HEBREOS 1

1Zan chi'i, na' da' zan kan ben Dios, bcháḻjḻene' x̱a x̱to'žo ka' ža ni'te ḻo na'gak benne' ka' bcháḻjgake' ḻo wlaze' Ḻe'. 2Ža ni zoažo na'a, kate' ze ḻawte, Dios bcháḻjḻene' žo'o ḻo na' Ẕi'nkze'. Dios wnnakze' gape Ẕi'ne' na' yógo'te da' zej naken chie' Ḻe', na' ḻo na' Ẕi'ne' na', Dios bene' yežlyó nga. 3Ẕi'ne' na' nake' ka to da' žsa'ní' ḻen yeḻa' baní' che Dios, na' kan nak Ẕi'ne' na' ẕḻoe'elen ḻaw dot da' nakkze Dios. Ẕi'ne' na' žonkze' ga nníta'tezgak yógo'te da' zej den, ẕkonle' žin da' ẕnne' ḻen yeḻa' wak ẕen chie'. Katen' beyóž bene' da' žeyón žo'o chawe' ḻaw Dios dan' beké'e doḻa' da' nbága'žo, na' bejži'e kwit ḻi ža che Dios, Bennen' ži'e ẕnna bi'e ža'le. 4Ẕi'n Dios nakže' blo ka wbás che ya'abá ka' che Dios, dan' nakže blo da' lie' ka zej nak lagak wbás la'y chie' ka', kan bzoa Dios le' dan' nake' Ẕi'nkze'. 5Dios batkle gože' to wbás che ya'abá chie' kan gože' Ẕi'ne', katen' wnné': Nako' Le' Ẕi'na'. Bḻoe'ela' ḻaw na'a naka' X̱o'. Batkle bchaḻje' che to wbás che ya'abá kan bchaḻje' che Ẕi'ne', katen' wnné': Neda' naka' X̱e', na' Ḻe' nake' Ẕi'na'. 6Ḻezka', katen' Dios bzoe' Ẕi'nkzen' ḻo yežlyó nga, na' wnné': Yógo'te wbás che ya'abá yéngekle' x̱tiža' Ḻe'. 7Kan zej nak wbás che ya'abá chie' ka', wnné': Zej nak wbás che ya'abá ka' ka be' da' žaken. Zej nak wbás wen žin chia' ka' ka yi'. 8Na'a, kan nakkze Ẕi'ne', wnné': Gan ži'o ẕnna bi'o, nna biá'tezo', Dios. Nak chawe' kan ẕnna bi'o. 9Nži'ilo' da' nak chawe', na' kege da' bi nak chawe'. Che ḻen neda', Dios chio', bdia' ḻo no'o yeḻa' wnná bia', na' bena' ga napžo' Le' yeḻa' žebél ka da' napgak lježo' ka'. 10Ḻezka' wnné': Le', X̱an, katen' wzó ḻaw, beno' yežlyó nga, na' ḻen na'kzo' beno' ya'abá. 11Te chégaken, san Le', zoakzo' to chi'ize. Yógo'te da' ka' tébgaken kan ẕteb to laže', 12na' ka to laže' wtobo' ḻégaken, na' chó'ngakon' ka to laže' teb, san Le', batkle wchá' kwino' na' batkle te chio'. 13Dios batkle gože' to wbás che ya'abá chie' kan gože' Ẕi'ne', katen' wnné': Wžé' kwita' ḻi ža kate' gonža' ga wzóa ẕibgak ḻawo' benne' ka' bi ẕḻé'egekle' Le' chawe'. 14Yógo'te wbás che ya'abá ka' che Dios zej nake' be' wen žin ka' che Dios, na' bseḻe'e ḻégake' nich gákḻengake' benne' ka' želágake'.

will be added

X\