Tito 2

1Orze' dub laa tiem lyuur ni de mbecy nu gyicy yu dub gal mod nu rnii de riidz nu sac falt ni Ñgyoozh, de riidz nu rlyuu mbecy nu nac de coz ni Crisht. 2Orze' de yu gush rlagy ñi nu gac dey mbecy nu ca lagy de' zir mbecy lo. Rlagy ñi nu gac dey mbecy nu nap na shcab ni. Rlagy ñi nu nap gzu dey shcab nu nac de coz ni Crisht. Rlagy ñi nu nu rishli gaal ca dey de losa'y. Rlagy ñi nu gagye dey ornu rzac ziy. 3Ni' zi'l mod par de biñ gush. Rlagy ñi nu gyicy dem gal mod nu yad ñi nu gyicy de biñ mñaa nu rca lagy lo Ñgyoozh. Cue' gac dem biñ mñaa nu ro rishcuen. Ni cue' gzugy dem. Rlagy ñi lyuu dem ni de fiñ feñ nu nac de mod nap nu ricy de ub mi. 4Nunu lyuu ga'm ni de fiñ feñ nu ca deñ ñgyeeñ gal nu de i'ñ ñi. 5Lyuu ga'm nu nap gyub ic deñ ub ñi, nunu gac deñ mbecy nu sac falt ni. Ni' zi'l lyuum ni deñ nu gyicy paa deñ nu de riiñ nu yu' nañ yu'. Lyuum ni deñ nu gac ñii mbecy gugy na. Lyuum ni deñ nu “O” niiñ ni ñgyeeñ. Gun benu ni gyicy deñ, orze' wad mod nu nii zi ni tub la mbecy ni de riidz ni Ñgyoozh. 6Na ni' zi'l byoo rishlo de yu feñ nu nap gyicy yu mandaar ub yu. 7Nunu dub laa tiem ru lyuur ni dey nu gyicy dey dela mod nap. Lyuur ni dey nu nac mod nu ricy ru. Ornu lyuur ni dey, orze' nu tub zi'l lardoor bicy ñi. Cue' nu cyup lardoor gyicy ruñ. Nunu cue' niir riidz shi' lo dey, 8sinu niir nu mod nu raso̱o̱, gun orze' ni tub la mbecy waniiy nu ru walab riidz nap rniir, gun orze' cyu zi'l mbecy nu za contr ni den gat lo dey par nu nac nu wad mod nu nii dey riidz a̱' nap nu nac de ub na. 9Bdu' riiñ yaa de yu nu nac moz nu gzuub gyidag dey ni patro̱o̱ niy nu nac dela mandaar nu ricy yu loy. Gyicy yu tub mod nu gyet lagy patro̱o̱ niy. Nunu cue' tush cyay riidz loy. 10Nunu cue' gyicy gubaan yu la coz niy, sinu rlagy ñi nu gyicy yu tub mod nu gabe nu tona' la nac yu mbecy nap, gun orze' dela mbecy zac dey nu dzi cyit na de riidz ni Ñgyoozh, biñ nu bloo mbañ de ub na. Laab de nde' de riidz nu rlyuu den. 11Tees Ñgyoozh bi briic mi nu gad lagy den la na faboor nu gyicy num de mbecy. Nu nac faboor ze' gad mod nu gruu mbañ dela mbecy. 12De riidz ni faboor ni Ñgyoozh ze' rlyuuñ ni den nu rlagy ñi nu laa yaa den de coz a̱' nap, gal nu de gusht a̱' nap nu yu' gyishlombecy ii. Orze' lat nu rcyiiñ den gyishlombecy ii rlagy ñi nu nap gyicy den mandaar ub na. Nunu rlagy ñi nu gyicy den de coz nu se'ñ. Nunu rlagy ñi nu zu den shcab nu nac coz ni Ñgyoozh. 13Orze' lat nu rcyiiñ den gyishlombecy ii, grish lo den nu shuub tiem nu gyu' niñ gal nu mnii Ñgyoozh. Ni gac ñii ornu cyid Jesucrisht tuuba' tir nu gyel lily nim. Mi ze' nac mi Ñgyoozh ni den gal nu biñ nu co mbañ den. 14Mi ze' pshet ic mi gut mi par nu briish mi cyi den, gun orze' bicy mi nu bruu chu den lo de cyi nu ricy na. Nunu bicy mi nu byacaacy nap lan lo Ñgyoozh, gun orze' gac na mbecy nim. Gac na mbecy nu ric la añ ni lo de coz nap. 15De nu nii rlagy ñi nu lyuur ni mbecy. Cuic ru baloor ni dey. Nunu shuu nur dey gal nu ricy mbecy nu ricy cup rishbeey. Cue' shet ic ru nu nii mbecy nu ru wacyiiñ ru.

will be added

X\