ẔWA 10

1Ḻezka' wnná Jesusen': —Da' li žapa' ḻe'e: no benne' bi choe'e gan žo'ogak ẕila' ka' ḻo le'je chégakba', san žoe'e ga yoble, benne' ni nake' wbán, na' ẕbankze'. 2Bennen' žoe'e gan žo'ogak ẕila' ka' nake' benne' žape chi'ikze' ḻégakba'. 3Nich cho'o benne' ni, žsaljw benne' zoe' žape chi'e gan žo'ogak ẕila' ka', na' ḻégakba' žéngeklba' chi'e, na' žeyónbia'gakba'-ne'. Ḻe' žḻižgake'-ba' to toba' kan nzi' lágakba', na' žebeje' ḻégakba'. 4Kate' ba wleje' yógo'te ẕila' ka', bia zej nakba' chie', ẕnežwe' ḻáwgakba', na' ḻégakba' žejnáwgakba' ḻe', dan' žeyónbia'gakba' chi'e. 5Bi chejnáwgakba' benne' yoble, san wẕónnjgeklba' ḻe', dan' bi nónbia'gakba' chi'igak benne' yoble ka'. 6Jesusen' bcháḻjḻene' ḻégake' da' ni da' bsaka' ḻebe', san bi bejní'igekle' dan' gože' ḻégake'. 7Naž Jesusen' bcháḻjḻene' ḻégake' da' yoble, na' wnné': —Da' li žapa' ḻe'e: neda' naka' ka to gan žo'ogak ẕila' ka'. 8Ba bḻa'gak benne' zan, benne' ka' wnnágake' zej nake' Benne' Criston', san yógo'te benne' ka' bžíngake' zgá'alegake' ka neda', zej nake' benne' wbán ka', na' želbankze', na' bi wzé naggak ẕila' ka' chégake'. 9Neda' naka' ka to gan žo'ogak benách ka'. Nóte'teze benne' chó'oḻene' neda', yelá bennen', na' gake' ka to ẕila' žo'oba', na' žežojba', na' žéḻ-lba' da' žawba'. 10'Za'ze benne' wbán nich kwane'-ba', na' gote'-ba', na' wžía yi'e-ba'. Neda' bḻa'a nich gata' yeḻa' nban da' zejlí kanne chegak benách ka' zej nake' ka ẕila' chia' ka', na' gáta'teze yeḻa' nban da' zejlí kanne chégake'. 11Neda' žape chi'a benách chia' ka' kan žon bennen', ḻo yeḻa' ži'i ḻaže' chie' žape chi'e ẕila' chie' ka'. Bennen' žape chi'e ẕila' ka' ki ba zoakze' wdíe' yeḻa' nban chie' ni'a chegak ẕila' chie' ka'. 12Benne' naẕjwe', benne' žape chi'e ẕila' ka', ẕḻe'ele' za' beko' yix̱e' snia, na' ẕka'ne' ẕila' ka', na' žẕonnje', na' beko' yix̱e' snia na' žejtáwya'aba' ẕila' ka', na' žesḻásba' ḻégakba'. Ki žon benne' naẕjwen', benne' žape chi'e ẕila' ka', dan' bi nakkze' benne' wape ẕila' ka', na' ẕila' ka' bi zej nakba' chekze'. 13Žẕonnj benne' naẕjwen' dan' žape chi'e ẕila' ka' nich si'ze' mežw, na' bi že' ḻaže'e ḻégakba'. 14'Neda', ḻo yeḻa' ži'i ḻaže' chia' žape chi'a ẕila' ka'. Kan nonbia' X̱ažo Dios neda', na' neda' nónbi'a X̱an', ḻezka' benách chia' ka', benne' zej nake' ka ẕila' chia' ka', zej nónbi'e neda', na' ẕdia' yeḻa' nban chia' ni'a chegak ẕila' ka', na' ẕila' ka', bia zej nakba' chia' nónbia'gakba' neda'. 16Ḻezka' zej nnita' ẕila' yoble chia' ka', bia ka' bi zej nbabba' nga. Lezka' žaḻa' chejx̱í'gaka'-ba'. Bia ka' yéngeklba' chi'a, na' gákgakba' toze ḻen yebaḻe ẕila' chia' ka', na' nedkza' gape chi'a ḻégakba'. 17'Che ḻen X̱an' nži'ile' neda', dan' ẕdia' yeḻa' nban chia', na' yezi'an da' yoble, da' zejḻás: wa'a latje benne' ka' gótgake' neda', na' yebana' ḻo yeḻa' got. 18Nitó benne' bi sáke'le' gote' neda', san nedkza' ẕdia' yeḻa' nban chia', na' gata'. Nzi' ḻo na'a wdían', na' nzi' ḻo na'a yezi'an da' yoble. Ki naken dan' ki gož X̱an' neda' gona'. 19Kate' béngekle benne' judío ka' da' ki, da' yoble bel-ḻá'a lázgake' kan žékgekle' che Jesusen'. 20Benne' zan ládjwgake' wnnágake': —Yoe'e be' x̱iwe', na' nyaḻ yichj ḻáẕda'we'. ¿Biẕ chen' ẕze nagle chie' Ḻe'? 21Yebaḻe' wnnágake': —To benne' yoe'e be' x̱iwe' bi ẕchaḻje' ki. ¿Wak to be' x̱iwe' wsaljwn yej ḻawgak benne' ḻo choḻe ka'? 22Žak byo' zag ka', na' nak ža žóngake' lni ḻo yež Jerusalén, kate' žejsá' ḻáže'gake' ka bdégake' yodo' chégake' ḻo na' Dios. 23Ẕda Jesusen' ža yo'o yodo' gan nak ḻo ẕchil chen, dan' nzin' Ẕchil Che Salomón. 24Benne' judío wnná bia' ka' bel-yéchjgake' Jesusen', na' belyi'e Ḻe': —¿Batx̱kze wsano' žono' ga žek zedlto'? Cha' nako' Benne' Criston', kwáselo bḻoe'el neto'. 25Jesusen' gože' ḻégake': —Ba gožkza' ḻe'e, san bi žejḻe'le chia'. Žin ka' da' žona', da' ka' bde X̱a' ḻo na'a gona', zej nak bian' no naka'. 26Ḻe'e bi žejḻe'le chia', dan' bi nbábḻenle benne' ka' zej nake' ẕila' chia' ka', kan ba gožkza' ḻe'e. 27Ẕila' chia' ka' žéngeklba' chi'a, na' žeyónbia'gakba' neda', na' neda' nónbia'gaka'-ba', na' zá'ḻengakba' neda' tẕen. 28Neda' ẕneẕjwa' yeḻa' nban da' zejlí kanne chégakba', na' bi kwia yí'gakba', na' nitó benne' bi sáke'le' kwéjgake'-ba' ḻo na'a neda'. 29X̱ažo Dios bénngake'-ba' chia', na' Ḻe' napže' yeḻa' wak ka yógo'te benách ka', na' bi gak nitó benne' kwéjgake'-ba' ḻo na' X̱an'. 30Neda', na' X̱ažo Dios, toze nakto'. 31Da' yoble benne' judío wnná bia' ka' béx̱wgake' yej ka' nich wžé'egaken' Jesusen'. 32Jesusen' gože' ḻégake': —Da' zan da' zej naken chawe' bena' ḻawle, dan' nzi' ḻo na'a che X̱an'. ¿Ni'a che biẕle žin chawe' ka' wže'ele neda' yej? 33Beži'igak benne' judío wnná bia' ka', na' belyi'e Ḻe': —Ni'a che žin chawe' ka' bi wže'eto' le' yej, san dan' bi ẕchaḻjo' chawe' che Dios. Le' nako' benachze, na' žon kwino' Dios. 34Bechebe Jesusen', na' gože' ḻégake': —Nyejw ḻe'e yiche la'y kan wnná Dios, da' ẕnnan: “Neda' ẕnnia': nakle dios ka'.” 35Nnézkzelžo da' nyejw ḻe'e yiche la'y nyéjwkzen to chi'ize. Ḻe'e yiche la'y na' benne' ka' bchaḻjḻen Dios ḻégake' nzi' lágake' dios ka'. 36Diosen' bebeje' neda' chekze', na' bseḻe'e neda' yežlyó nga. ¿Na'a ẕnnele chia': “Le' bi ẕchaḻjo' chawe' che Dios” dan' wnnía': “Ẕi'n Dios naka'”? 37Cha' bi žona' žin da' bde X̱ažo Dios ḻo na'a gona', bi žaḻa' chejḻe'le chia'. 38Cha' žona' žin da' bde Dios ḻo na'a gona', ḻa'kze bi žejḻe'le chia' nedkza', le chejḻé' da' zej nak bia' žin ka' da' žona', nich gákbe'le žonḻen X̱ažo Dios neda' tẕen, na' neda' žónḻena' X̱an' tẕen. 39Da' yoble gónegekle' séngake' Jesusen', san Ḻe' belé' ḻo ná'gake'. 40Naž wyéj Jesusen' da' yoble yecheḻá'a yego Jordán, gan wdá Ẕwa, bennen' bezóe' benách ka' nis. Jesusen' bga'ne' ga na'. 41Benne' zan bžíngake' gan zoa Jesusen', na' wnnágake': —Da' li bi ben Ẕwa nitó yeḻa' wak ẕen, san yógo'te da' wnná Ẕwan' kan žaḻa' gak che benne' ni, dot da' li naken. 42Che ḻen benne' zan bejḻé'gake' che Jesusen' gan zoe'.

will be added

X\