HECHOS 1

1Kate' bzoja' chio' le' zga'ale, Teófilo, benne' zaka', neda', Lukas, bzoja' yógo'te da' wzó ḻaw Jesusen' žone', na' žsedle', 2na' zejte beyepe' ya'abá che Dios. Kate' za' yeyepe' ya'abán', ne zoaḻen Dios Be' La'y Ḻe', wnné' kan žaḻa' gongak benne' wbás chie' ka', benne' ka' wžekze' Ḻe'. 3Wdé wẕaka' Jesusen', na' gote'. Naž bebane', na' bḻoe'e ḻawe' ḻawgak benne' wbás chie' ka'. Bḻoe'ele' ḻégake' da' zan da' gok biá'gaken zoe' nbane', da' ka' bi gak no benne' wži'e chégaken. Zan chi'i bḻoe'e ḻawe' ḻáwgake' dot chopḻalj ža, na' bcháḻjḻene' ḻégake' kan ẕnna bia' Dios. 4Katen' wnníta'gake' tẕen, gože' ḻégake' bi yekwásgake' ḻo yež Jerusalén, na' wnné': —Le kwez ga na' da' bchebe ḻaže' X̱a' seḻe'e chele, kan ba bzenla' ḻe'e. 5Ḻezka' wnné': —Da' li Ẕwa bezóe' benách ka' nis ḻo nis, na' bi de yeschá gak chele da' ẕḻoe'el yeḻa' žezóa nisen', dan' yide Dios Be' La'y yedjsóaḻene' ḻe'e. 6Naž benne' ka' zej ndobe' gan zoa Jesusen' wnnábgekle' Ḻe', na' wnnágake': —X̱an, ¿gono' ga nna bia'gak benách Israel ka' da' yoble ža ni zoažo na'a? 7Jesusen' gože' ḻégake': —Bi nak chele nnézlele bi ža o bi yel gon Dios X̱a', da' yo'on ḻo na'kze'. 8Si'le ḻe'e yeḻa' wak kate' yide Dios Be' La'y yedjsóaḻene' ḻe'e. Naž wchaḻjle kan nak chia' neda' ḻo yež Jerusalén, na' dot gan nbab Judea, na' gan nbab Samaria, na' ga žíntele dot yežlyó nga. 9Kate' beyóž bcháḻjḻene' ḻégake' da' ni, na' kate' ne ẕwíagake' Ḻe', ḻa' beyeptie' ḻo be'ze gan že' to bejw da' bkachen' Ḻe', na' biž bḻé'egekle' Ḻe'. 10Kate' ne ẕwíagake' ya'abale kate' ne žeyepe Jesusen', bḻa'gak chope wbás che ya'abá ka' gan nníta'gake', wbás ka' zej nakwe' laže' ẕíla'do'ze. 11Ẕoptie' góžgake' ḻégake', na' wnnágake': —Benne' Galilea ka', ¿biẕ chen' ẕwíale ya'abale? Yeḻa'kze Jesusen' da' yoble kan ba bḻé'elele-ne' katen' bezé'e gan zoale nga, na' beyepe' ya'abá che Dios. 12Naž benne' ka', benne' bénḻengake' Jesusen' tẕen, bezá'gake' gan zoa ya'adon' da' nzin' Ya'a Yag Olibo, na' beyéjgake' ḻo yež Jerusalén. Ya'adon' zoan gawze gan že' yež Jerusalén na', da' naken kan zej nzi'e latje želzé'e ža la'y chégake'. 13Kate' bežíngake' ḻo yežen', belbene' gan nak da' chope kwia ḻo yo'o, gan zej nnita' Bedw ḻen Jakob, na' Ẕwa, na' Ndres, na' Lip, na' Mas, na' Bartol, na' Matío, na' Jakob, ẕi'n Alfeo, na' Smon, bennen' že' ḻaže'e yež chie', na' ḻezka' Judas, biche' Jakoben'. 14Yógo'te benne' ki bcháḻjḻengake' Dios tẕen. Benne' biche' Jesús ka' ḻen Lia, x̱na' Jesusen', na' yebaḻe no'le ka', bénḻengake' ḻégake' tẕen. 15Ḻa' ža na'ze wzé Bedon' gachje ḻáwe'le gan zej nnita' lježžo ka', benne' žejḻé'gake' che Benne' Criston'. Gokgak ka x̱opḻalj benne' ka' zej ndobe' ga na'. 16Bedon' gože' ḻégake', na' wnné': —Ljéža'do' ka'. Ben byenen gok da' nyejw ḻe'e yiche la'y, kan wnná Dios Be' La'y zgá'atele, dan' bzoj Dabí kan gok che Judas, bennen' bchi'e benne' ka' wẕéngake' Jesusen'. 17Judas na' wbábḻene' žo'o, na' bénḻene' žo'o tẕen žin ni. 18Wẕí'gake' to yežlyó ḻen laẕjw che da' ẕia da' ben bennen'. Judas na' wbix̱e', na' wžeza' ḻi'e, na' bžojgak yógo'te da' zej že' ḻi'e. 19Kate' benne' ka', benne' nníta'gake' ḻo yež Jerusalén béngekle' da' ni, naž bé'gake' la yežlyón' Aséldama, to diža' hebreo da' ẕnnan ḻen diža' x̱iža': “Yežlyó Che Žen.” 20Ka' goken che Judas na', kan nyejw ḻe'e yiche la'y da' nzin' Salmo Ka', da' ẕnnan: Bga'n liže' ka'ze, na' bi bžeḻ no benne' zoe' ḻo yo'on'. Ḻezka' ẕnnan: Benne' yoble yedíe' ḻo wlaze'. 21'Na'a žon byenen kwežo to benne' gónḻene' žo'o tẕen nich wzóa lie' che Jesusen', kan bebane' ḻo yeḻa' got. Žaḻa' gake' to benne' nbabe' benne' ka' bénḻengake' žo'o tẕen ža ni'te katen' X̱anžo Jesusen' wdáḻene' žo'o, benne' ka' wnníta'ḻengake' žo'o katen' Ẕwa bezóe' benne' ka' nis, na' zejte ža beyepe Jesusen' ya'abá che Dios, katen' bezé'e gan zoažo. 23Naž wléjgake' chope benne' ka', Jwsé, na' Matías. Jwsén' ḻezka' lie' Sabás, na' zoa yetó ḻe' Justo. 24Naž bcháḻjḻengake' Dios, na' wnnágake': —X̱anto' Dios, nónbia'kzo' yichj ḻáẕdo'gak yógo'te benách. Bḻoe'el neto' nole benne' chope' ki ba wžekzo' Le', 25nich gone' žin ni, na' gake' wbás chio', nich chaze' latje che Judas, bennen' bnite' latje chie' dan' bene' doḻa', na' wyeje' latje chekze' ḻo latje choḻ. 26Naž bzójgake' lágake' ḻe'e yiche ka', to che Jwsé, na' yetó che Matías. Bchíx̱egake' da' ka', na' bebéjgake' ton, gan nyejw la Matías. Ka' goken, Matíasen' wbábḻene' yechinéj benne' wbás ka' che Benne' Criston'.

will be added

X\