Hechos 2

1Lëë tsiñee lëë lni Pentecostés kol, lëë kchësy meñ nii xniladzy xtiits Jesús ptyop tub lugarak. 2Kolpsye lëë meñ biñ tu bi nii sëëdsëëb kpaa, sinak tsiñee xpi tu medox, aan tyub leñ yu nii nche sob meñ kwyo bi go. 3Tsigo lëë kchëlo tiits byaklo sinak bëly, lëëw pkaasy kchë lo meñ nii ncheno leñ yu go. 4Aan kchësy leñ styoo meñ go kwsëëb Kyalbini Ntson, ni lëë meñ go bislo kwnee stu clasy tiits, sinak nii psyaab Kyalbini leñ styoo meñ go. 5Lëëtyee gaa leñ tse go ndaly meñ Israel nii chuuñtsyey nii xñabey xtiits Dios ptsiñ Jerusalén, kok xtsele ncheno tañ meñ go tyub lo kislyu. 6Tsiñee lëë bi go kwyo, lëë meñ ptyopbe, aan nandy meñ pe cos kwxaak meñ, porñee biñ meñ xñee xpëëdscuel Jesús xtiitsë meñ. 7Ntseeb psee meñ, xñee meñ lo xcombañer: —¿Pe lëdy nonsyke meñ Galilea nayak nak kchë meñ nii nchenee? 8¿Xa mod nak busy, nii xtsyon no xñee kchë meñ gue xtiitsë no? 9Nche meñ Partia nu, ni meñ Media, ni meñ Elam, ni meñ Mesopotamia, ni meñ Judea, ni meñ Capodocia, ni meñ Ponto, ni meñ nii sëëd nëz Asia, 10ni meñ Frigia, ni meñ Panfilia, ni meñ Egipto, ni meñ Libia nii ncheno kexka Cirene, ni meñ Roma. No pxosy meñ go nak xaa Israel, no gaa meñ go kwsëëb xlad meñ Israel xmod. 11Ni nche meñ Creta ni Arabia nu. Per kchësy no xtsyon xñee meñ re xkyalntson Dios con mer xtiitsë no. 12Kchësy meñ go psee aan nandy meñ go pe cos kwxaak. Ngo nii lika lo xcombañer meñ go xñee meñ go: —Nli gaa na ¿xa nak kchë cos re? 13Lëë stubla gaa meñ lika kwtsityni, xñee: —¿Pe ksal do xaa gue?, xsyudzy xaa. 14Tsigo lëë ksa tsiipchop apostle kusoli aan lëë Pedre chëb: —Meñ Judea ni kchësy to siñee ncheno do Jerusalén, kol kaknan nrii, ni kol kon nii kñen lo do. 15Xsyusty meñ re gon sinak nladzy to, por bii sily, lëë las nueve kal nak. 16Lëë nii kwnee profet Joel noyak cumplir. Lëë xaa chëb: 17Tsi lëë tse go tsitsib, xñee Dios, lëën kxal xKyalbini Ntsonaa lo kchë meñ nii nche lo kislyu. Lëë xiñgan do ni xiñtsyaap to kñee xtitsaa, lëën kñe lo xaa yeeñ lo mgaal, ni lëë xaa kol kñee xkaal. 18Lëën kxal xKyaalbiniin lo mguiy ni lo kwnaa nii xsoob xtitsaa, tsiin kñee meñ go xtitsaa. 19Lëën kuuñtsyey kyalntson leñ kpaa, lëë lo kislyu lëë styoo meñ ksee kan meñ cheñ ni ki ni koxtoo. 20Lëë lo ngbidz jkyey, lëë mëë kyak cheñ, antes nii lëë Dios nii xñabey lëë no kiid. Ntseeb kak tse go. 21Per stelaa kchë meñ nii kuptsyë kwetsy Dios parñee kakni Dios meñ go. 22Tsigo lëë Pedre chëb: —Kchësy to siñee nak to meñ Israel, kol jkëëtyag nii kñen. Nan do gon nii lëë Dios kwle Jesús Nazaret lady to, ni nan do nii por lëë xaa beeñtsyey Dios ndaly kyalntson. 23Per tsi lëë xaa pkaa ña do, lëë xaa beety to, pkëë do xaa lo crusy. Kchë do meñ ngoptol, beeñtsyey do sinak nii nol kik Dios kak. 24Per lëë Dios beeñ kpañ xaa, pteelaa Dios xaa lo xyoob kyalkuty, kwlëbty kyalkuty lo xaa. 25Sinrii xñee rey David tsi lëë xaa xseety Jesús: Tugak xñech Dios nii xñabey lon, tugak nakni xaa naa, ngo nii pe kaktyaa. 26Por ngo xle styoon, ni nguiool cholaa. Mbëë kpañaa, pe tsinidy kikaa, 27por nanaa nii klaadyoo kyaanaa laañee xyaan meñ kuty, ni nanaa nii klaadyoo kyodz xcuerpaa. 28Lii bluuy nëz nii xnee kyalmbañ lon, ni slen tsiñee lëën kan lii. 29Loxsye ngo lëë Pedre chëb: —Beetsy, kol kwës gaanoo, lëën kniy lo do nii lëë pxusykoltoo no David kuty, ni lëë xaa pkyeetsy, lëë xpaa gaa xaa bii xtyon no. 30Tu xaa nii xyeñ xtiits Dios kok David. Ngo nii nan xaa nii lo xtiiy xaa kwe Dios tu xaa nii kñabey. 31Sotak David nii lëëw tse chan xaa tsiñee kwnee xaa nii lëë Crist kpañ, ni tsi lëë xaa kwnee nii kyaandy xcuerp Crist laañee xyaan meñ kuty ni kyosty xcuerp xaa. 32Ni nan gaa to nii lëë Dios beeñ kpañ Jesús, ni kchëë noo xñee nii ptyon noo. 33Lëë Jesús pañ parñee sob xaa kwi Dios nëzli, kñabey xaa. Ni lëë Dios kaa ptee xKyalbini Ntson lo xaa, aan lëë xaa pxaal Kyalbini Ntson go lo kislyu. Lëë ngo nak nii chan do ni biñ do natse. 34Lëdy David byëp kpaa, por misme David chëb: Chëb Dios lo xaa nii xñabey naa: “Kwsob kwin nëzli kñabeyoo, 35mentre lëën kuñ nii ksoob meñ nii xlëë lool xtiitsoo.” 36’Kol kaknano kchësy to siñee nak to meñ Israel nii misme Jesús nii pkëë do lo crusy nak xaa nii kwle Dios, ni lëë Dios pso xaa xñabey xaa. 37Tsiñee lëë meñ nii nche siko biñ xtiits Pedre, mban pteestyoo kchë meñ go, aan lëë meñ go kwnabtiits lo Pedre ni lo apostle chëb: —Beetsy, kol në pe cos kuuñ noo. 38Tsigo lëë Pedre kwëb chëb: —Kol ktsëë xmod to, kol ktikche styoo do lo Dios, ni kol chobnis kchësy to siñee xniladzy to xtiits Dios parñee kak perdón xtol do, tsiin singo mod lëë Dios kneetsy Kyalbini Ntson lo do. 39Lo do ni lo xiñ do ni lo meñ sit pxaal Dios tiits re. Lëë tiits re sëëd lo kchë meñ nii klyañ styoo Dios kwetsy xaa. 40Lëdy nriisy kwnee Pedre, ndalyre nii kwnee xaa lo meñ, chëb xaa: —Kol ksaan kchë tol nii chuuñtsyey meñ nii xnilasty xtiits Dios. 41Tsigo lëë meñ nii psal xtiits xaa kwchobnis, aan tse go kwsëëb siik tson mily meñ nii kal bniladzy lady meñ nii xniladzyle. 42Aan iip psaandy meñ go kchë nii bluuy apostle, mbëë pañ meñ go kchë xcombañer, chutiitsni meñ go Dios ni xkaal lsa meñ go par kaw meñ go kyaxtily tusyke. 43Kchë meñ psee kon kchë kyalntson nii blaa Dios beeñtsyey apostle. 44Kchësy meñ nii bniladzy tugak kok meñ go ni pkady meñ go kchë nii chap meñ go lo xcombañer. 45Pto meñ go kchë nii chap meñ go, aan kchë tumi go pkaasy según lyaadzy nii ncheno tub tub meñ. 46Ksatyee tse xkaal lsa meñ go leñ lidzy Dios. Lëë tsi lëë meñ xtsiñ lidzy tu xcombañer, lëë kyaxtily xkaasy aan mbëë con kyalwle chaw meñ gow tusyke. 47Ni tugak pseety meñ go Dios aan kchë meñ Jerusalén bleni meñ nii xniladzy xtiits Dios ni ksatyee gaa tse lëë Dios xtsiñnire meñ xtyelaa lo tol.

will be added

X\