Tito 3

1Bicy nu gyeza' lagy de mbecy ni Crisht nu “O” nii dey ni de gubier gal nu ni de fushtiz. Rlagy ñi nu gac dey mbecy nu rzuub gyidag. Nunu zaab zu la dey altant nu gyicy yu coz nap. 2Rlagy ñi nu cue' shiñ nii dey nu nac ni tub la mbecy. Rlagy ñi nu cue' go zi dey riidz nu losa'y. Rlagy ñi nu gac dey mbecy gugy na. Rlagy ñi nu gac dey mbecy nu nap nii nu dela losa'. 3Gun gulas ni' zi'l de ub na guc na mbecy nu sac shcab ni. Guc na mbecy nu wacsuub gyidag ni Ñgyoozh. Nañ gal nu na nu bdune' den. Orze' de lo la coz nu gusht ni den, nde' byub ic ñi de ub na. Gusa den lat de coz a̱' nap. Gusaap lagy den nu nac losa'n. Rzi lagy mbecy lo den, nunu rzi lagy den lo mbecy. 4Tees ornu Ñgyoozh, biñ nu bloo mbañ de ub na, briic mi nu gad lagy den nu dzi nap ricy num den, nunu dzi rcam den, 5orze' bloo mbañ mi den. Ni bicy mi, tees walab nu nac nu dzi nap bicy den, sinu nu nac nu gushni lagy mi den. Ornu bzu nis den, nde' nañ gal nu na nu gul naa tuuba' tir, gun byac na mbecy cub. Byac den mbecy cub nu nac nu rcyiiñ Espiriit Yon nim nañ lardoo den. 6Briic mi Espiriit Yon nim nu nac Jesucrisht, biñ nu bloo mbañ de ub na. Gun orze' Espiriit Yon nim nap tona' la gyicy num den. 7Gun orze' gyanap den lom nu nac faboor nim. Orze' gad nu cui mbañ den dub gal mod nu drish lon. 8Dela nde' coz rishli. Nde' nu rlagya̱ nu gzu fert ru nur ñii, gun orze' de yu nu ricy cup consuel lo Ñgyoozh gzu fert yu nu gyicy yu de coz nap. De riidz ii nac ñii riidz nap, nunu cyiiñ ñi par dela mbecy. 9Tees ru cue' shet ic ru nu gor riidz ton nu mbecy. Cue' gor riidz nu cyu nez tub ga mbecy. Cue' chucoo der. Nunu cue' go zi der riidz nu nac de asunt ni leey nu bzeeñ Moisees. De nde' nac ñii coz nu rila wacyiiñ. Nunu se la la cyiiñ ñi ni den. 10Ze' benu ca na mbecy ricy yu nu yacyup nac de mbecy ni Crisht, mas bi pshuu nur yu tub tir o cyup tir, ze' benu wagyicy cuen yu de coz nu rniir, orze' cor yu lat de mbecy ni Crisht. 11Rlagy ñi nu gad lagy ru nu mbecy ze' a̱' nap na shcab niy. Laab de cyi nu ricy yu ricy ñi nu rabee nu yu' falt niy. 12Ya̱ zuu neza̱ Artemas nu Tíquico nu cyid dey lor. Na ornu gri dey na, orze' gyicy ru tub fers nu cyid ru gyedz Nicópolis nu cyid güiir ya̱. Gun ya̱ bi bdu' ica̱ nu cyiiña̱ gyedz ze' lat tiem rag. 13Ru, locyuub ru Zenas nu Apolos, cyup de yu nu rne' ic lo de fushtiz, nu ca na la nesedaa ni dey, gun orze' zaab za la byaj ni dey nu cue' gyicy falt ni tub la coz ni dey. 14Nunu ni' zi'l de losa'n, de yu nu nac mbecy ni Crisht, rlagy ñi nu gyicy yu nu gad lagy yu lac mod gyicy yu de lo la coz nap, nunu rlagy ñi nu locyuub yu de mbecy nu ricy falt coz ni, gun orze' cue' nu cyiiñ leew dey gyishlombecy ii. 15Na dela de mbecy nu yu' ze' nu rcyiiña̱ ii, dela dey zeed yu ñgyoozh nir. Orze' gab ru de mbecy shnuy, de mbecy nu rca de ub na nu nac nu ricy cup dey consuel lo Crisht. Orze' Ñgyoozh gyicy mi faboor nu nap gyicy num dela de ru.

will be added

X\