Romanos 5

1Na como byanap den lo Ñgyoozh nu nac nu ricy cup na consuel lom, nde' nu dub gusht la yu' den dun mi. Ni yu' den dun mi nu nac de coz nu bicy Shuaan den Jesucrisht. 2Nu nac mi ze', nde' nu guud mod nu nap ricy nu Ñgyoozh de ub na. Nunu zaab ricy lam coz nap num de ub na. Orze' tona' la yet lagy den nu nac nu drish lon lo gyel lily nim nu cuic mi ni den. 3Nunu walab nde' zi'l, sinu ni' zi'l yet lagy den ornu rzac deet den, gun rad lagy den nu nac nu rzac deet na, orze' gac naa mbecy nu gagye. 4Nunu nu nac nu gagye den, orze' gac naa mbecy nu gruu nap par lo Ñgyoozh. Nunu nu nac nu gruu nap den, orze' grish lon nu gyicy na gan. 5Nunu wacshi'ñ den baloor nu nac nu drish lon nu gyicy na gan, gun Ñgyoozh bicy mi nu gad lagy den nu tona' la rcam de ub na nu nac Espiriit Yon nim, biñ nu rbic mi ni den. 6Gun tiem nu wancyiiñ den nu loo mbañ naa ub na, orze' Crisht gut mi. Ornu pshuub tiem nu bzu Ñgyoozh, gut mi par nu locyuub mi de ub na, mas de ub na nac naa mbecy cyi. 7Par mbecy tona' la biigy nu shet ic yu nu gat yu nu locyuub yu tub losa'y mas mbecy ze' nac yu mbecy cacy. Tees cyup ridz yu' mbecy grusuy nu shet ic yu nu gat yu par nu locyuub yu losa'y gyi' nu nac yu ze' mbecy nap. 8Tees Ñgyoozh briic mi nu gad lagy den nu tona' la rcam de ub na, gun lat nu gabee nac naa mbecy cyi, Crisht gut mi nu nac den. 9Nu nac nu pshu reñ mi, orze' byanap den lo Ñgyoozh. Benu ni, orze' dzi zir gruu mbañ de ub na. 10Gun lat nu nac laa den losa' yuu Ñgyoozh, lat la ze' byanap den dun mi nu nac nu gut I'ñ mi Jesuuz. Benu ni bicy mi lat nu nac naa losa' yuum, orze' na nu bi byanap riidz ni den dun mi, orze' segur zir nu gruu mbañ den nu nac nu mbañ I'ñ mi Jesuuz. 11Tees walab tub lo zi'l nde', sinu ni' Shuaan den Jesucrisht ricy mi nu zu cyit lagy den nu nac Ñgyoozh, gun bicy mi nu byanap riidz ni den nu Ñgyoozh. 12Ornu tub mbecy nu la Adaang bicy yu cyi, orze' gu' cyi gyishlombecy. Nunu nu nac cyi ze' brugyi' nu rat mbecy. Nde' nu dela mbecy rat dey, gun dela dey bicy yu cyi. 13De mbecy ni gyishlombecy nil bicy dey cyi anzir nu zeeñ Moisees leey. Tees lat nu sac leey Ñgyoozh wanriib cuen mi de cyi nu bicy mbecy. 14Nese tiem ni Adaang gashtal tiem ni Moisees, dela mbecy gut dey mas wangyicy yu cyi nu bicy Adaang ornu bicy yu coz nu mnii Ñgyoozh nu cue' gyicy yu. Adaang saap yu Crisht, biñ nu ca lo cuen nu cyid. 15Tees reña' nay par mi ze'. Gun coz nap nu leew la briic Ñgyoozh, nde' wasaap ñi cyi nu bicy yu. Rishli zigy mbecy gut yu nu nac cyi nu bicy tub zi mbecy. Tees coz ily zir ricy Ñgyoozh ornu nap ricy num zigy mbecy, nunu coz ilya' zir ricy mi ornu briic mi coz nap ni dey nu nac tub zi mbecy. Nde' Jesucrisht. 16Coz nu leew la briic Ñgyoozh ze' nu coz nu bicy Adaang ze', walab tub zi'l nañ. Gun despuees ornu bicy Adaang coz cyi tub tir, orze' Ñgyoozh mniim nu gu' falt ni de mbecy. Orze' rlagy ñi nu cha dey lo cashtig. Tees mas ricy mbecy cyi zañ tir, tees Ñgyoozh mniim nu byanap dey lom nu nac coz nu leew la briic mi ze'. 17Rishli nu nac cyi nu bicy tub zi mbecy ze', nde' nu bzub gyi'ñ nu gat dela mbecy. Tees coz ily zir bicy tuuba' mbecy. Mi ze' Jesucrisht. Nu nac mi ze' Ñgyoozh ricy mi faboor ily num dela mbecy, nunu nu nac mi ze' ricy mi nu leew la gyanap dey lom. Nunu de yu nu ni ricy num, de yu ze' gyicy yu gan cyiiñ yu tub mod nap gyishlombecy ii. 18Orze' nu nac cyi nu bicy tub mbecy nu la Adaang, yad ñi nu cha dela mbecy lo cashtig. Ni' zi'l nu nac coz se'ñ nu bicy tuuba' mbecy, mi ze' Jesucrisht, orze' bruu dela mbecy nu ricy cup consuel lom lo cashtig, nunu cui mbañ dey tub la. 19Dela mbecy byac dey mbecy cyi nu nac tub zi Adaang, yu nu wansuub gyidag ni Ñgyoozh. Orze' ni' zi'l mod, zigya' mbecy gyanap yu lom nu nac tuuba' mbecy nu bicy yac de coz nu rniim. Mi ze' Jesuuz. 20Ñgyoozh briic mi leey ni Moisees, gun orze' byañ zir de cyi nu ricy mbecy. Tees ornu dzi zir bicy de mbecy cyi, orze' coz ily zir bicy Ñgyoozh ornu bicy mi faboor num dey. 21Nde' nu gal nu cyi dzi fert bicy nuñ de mbecy, orze' ni' zi'l fert bicy Ñgyoozh num dey. Gun cyi bicy ñi nu gat mbecy. Tees Ñgyoozh bicy mi faboor num dey ornu bicy mi nu gyanap dey lom. Orze' nu nac nde' cui mbañ dey tub la. Ni bicy mi nu nac Shuaan den Jesucrisht.

will be added

X\