Romanos 8

1Ñgyoozh rila wanii ga'm nu yu' falt ni de mbecy nu nac nu Jesucrisht. 2Gun ya̱ bi naca̱ ni leey nu rniiñ nu riib ic Espiriit Yon ni Ñgyoozh, nunu leey ze' gyicy ñi nu cui mbaña̱ nu nac Jesucrisht. Orze' nu nac leey ze' ya̱ bi bruu chu̱ lo reña' leey nu rnii nu riib ic cyi ya̱. Leey ze' gyicy ñi nu gat na. 3Gun yu' coz nu wangac ñgyicy leey ni Moisees nu nac nu wangagyee mbecy. Tees Ñgyoozh guc bicy mi de coz ze', gun bzuu nez mi I'ñ mi, Jesuuz. Orze' mi ze' gush mi tub mod gal nu na tub mbecy cyi. Ni bicy Ñgyoozh nu nac cyi den, gun orze' za' lom de cyi nu yu' nañ lardoo de mbecy. 4Ni bicy mi, gun orze' gac gyicy den de coz nap nu rnii leey ze', como nac naa mbecy nu ricy coz nu rlagy Espiriit Yon nim, nunu walab nu nac naa mbecy nu ricy coz nu rlagy ub zi'l. 5De mbecy nu ricy de coz nu rlagy ub zi'l, de yu ze' rzu bich dey nu nac coz ni mbecy zi'l. Ze' de yu nu ricy de coz nu rlagy Espiriit Yon nim, rzu bich dey nu nac de coz nu rlagy Espiriit Yon zi'l nim. 6Benu zu bich den nu nac de coz nu rlagy ub zi'l den, orze' gat den. Tees benu zu bich den nu nac de coz ni Espiriit nim, orze' cui mbañ den nunu chu' den nu gyel ri zu. 7Benu zu bich den nu nac coz ni mbecy zi'l, orze' gyac den losa' yuu Ñgyoozh, gun wagyicy yac den leey nim. Nunu mas rlagy den gyicy yac na niñ tees wagac. 8De yu nu dzi rzac lo de coz ni ub zi'l, wagac gyicy dey nu gyedzu' lagy Ñgyoozh. 9Ze' de ru benu Espiriit Yon ni Ñgyoozh rcyiiñ mi nañ lardoo der, orze' wagyicy der mod nu rlagy ub zi'l ru, sinu ricy der mod nu rlagy Espiriit Yon nim. Cyu zi'l mbecy yu nu a̱' ricy cup Espiriit ni Crisht, yu ze' walab mbecy ni Crisht. 10Benu Crisht rcyiiñ mi nañ lardoo der, mas ca lo cuen nu gat cuerp ni der nu nac cyi, tees espiriit ni der mbañ ñii nu nac nu byanap der par lo Ñgyoozh. 11Benu Espiriit ni biñ nu bicy nu byabañ Jesucrisht ornu gut mi rcyiiñ mi nañ lardoo der, orze' laab Ñgyoozh, biñ nu bicy nu byabañ Crisht ornu gut mi, gyicy mi nu cui mbañ cuerp nu gat ni der tuuba' tir nu nac Espiriit Yon nim, biñ nu rcyiiñ nañ lardoo der. 12Orze' der bicy na, yu' tub coz nu rlagy ñi nu gyicy den. Nde' walab nu gyicy den coz nu rlagy ub zi'l na, sinu nde' coz nu rlagy Espiriit Yon ni Ñgyoozh. 13Gun benu gyicy der coz nu rlagy ub zi'l ru, orze' gat der. Tees benu Espiriit Yon locyuub mi der nu co chur de coz cyi nu rlagy der gyicy ru, orze' cui mbañ der. 14Gun de yu nu riib ic Espiriit Yon ni Ñgyoozh, de yu ze' nac yu i'ñ Ñgyoozh. 15Gun Espiriit nu briic Ñgyoozh ni der wangyicy mi nu nac der tub moz par nu dzib der tuuba' tir, sinu bicy mi nu byac der i'ñ Ñgyoozh. Nunu ricy mi nu rnii der: “Ñgyoozh, uza̱”, rnii der mi. 16Tub zi'l riidz rnii den nañ lardoon nu Espiriit Yon ni Ñgyoozh ornu rnii den nu nac naa i'ñ mi. 17Nunu como nac den i'ñ mi, orze' dela gyel nap nu mniim nu segur la cuic mi ni de mbecy nim, dela nde' gyiyeeñ ñi yaa den. Nunu gal nu rbic mi ni Crisht, ni' zi'l cuica'm ni de ub na, como gal nu bzac zi Crisht, ni zi'l rzac zi ga' den nu nac mi, gun orze' gal nu guud gyel lily nim, ni' zi'l gad gyel lily ni den dun mi. 18Ya̱ drusha̱ shcab ni de coz nu rzac zi den na wasaap ñi gyel lily nu lyuu Ñgyoozh lo den par lo. 19Gun dela coz nu psa' lagy Ñgyoozh ca looñ nez nu gyeel shuub tiem nu gruu zac de mbecy nu nac I'ñ mi. 20Gun Ñgyoozh bicy mi nu dela coz ze', se la la sac ñi. Walab nu ub de coz ze' bicy ñi nu se la la sac ñi, sinu nde' coz nu bicy Ñgyoozh lat nu rbez mi 21nu dza mod nu na de coz ze'. Mod nu na de coz ze' na, nde' gyicy ñi nu nit loñ. Ze' despuees, orze' gash ñi tub mod nu rila wadeda' niñ. Orze' gash ñi mod nu na de mbecy nu nac I'ñ Ñgyoozh, gun orze' gal nu wanit lo ga' den, ni' zi'l wanit lo de coz ze'. 22Gun rad lagy den nu gashtal dzi na shiñ rzac dela coz nu psa' lagy Ñgyoozh. Rzac ñi gal nu rzac tub biñ mñaa ornu rgaal mi mdoo. 23Nunu walab tub lo zi'l nu shiñ rzac de coz nu psa' lagy Ñgyoozh, sinu ni' de ub na deet rzac den nañ lardoon mas ricy cup den Espiriit Yon nim, biñ nu nac coz loga la nu briic mi ni den. Tona' la deet rzac den lat nu rlez naa par nu shuub dzi nu gyicy i'ñ mi den, nunu lat nu rlez naa par nu gyanap cuerp nin. 24Ñgyoozh bi bloo mbañ mi den nu nac nu drish lo den lom. Tees benu tub mbecy bi bzaac loy lo de coz nu rgyish loy lo, orze' walaba' nu rgyish loy loñ. Ni tub la mbecy wacyish loy lo tub coz benu bi bzaac loy loñ. 25Tees benu drish lon lo de coz nu nigul sac na lo, orze' nu pase̱z lez naañ. 26Ni' Espiriit Yon ni Ñgyoozh locyuub mi den nu nac nu wacyiiñ den. Gun wagad lagy den lac mod nii dun Ñgyoozh gal mod nu rlagy ñi. Tees laab Espiriit Yon nim rnishbaam lom par cuen ni de ub na. Rnishbaam tub mod nu wac gya nu riidz. 27Orze' Ñgyoozh, biñ nu rad lagy de coz nu rlagy mbecy nañ lardooy, rad lagy mi coz nu rnii too Espiriit Yon nim, gun rnishbaa Espiriit Yon nim lom por cuen ni de mbecy nu nac nim. Rnishbaa Espiriit Yon nim gal mod nu rlagy mi. 28Rad lagy den nu la zi'l coz nu rzac mbecy, Ñgyoozh gyicy mi nu gyac ñi tub coz nu nap par de yu ze' benu rca dey mi. Ricy mi nu gyac ñi coz nap benu bzum dey nu gac yu nim gal nu rlagy mi. 29De mbecy nu nil nese anzir bi rad lagy Ñgyoozh nu gac dey nim, de yu ze' nese nu bzub la gyi' gyishlombecy bi pcuim dey nu gyac dey gal nu na I'ñ mi, Jesuuz, gun orze' Jesuuz, mi ze' I'ñ logam nu cuim lat zañ bicy mi. 30Nunu de mbecy nu pcuim nese nu bzub gyi' gyishlombecy, de yu ze' bzum dey nu gac nim. Nunu de yu nu bzum ze', bicy mi nu byanap dey lom. De yu nu byanap ze', de yu ze' bicy mi nu gad de gyel lily nim ni dey. 31Orze' ¿lac ñuu niin beni? Benu Ñgyoozh zam faboor nin, orze' ¿cyu gac cha contr ni den? 32Gun Ñgyoozh wantiily lom. Gashtal I'ñ mi bzeed mi nu gut mi nu nac dela den. Orze' segur la cuic mi dela coz ni den gal nu I'ñ mi. 33Orze' ni tub la mbecy wac riib yu cyi too mbecy nu bi pcuim, gun laab ub la Ñgyoozh mniim nu sac falt ni dey. 34Ni tub la mbecy wac niiy nu yu' falt ni de mbecy nu bi pcuim ze', gun Crisht gut mi, nunu coz ilya' zir guc ornu byabañ mi. Nunu na zub mi par yaa bee Ñgyoozh Uz mi rnishbaam por cuen ni de ub na. 35Orze' ni tub la coz wac gyicy ñi nu checa Crisht nu rcam de ub na. Benu zac zi den, rcam de ub na. Benu deet rzac den, rcam de ub na. Benu rshet zi mbecy den, rcam den. Benu wagad nu don, rcam den. Benu sac shab den, rcam den. Benu yu' den lo rishdzidz, rcam den. Benu gat den, rca ga'm den. 36Rad lagy den nu rzac na lo dela coz ze', gun lat de riidz nim rniiñ: Nu nac ru, dub laa tiem yu̱' de̱ lo rishdzidz nu gata̱. Ricy nu mbecy de̱ gal nu ricy nu dey tub shily nu bi zu lily laa ma nu gat ma, rniiñ. 37Mas ni rzac den, tees ded ru' ga' la nu gyicy den gan nu nac biñ nu rca de ub na. 38Gun ya̱ rad lagya̱ nu segur la ni tub la coz wayicy ñi nu checa Ñgyoozh nu cam de ub na. Benu bi guut na, cam de ub na. Lat nu mbañ naa, rcam den. Ni de anc, ni de nuras gurfeñ, ni de espiriit, dela yu ze' wac gyicy dey nu checam nu cam de ub na. Ni coz nu yu' na, ni coz nu yad par lo, wac gyicy ñi nu checam nu cam den. 39Ni coz nu yu' baa, ni coz yu' gyishlombecy ii, ni ni tub la coz nu psa' lagy mi, wac gyicy ñi nu checam nu cam de ub na. Rad lagy den nu rcam de ub na nu nac de coz nu bzac Shuaan den Jesucrisht.

will be added

X\