Romanos 3

1Dzi ga grusu tub mbecy nu niiy: “¿La ñuu cyiiñ ñi ni tub mbecy benu nac yu mbecy Israeel? ¿La ñuu cyiiñ ñi niy benu ca bee sircunsision cuerp niy?” niiy. 2Ca ni gaal cyiiñ ñi, gun Ñgyoozh bzeeñ mi riidz nim yaa de mbecy Israeel. Nunu nde' coz nu ricy zir ñi presis. 3Yu' mbecy nu wangyicy paay, tees se la la nu nde'. Par nu nac nde', ¿a wagyicy paa Ñgyoozh, rzii der? 4Ñgyoozh segur la ricy paam. Mas dela mbecy rguu dey, tees mi ze' segur la ricy yac mi gal nu rniim, gun lat de riidz nim rniiñ: Ñgyoozh, ru segur la gad lagy mbecy nu rishli rniir. Ornu mbecy cugyi'y ben a rishli rniir, segur la gruu nap ru, rniiñ. 5Tees dzi ga grusu tub mbecy nu niiy: “Benu de ub na shiñ gyicy na, orze' nap zir rad lagy mbecy nu Ñgyoozh nap ricy mi. Orze' ¿a shiñ ricy mi ornu rbic mi cashtig nin?” (Ya̱ rne̱e̱ mod nu rnii cualcyer la mbecy. ) 6Rila a̱' shiñ ricy mi. Benu wagyicy mi coz nu se'ñ, orze' ¿lac mod gri beem ni de mbecy nu yu' gyishlombecy? 7Beni orze' dzi ga grusu tub mbecy nu niiy: “Benu ya̱ gu̱u̱, orze' nap zir rabee gyel lily ni Ñgyoozh, gun mi ze' rishli rniim. Orze' ¿lagu gaal nu dzi rniim nu ya̱ naca̱ mbecy cyi? 8Dela den rlagy ñi nu gyicy na coz a̱' nap, gun orze' gruu zac coz nap”, rnii dey. Yu' mbecy nu rnii ziy ne̱. Rnii dey nu ni mod za riidz nu rlyu̱u̱. Ñgyoozh nap ricy mi ornu rniim nu yu' falt ni dey. 9Orze' ¿lac beni? ¿A nap zir nu nac de ub na mbecy Israeel gaze' tub naca' mbecy? ¡Walab! De ya̱ bi pshaala̱ lo der nu de mbecy Israeel gal nu de mbecy nu walab mbecy Israeel, tub zi'l nu yu' cyi dey. 10Ni rnii riidz ni Ñgyoozh ze' nu rniiñ: ¡Par Ñgyoozh, sac ni tub mbecy nap! ¡Sac ni tub yu! 11Sac mbecy nu yet lag cuen de coz ni Ñgyoozh. Ni sac yu nu ryub Ñgyoozh. 12Dela mbecy bruu chu dey lo Ñgyoozh. Dela dey gudzay. ¡Rila sac yu nu ricy coz nap! ¡Sac ni tub yu! 13Shiñ na ru' dey. De riidz nu driib gyeryeñ dey tona' la bag nañ. Nañ gal nu na tub gyerbaa nu naal ru'. Nu lyudz dey rguuy. Du ub riidz dañ zi'l driib lo gyid ru' dey. Nañ gal nu na benen ni bily. 14Zaab rzaa la lagy dey ni losa'y. Nunu zaab rnii la dey riidz a̱' nap. 15Dzach zu dey par nu cut yu losa'y. 16Dela ze' nu rded dey, rnu dey, nunu rzac deet dey. 17Wagad lagy dey lac mod par nu nap chesa nu dey losa'y. 18Wagnii la too dey nu ca lagy yu lo Ñgyoozh, rniiñ lat de riidz nim. 19Na rad lagy den nu dela coz nu rnii leey nu bzeeñ Moisees, nde' par de mbecy nu riib ic leey ze', gun orze' checa de mbecy nu rniiy lagu nu sac falt ni dey, nunu nu nac leey ze' nii Ñgyoozh nu yu' falt ni dela mbecy nu yu' gyishlombecy. 20Gun sac ni tub mbecy nu gyanap yu par lo Ñgyoozh nu nac nu gyicy yac yu ni leey ze', sinu leey ze' cyiiñ ñi par nu gad lagy dey nu yu' cyiy. 21Tees na Ñgyoozh rbic mi nu gad lagy den lac mod gyanap na lom, nunu mod ze', nde' walab nu nac nu ricy yac den ni ca na tub leey. Tees de riidz ni leey, gal nu de riidz ni de yu nu mnii por cuen ni Ñgyoozh rzat ñi mod ze'. 22Ñgyoozh gyicy mi nu gyanap den lom nu nac nu gyicy cup den consuel lom. Ni gyicy num dela mbecy nu gyicy cup consuel lom, gun dela mbecy tub zi'l mod nu na dey. 23Gun dela mbecy bicy dey coz cyi, nunu a̱' yad ñi ni dey nu zac yu lo gyel lily nim. 24Tees leew la ricy mi faboor num den nu gyanap na lom, nu nac Jesucrisht, biñ nu briish cyi den. 25Ñgyoozh bzuu nez mi Jesucrisht, gun nu nac nu pshu reñ mi, orze' bicy sulagy mi dela cyi den. Ni bicy mi par dela den nu nac nu ricy cup den consuel lom. Ñgyoozh bicy mi nde' par nu gabe nu dzi se'ñ ricy mi. Gulas Ñgyoozh bicy cup mi pase̱z num den, nunu wangyicy cuen mi cyi nu bicy den. 26Tees na za' lom dela cyi mbecy, gun orze' gabe nu se'ñ ricy mi, nunu rzu nap mi de mbecy nu ricy cup consuel lo Jesuuz. 27Orze' wad la mod nu gyicy lily mbecy ub yu. Orze' ¿lagu? Nde' gun gyanap dey par lo Ñgyoozh walab nu nac nu gyicy yac dey coz nu rnii leey, sinu nu nac nu gyicy cup dey consuel lo Jesuuz. 28Orze' nde' nu rad lagy den nu de mbecy gyanap dey lo Ñgyoozh tub lo zi'l nu nac nu gyicy cup dey consuel lo Jesuuz, nunu walab par nu nac nu gyicy yac dey nu de coz nu rnii leey. 29Ñgyoozh, ¿a nac mi Ñgyoozh ni de mbecy Israeel zi'l? ¿A walab nu naca'm Ñgyoozh ni de mbecy nu walab mbecy Israeel? Rishli gaal nac mi Ñgyoozh ni dela mbecy nu walab mbecy Israeel. 30Gun sac cyu' zir, sinu tub zi la Ñgyoozh. Nunu gyicy mi nu gyanap de mbecy nu ca beey sircunsision cuerp ni lom nu nac nu gyicy cup dey consuel lo Jesuuz. Ni' zi'l de mbecy nu wanca beey ze' cuerp ni, gyanapa' dey lom nu nac nu gyicy cup dey consuel lom. 31Orze' beni, ¿a rlagy ñi nu ne' den leey ze' nu nac nu gyicy cup na consuel lo Jesuuz? ¡Walab! Lugaar nu ne' den leey ze', rlagy ñi nu nap zir gyicy dun ñii.

will be added

X\