Romanos 6

1Orze' dzi ga gruu su tub mbecy nu niiy nu zaab gyicy la den coz cyi par nu gad zir mod nu nap gyicy Ñgyoozh num den, niiy. 2¡Rila walab ni! Par nu nac cyi, na den gal nu na mbecy gut. Orze' cyi wayub ica'ñ de ub na. Orze' ¿walab gaal zaab gyicy la den coz cyi? 3¿Gun a wagad lagy der nu ornu bzu nis den par nu gac den mbecy ni Jesucrisht, orze' ni' zi'l bzu nis den par nu gabe nu gut den gal nu ub mi gut mi? 4Nde' nu ornu bzu nis den, orze' par Ñgyoozh nde' nañ gal nu na nu pcach dey de ub na ornu pcach dey Crisht. Na ornu gut mi, orze' byabaña'm nu nac coz ily nu bicy Ñgyoozh, Uz mi. Orze' gal nu mi ze' byabañ mi, orze' ni' zi'l chu' den tub mod cub nu nac nde'. 5Gun benu na den gal na tub mbecy gut nu nac nu gut mi, orze' ni' zi'l na den gal na tub mbecy nu byabañ nu nac nu byabañ mi. 6Nunu rad lagy den nu bi bya' lo mod nu na den gulas nu nac nu gut mi lo cruuz, gun orze' nit lo dela cyi nu byub ic den. Orze' de cyi ze' wagyuba' ic ñi de ub na. 7Gun ornu tub mbecy gat yu, orze' wayicya' cyi gan yu. 8Nunu benu na den gal na mbecy gut nu nac nu gut Crisht, orze' ni' zi'l rad lagy den nu segur la cyiiñ na dun mi. 9Rad lagy den como byabañ Crisht ornu gut mi, orze' nde' nu rila wata'm. Wazac mi lo gyel gut tuuba' tir. 10Ornu gut mi, tub tir zi'l bruum lo cyi. Na rcyiiñ mi par nu gyicy mi de coz nu rlagy Ñgyoozh. 11Orze' rlagy ñi gyicy den ub na par tub mbecy nu bi bruu chu lo cyi, tees cyiiñ den par nu gyicy na coz nu rlagy Ñgyoozh. Ni gyicy den lat nu chesa dun Crisht. 12Orze' na cue' ga' shet ic der nu gyub ic cyi cuerp nu gat ii ni der, gun benu shet ic der, orze' gyicy der de cyi nu druu nañ cuerp nir tuuba' tir. 13Ni' zi'l cue' shet ic der nu gyicy ru cyi nu ni tub la lugaar ni cuerp nir. Nunu cue' shiñ gyicy der nu ca na tub lugaar ni cuerp nir, sinu bgu' der ub ru yaa Ñgyoozh gal nu yad ñi nu gyicy tub mbecy nu bi byabañ ornu gut. Pshet ic der nu gyub ic Ñgyoozh dutuub la cuerp nir par nu gyicy mi coz nap num ñii. 14Orze' cyi wayuba' ic ñi de ru, gun walaba' nu rcyiiñ der mod ni mbecy nu ricy yac ni leey, sinu rcyiiñ der mod ni mbecy nu ricy yac nu de faboor nu ricy Ñgyoozh nu de ub na. 15Orze' par nu nac nu rcyiiñ den nu nac faboor ni Ñgyoozh lugaar nu gyicy yac den ni leey, orze' dzi ga grusu tub mbecy nu niiy: “¿A gac gyicy den ñuu cyi?” niiy. ¡Rila wac! 16Rishli rad lagy der nu ornu shet ic der nu gyicy ru riiñ nu rnii tub patro̱o̱ nir, orze' nac der moz niy, nunu rlagy ñi nu gyicy yac der nu de riidz nu rniiy. Riidz ii yaruuñ nu gac gyac der tub moz ni cyi. Tees benu ni, orze' gat der. O nu gac gyac der tub moz nu ricy paa nu Ñgyoozh. Benu ni, orze' chu' der tub mod nu se'ñ. 17Tees shnu la Ñgyoozh, gun mas gulas guc der moz ni cyi, tees na rzuub gyidag der nu dutuub la lardoor de riidz nu bdulyuu nu byeeñ yaa der. 18Bi bla der lo de cyi. Orze' na gac der moz ni de coz nu se'ñ. 19(Ya̱ rne̱e̱ riidz ni cualcyer la mbecy, gun de coz ii gyee gyet lag der cuen nu shcab ni ub zi'l der.) Gulas pshet ic der nu gyub ic coz bag, gal nu coz a̱' nap de lugaar ni cuerp ni der. Orze' na rlagy ñi nu shet ic der nu gyub ic de coz nu se'ñ de lugaar ni cuerp ni der, gun orze' gyicy der se de coz nu rlagy Ñgyoozh zi'l. 20Lat nu guc der moz ni cyi, orze' wangyub ic de coz nu se'ñ der. 21Tees ¿la ñuu coz bicy der gan lat nu bicy der de coz to' lo ze'? Se la la coz guud ni der, sinu tub zi la nu gyicy ñi nu gat der. 22Tees na bi bruu der lo de coz cyi, nunu bi nac der moz ni Ñgyoozh. Nunu i der nu rad, nde' nu nac der mbecy nu rzu bich nu nac Ñgyoozh. Nunu ornu gya' lo tiem ii, cui mbañ der tub la. 23Gun i den nu gyabic coz cyi, nde' nu gat na. Tees coz nu leew la rbic Ñgyoozh ni den, nde' nu cui mbañ den tub la nu nac nu nac den mbecy ni Shuaan na Jesucrisht.

will be added

X\