Romanos 9

1Na rne̱e̱ lo der tub coz rishli: ya̱ wagu̱u̱ de ru, como naca̱ mbecy ni Crisht. Espiriit Yon ni Ñgyoozh, mi ze' riib ic mi nañ lardo̱o̱, nunu ya̱ rad lagya̱ nañ lardo̱o̱ nu wagu̱u̱. 2Ya̱ tona' la ricy shni. Dub laa tiem rac nañ lardo̱o̱ nu nac de losa̱'. 3Gun ya̱ rsa' lagya̱ nu nap zir benu zaa lagy Ñgyoozh ne̱, nunu nap zir benu gla' losa̱' nu Crisht, benu nde' gyicy ñi nu locyuub Ñgyoozh de bicya̱, de yu nu nac losa̱'. 4De yu ze' nez mbecy Israeel. Ñgyoozh bicy mi dey par i'ñ mi. Nunu nash dey gyel lily nim. De yu ze' bicy mi trat num dey. Yaa de yu ze', bzeeñ mi leey ni Moisees. Lo de yu ze', mniim lac mod riib zily mbecy mi. Nunu mniim nu segur la zañ lo coz nap gyicy num dey. 5De yu ze' nac dey nez de yu lily nu gu' gulas. Crisht gush mi nez dey ornu byac mi mbecy gyishlombecy ii, nunu mi ze' Ñgyoozh, biñ nu riib ic dela coz. Gyabic den gyel mbecy nim par tub la. Laab ni gac ñii. 6Tees Ñgyoozh waded la ricy yac mi de riidz nu mniim nu segur la gyicy mi. Gun walab dela mbecy Israeel nac yu mbecy Israeel nu rishli. 7Nunu walab dela mbecy nez Abraham nac yu i'ñ Abraham nu rishli, gun Ñgyoozh mniim lo Abraham: “De i'ñ Isaac, de yu ze' nez ru”, nam. Orze' Ñgyoozh wangyicy mi de' zir i'ñ Abraham par nez yu. 8Nde' yaruuñ nu ni tub la mbecy a̱' nac yu i'ñ Ñgyoozh nu nac nez zi'l yu, sinu de yu nu byac i'ñ Ñgyoozh nu nac de riidz nu mniim nu segur la gyicy mi, dey yu ze' zi'l gyicy mi dey par i'ñ mi nu rishli. 9Gun ni mod za riidz nu mnii Ñgyoozh lo Abraham. Orze' nam: “Ornu shuub tiem, ya̱ yapa̱, gun orze' gyicya̱ nu gaal Sara tub mdoo gyeey”, nam rab mi Abraham. 10Nunu walab nde' zi'l bicy mi, gun zu cyup i'ñ Rebeca tees tub zi'l uz dey. Uz de yu ze', nde' gyitoo bel ni den Isaac. 11- 13Tees anzir nu gal dey, Ñgyoozh mniim lo Rebeca: “Yu mi', yu ze' gyicy yu mandaar yu gush”, nam. Ni mniim mas nigul gal dey, nunu nigul gyicy dey ni tub la coz: ni coz nap, ni coz a̱' nap. Ni' riidz ii gyap ñi tuuba' riidz ni Ñgyoozh, ornu nam: “Ya̱ rca̱ Jacob, tees rzi lagya̱ lo Esaú”, nam. Orze' Ñgyoozh gac cuim ca na mbecy nu rlagy mi par nu gac nim. Nunu ornu ni ricy mi, orze' nde' walab nu nac nu la na tub coz nu ricy dey. 14Beni, dzi ga gruu su tub mbecy nu niiy nu Ñgyoozh wagyicy mi de coz nu se'ñ. ¡Rila walab ni! 15Gun Ñgyoozh mniim lo Moisees: “Ya̱ nap gyicy du̱ ca zi'l na yu nu rlagya̱, nunu gashni ga' lagya̱ ca zi'l na mbecy nu rlagya̱”, nam. 16Orze' benu Ñgyoozh nap ricy num tub mbecy, nde' walab nu nac nu ni rlagy mbecy ze', nunu ni walab nu nac nu dzi rboo loy, sinu nu nac nu rashni lagy mi yu. 17Gun riidz ni Ñgyoozh rzat ñi rey Faraón. Orze' rniiñ: “Ya̱ bicya̱ nu nac ru rey ni de mbecy Egipto, gun orze' gabe nu ya̱ gac gyicya̱ de coz ily nu nac de coz ily nu gyicy du̱ ru, gun orze' riib zily dela mbecy nu yu' gyishlombecy ya̱”, nam. 18Orze' Ñgyoozh rashni lagy mi ca na mbecy nu rlagy mi. Nunu ni' zi'l gac gyicy mi nu gyacyigy lardoo ca na mbecy nu galagy mi. 19Cyup ridz ruu su tub mbecy lat der nu niiy: “Benu ni, ¿lagu griib Ñgyoozh cyi ic mbecy?” niiy. “Mi ze' se cyu la gac gyicy gan mi, nunu se cyu la gac gyicy de coz benu ub mi walagy mi”, niiy. 20¡A̱ mbecy! ¿Cyu guc ru par nu niir lo Ñgyoozh lac mod rlagy ñi? Ru nar gal nu na tub gyis. ¿A gac nii tub gyis lo mbecy nu bzaañ: “¿Lagu ni mod bzaar ya̱?” niiñ? 21Tees mbecy nu rzaañ gac gyicy yu lac zi'l mod nu galagy yu nu gyicy nuy biñ. Gac zaay cyup gyis laab nu tub zi'l biñ. Zaay tub gyis cyit na par nu gabish riiñ lañ par tub gasht. Ze' tuuba'ñ zaay ñi par nu cyiiñ ñi la zi'l tiem nu galagy yu. 22Gal nu ricy mbecy nu rzaa gyis, ni' zi'l gac gyicy Ñgyoozh num mbecy. Rlagy mi cuic mi nu gad lagy den la na cashtig nim, gal nu de coz ily nu gac gyicy mi nu nac mod nu ricy num tub nac mbecy. Tona' la bicy cup mi pase̱z ni dey, tees de yu ze' bicy dey nu guzi lagy mi loy, nunu yad ñi ni dey nu nit loy. 23Tees bicy cup mi pase̱z ni dey, gun orze' gad lagy tub naca' de ub na nu dzi coz ily gyel lily nim. Orze' nac naa mbecy nu gushni lagy mi. Nunu nese gulas bi bzu lily mi den par nu gzac na lo gyel lily nim. 24Gun de ub na nac naa mbecy nu bzum nu gac nim. Nunu yu' mbecy lat na nu nac yu mbecy Israeel. Ze' yu' ga' dey nu a̱' nac yu mbecy Israeel. 25Ni mod za tub riidz nim lat de riidz nu bzeeñ Oseas. Ze' rniiñ: Ñgyoozh nam: “De mbecy nu walab mbecy ne̱, de yu ze' ya̱ ne̱e̱ nu nac dey mbecy ne̱. Nunu de mbecy nu wanca̱, ya̱ ne̱e̱ lo dey nu ya̱ rca̱ dey, ne̱e̱”, nam. 26Nunu laab lugaar ze' nu mne̱e̱, ze' rniiñ: “De ru walab mbecy ne̱”, rniiñ, orze' lugaar ze' gnii dey: “De ru i'ñ Ñgyoozh mbañ”, gnii dey, na Ñgyoozh, rniiñ. 27Ni' lat de riidz nu bzeeñ Isaías rzat ñi de mbecy Israeel. Ze' rniiñ: “Mas tona' la mbecy zigy de mbecy Israeel, mas gal nu sheñ yu uzh nu nguaa ru' nisyudoo ni zigy dey, tees ñuu zi zi'l dey gruu mbañ yu. 28Gun Ñgyoozh dzach za' lom de coz nu mniim nu gac gyishlombecy”, rniiñ. 29Nii nañ gal nu na nu mnii Isaías anzir, ornu nay: Bicy na nu Ñgyoozh, biñ nu rac ricy dela coz, cue' nzeeñ mi la be mbecy nez Israeel, orze' ñgyac den gal nu na' de mbecy nu gu' gyedz Sodoma, nu de mbecy nu gu' gyedz Gomorra, na Isaías. 30Orze' ¿lac ñuu niin? De mbecy nu walab mbecy Israeel, mas wanyub dey mod par nu gyanap dey par lo Ñgyoozh, tees na byanap dey lom nu nac nu ricy cup dey consuel lom. 31Ze' de mbecy Israeel byub dey tub mod nu gyanap yu lom nu nac nu ricy yac dey ni leey, tees wangyicy dey gan. 32Wangyanap dey lom, gun wanyub dey mod nu rlagy mi. Mod ze', nde' nu gyicy cup dey consuel lom. Tees byub dey tuuba' mod nu gyanap yu lom. Rlagy dey gyanap yu lom nu nac de coz nu bicy de ub yu. Jesucrisht nam gal na tub gyita', nunu de mbecy Israeel blagy gyi' dey too gyita' ze'. 33Ni mod za tub riidz ni Ñgyoozh ornu nam: Gyedz Sión ze' risha̱ tub gyita' nu glagy gyi' mbecy, tub gyita' nu gyicy ñi nu gyesaa dey. Yu nu gyicy cup consuel lo biñ nu nac gyita' ze', rila washi'ñ yu baloor, gun walab nu leew bicy cup yu consuel lom, rniiñ.

will be added

X\