Tito 1

1Ya̱ Baly tub yu nu ricy coz nu rlagy Ñgyoozh. Nunu naca̱ aposht ni Jesucrisht. Mi ze' bzuu nez mi ya̱ nu cha̱ lat de mbecy nu blosu Ñgyoozh, gun orze' locyuuba̱ dey nu fert gyicy cup yu consuel lom, nunu gad lagy dey de coz rishli nu ricy den nu nac Ñgyoozh. 2Ni ricy den nu nac nu drish lon nu gad nu cui mbañ den tub la. Ñgyoozh bi mne' ic mi nu cui mbañ den nese anzir nu gzub gyi' gyishlombecy. Nunu mi ze' waguum. 3Nunu na la, tiem niñ, bi briic mi nu gad lagy den ni de riidz nim. Ni bicy Ñgyoozh, biñ nu co mbañ de ub na, nu nac de riidz nu bdu'm ya̱a̱ nu shaala̱ lat de mbecy. 4Orze' ya̱ ca̱a̱ gyicy ii nu zeeda̱ lo ru Tit. Ru nac ru tub yu feñ ne̱ nu rishli nu nac de coz ni Crisht, de coz nu rup laan ricy cup na consuel lo. Orze' Ñgyoozh Uz den nu Jesucrisht, biñ nu co mbañ de ub na, gyicy dem faboor nu nap gyicy num ru, nunu gyicy dem nu cheti ri añ nir. 5Ornu ya̱ bzeeña̱ ru lo tub nac yu nu la Creta nu ri lo nisyudoo, orze' ni bicya̱, gun orze' gzu nap ru de coz nu ricy falt nu duzu nap, nunu orze' tub ga la gyedz co sur mbecy nu gac yu yu bel lat de mbecy ni Crisht dub gal mod nu ya̱ mne̱e̱ lor. 6Orze' yu nu gac yu bel rlagy ñi nu cyiiñ yu tub mod nu cue' la griib mbecy cyi tooy. Nunu rlagy ñi gac yu mbecy nu ricy paa nu tub zi'l biñ nu nac mñaay. Nunu ni' zi'l de i'ñ yu rlagy ñi nu gac yu mbecy nu ricy cup consuel lo Crisht. Nunu cue' nu nii mbecy nu i'ñ yu nac yu mbecy gurfeñ o mbecy nu rnid ru'. 7Orze' yu bel nu riib ic lat de mbecy ni Crisht, rlagy ñi nu gac dey mbecy nu sac falt ni, como de yu ze' zuy riiñ ni Ñgyoozh. Cue' nu gac dey mbecy cyigy too. Ni cue' nu gac dey mbecy dza' ic. Ni cue' gac dey mbecy rzugy. Ni cue' gac dey mbecy balient. Nunu ni cue' nu dzi ye gzac dey lo tiñ. 8Lugaar nu ni na dey gac yu, orze' rlagy ñi nu nap nii nu dey mbecy ornu cyid yu yu'y. Nunu rlagy ñi nu gyet lagy dey de coz nap. Nunu gac dey mbecy nu nap na shcab ni. Nunu gac dey mbecy nap. Nunu gac dey mbecy nu zu par Ñgyoozh zi'l. Nunu rlagy ñi nu nap gyicy yu mandaar ub yu. 9Orze' rlagy ñi nu gzu fert yu nu nac de riidz rishli ni Ñgyoozh nu bdulyuu niy, gun orze' ni' zi'l gac cuic yu baloor ni losa'y nu nac de riidz ze', nunu gac cuugy yu lardoo de mbecy nu rnii reña' raso̱o̱. 10Gun yu' zigy mbecy nu zay contr ni de riidz ni Ñgyoozh. Gun laab lat dey yu' mbecy nu rzu fert yu nu ca beey sircunsision cuerp ni de mbecy ni Crisht. De yu ze' riidz ton zi'l rnii dey, nunu rguu dey losa'y. 11Rlagy ñi nu soow den ru' de mbecy ze', gun ricy dey nu rcan shcab ni dub yu' la mbecy. Rlyuu dey coz nu a̱' yad ñi niy nu lyuuy nu nac nu ye rzac dey lo de coz nu rbic mbecy niy. 12Bzu tub mbecy nu bicy yu nu mniiy por cuen ni Ñgyoozh. Nunu laab mbecy Creta nac yu. Orze' yu ze' bzat yu de losa'y. Orze' nay: “De mbecy Creta dub laa tiem rguu dey. Na dey gal nu na bañ gyish. Row shaad dey. Nunu nac dey mbecy zed”, nay. 13Nunu laab ni gal nu mnii yu ze'. Nde' nu fert pshuu nu dey. Gun orze' gyanap consuel nu ricy cup dey lo Crisht. 14Gun orze' cue' ga' nu gyicy cuen dey de rishtoo nu bloo ic de mbecy Israeel. Ni cue' gyicy cuen dey mandaar nu ricy de mbecy nu bruu chu lo de coz rishli ni Ñgyoozh. 15Gun benu ca na mbecy nap na shcab niy, orze' dela coz nu ricy yu, nde' coz cacy par lo Ñgyoozh. Tees de mbecy nu wayicy cup consuel lo Crisht nunu benu a̱' nap na shcab ni dey, orze' par de yu ze' saca' coz nap par lo Ñgyoozh. Gashtal shcab nu ricy cup dey gubag ñi. Nunu wagat lo dey nu nac coz a̱' nap nu ricy yu. 16Rnii dey nu yu' loy Ñgyoozh, tees nu nac coz nu ricy dey rabee nu walab rishli. Nac dey mbecy rzi lagy. Nunu nac dey mbecy nu wacsuub gyidag. Rila wacyiiñ dey nu gyicy yu ni tub la coz nap.

will be added

X\