2 CORINTIOS 6

1Dan' žónḻento' Dios tẕen žin, žáta'yoelto' ḻe'e, na' ẕnnato' bi wdele ka'ze da' chawe' da' žénele Dios gone' chele. 2Nyejw ḻe'e yiche la'y kan wnná Dios, da' ẕnnan: To ža wžé' ḻaža'a le', benla' chio', na' ža bena' ga gak yeló', gókḻena' le'. Le wia nga. Na'a naken ža že' ḻaže'e žo'o. Na'a naken ža gak yelažo. 3Bi žénelto' bi da' gonto' da' gonen ga wchix̱le no benne', nich bi soa no benne' wka'ne' ka'ze žin da' žonto'. 4Ni'a che yógo'te da' žonto', že' ḻáže'to' gak bia' nakto' wen žin che Dios. Che ḻen, ḻen yeḻa' ẕbeze ẕen ḻaže' ẕzoelto' da' ka' ẕzáka'to', na' da' ka' žiážjelto', na' da' ka' žóngaken ga že' zedlto'. 5Ki bento' ḻa'kze bdingak benne' ka' neto' ḻo yo, na' bséjwgake' neto' liž ya, na' wžía ḻáže'gake' neto'. Wdetle bento' žin, na' bi gota' cheto' latje tasto' o bi da' gawto'. 6Be' ḻáže'to' gak bia' nakto' wen žin che Dios. Gok bia' da' ni dan' nakto' ḻaẕdo' yaž, na' dan' napto' yeḻa' žejní'il, na' dan' ẕbezto' ẕen ḻaže', na' dan' nakto' ži'i ḻaže', na' dan' zoaḻen Dios Be' La'y neto', na' dan' nak ḻi ḻaže' kan nži'ilto' lježto' ka'. 7Ẕchaḻjto' da' naken dot da' li, na' zoaḻen yeḻa' wak che Dios neto'. Da' nak chawe' naken ka to da' ẕdíḻ-ḻento' ḻo wdiḻe, na' ḻezka' da' žape chi'in neto' ḻo wdiḻen'. 8Zej nnita' benne' ka' žápegake' neto' ba la'ne, na' ḻezka' benne' ka' ẕzóagake' neto' cheḻa'ale. Zej nnita' benne' ka' žḻiž zí'gake' neto', na' ḻezka' benne' ka' žḻiž cháwe'gake' neto'. Ḻa'kze benách ka' ẕnnágake' žon ḻáže'to', ẕchaḻjto' da' naken dot da' li. 9Ḻa'kze zej nnita' benách ka' bi zej nónbi'e neto', ḻezka' zej nnita' benne' ka' zej nónbi'e neto'. Ẕdato' gan žon ẕož gatto', san ne zoato' nbanto'. Žóngake' neto' da' ẕia, san bi žótgake' neto'. 10Žóngake' neto' nyache' ḻaže', san žebétezelto'. Nakto' benne' yache' ka', san žonnto' yeḻa' wnni'a ḻi ḻaže' chegak benne' zan ka'. Ḻa'kze bi be de cheto', yógo'te da' de naken cheto'. 11Dot ḻáže'to' ẕcháḻjḻento' ḻe'e, ẕí'na'do' ka', ḻe'e zoale ḻo yež Corinto. Bḻoe'elto' ḻe'e kan da' li že' ḻáže'to' ḻe'e. 12Cha' bi nakžo toze bi naken dan' bi že' ḻáže'to' ḻe'e, san ḻe'ekze bi že' ḻáže'le neto'. 13Na'a, ẕcháḻjḻena' ḻe'e kan žon to benne' ẕcháḻjḻene' ẕi'nkze' ka', na' ẕnnia': le yebí'i cheto' kan žónḻento' ḻe'e. Le we' ḻaže' neto'. 14Bi gónḻenle tẕen benách ka' bi žejḻé'gake' che Dios. Bi gak gak toze da' nak chawe' ḻen da' kegle. Bi gak gak toze da' nak choḻ ḻen da' nak baní'. 15Bi gak gak toze Benne' Criston' ḻen da' x̱iwe'. Bi gak gak toze to benne' žejḻi'e che Benne' Criston' ḻen to benne' bi žejḻi'e chie'. 16Bi gak gak toze yodo' che Dios ḻen lo'a ka'. Ḻe'ekze nakle ka to yodo' gan yo'o Dios ban. Kan nak da' ni, Dios na'kze wnné': Sóaḻena' ḻégake', na' táḻena' ḻégake'. Gaka' Dios chégake', na' ḻégake' gákgake' benách chia' ka'. 17Che ḻen, ḻezka' wnné' ki: Le yežój ládjwgake', na' le kwas gan nníta'gake'. Wnná X̱anžo: “Bi gónḻenle ḻégake' tẕen da' kegle, na' si' ḻo na'a ḻe'e. 18Neda' gaka' X̱akzle, na' ḻe'e gakle ẕi'na' ka', benne' byo ka', na' no'le ka'.” Ki ẕnna X̱anžo, Bennen' napkze' dot yeḻa' wak.

will be added

X\