “¿Nži'ilo' neda'?” na' bechebe Bedon', na' gože' Ḻe': —X̱an, yógo'te nnézkzelo' Le'. Nnezlo' nži'ila' Le'. Jesusen' gože' ḻe': —Bwaw ẕila' chia' ka'. 18Da' li žapa' le', katen' goko' x̱kwide', žakze chio' bwakw kwino', na' kan ẕnnazen chio' wdó'. Kate' golo', wḻío' no'o, na' benne' yoble wakwe' le' laže', na' chi'e le' gan bi yénelo' chejo'. 19Da' ni wnná Jesusen' nak bian' kan gat Bedon', dan' chejté'e ḻe'e yag kroze, nich ga'n ẕen Dios. Kate' beyóž wnná Jesusen' ki, yetó da' wnné': —Benḻen neda' tẕen. 20Byechj Bedon', na' bḻe'ele' benne' wsedlen' Jesusen' nži'ile' ḻe', zedjnawe' ḻégake'. Nake' benne' wsedlen' wži'e kwit Jesusen' katen' bdáwgake', na' gože' Jesusen': “X̱an, ¿noẕ bennen' wdíe' Le'?” 21Kate' Bedon' bḻe'ele' ḻe', gože' Jesusen': —X̱an, ¿biẕ gon benne' ni? 22Jesusen' gože' ḻe': —Cha' žénela' ga'n bennen' kate' yeḻa'ža', bi žaḻa' gek zedlo'. Benḻen neda' tẕen le'. 23Wzé diža' ni gan zej nnita' lježžo ka', benne' ka' žejḻé'gake' che Jesusen'. Žékgekle' bi gat benne' wsedlen'. Jesusen' bi gože' ḻe' bi gate', san ki wnné': “Cha' žénela' ga'n bennen' kate' yeḻa'ža', bi žaḻa' gek zedlo'.” 24Benne' wsedlen' naka' neda', Ẕwa. Ẕzoa lia' da' ki, na' bzoja' ḻe'e yiche da' ki, na' nnézlele da' ẕnnia' naken dot da' li. 25Ben Jesusen' da' zanže ka'. Chela' no benne' wzoje' ḻégaken ḻe'e yiche to ton, žekla' bi gata' latje yežlyó nga ga kwa'gak yiche ka' žaḻa' wzojen'. Ka'kze naken.

will be added

X\