Romanos 16

1Ya̱ gyicya̱ nu cu' lo der zan den Febe nu cyu nac mi. Mi ze' tub biñ nu zu riiñ lat de mbecy ni Crisht nu yu' Cencrea. 2Nap bicy nu der mi nu nac Shuaan den. Bicy nu der mi gal nu yad ñi nu gyicy du den de bicy na nu nac Crisht. Nunu locyuub der mi nu la zi'l coz nu galagy ñi nim, gun mi ze' blocyuub mi zañ mbecy. Mas ya̱ blocyuub mi. 3Ya̱ zeeda̱ ñgyoozh ni Priscila nu ñgyeem Aquila. De yu ze' bicy nuy ya̱ riiñ ni Jesucrisht. 4Wangyicy cuen la dey mas ñgyat yu. Orze' gu' la dey lo rishdzidz nu nac nu bloo mbañ dey ya̱. Ya̱ drica̱ gras ni dey, nunu ni' de mbecy ni Crisht nu walab mbecy Israeel rbic dey gras ni dey. 5Nunu ni' zeeda̱ ñgyoozh ni de mbecy ni Crisht nu yatublaazh nañ yu' ni dey. Ya̱ zeeda̱ ñgyoozh ni amig ne̱ Epeneto. Yu ze' mbecy loga la nu bicy cup consuel lo Crisht lo yu ni Asia. 6Ya̱ zeeda̱ ñgyoozh ni Li, biñ nu fert ricy riiñ lat der. 7Ya̱ zeeda̱ ñgyoozh ni de losa̱' Andrónico nu Junias. De yu ze' losa̱' nu bri du̱ nañ yu' gyiib tublaazh la. Mas de aposht nap yu' lo dey yu. Nunu bicy cup dey consuel lo Crisht anzir nu gyicy cup ya̱ consuel lom. 8Ya̱ zeeda̱' ñgyoozh ni Ampliato. Yu ze' amig ne̱ nu dzi rca nu nac Shuaan den. 9Ya zeeda̱' ñgyoozh ni Urbano. Yu ze' losa'n nu ricy na riiñ ni Jesucrisht. Zeeda̱' ñgyoozh ni amig ne̱ Estaquis. 10Zeeda̱' ñgyoozh ni Apeles. De mbecy bicy dey preb yu ben a ricy paay nu Crisht, nunu bruu nap yu. Ya̱ zeeda̱' ñgyoozh ni de famil ni Aristóbulo. 11Ya̱ zeeda̱' ñgyoozh ni losa̱' Herodión. Nunu zeeda̱' ñgyoozh ni de famil ni Narcis nu ricy cup consuel lo Crisht. 12Ya̱ zeeda̱' ñgyoozh ni Trifena nu Trifosa. De mi ze' rboo lom lat riiñ ni Shuaan den. Nunu zeeda̱' ñgyoozh ni zan den nu nac Crisht Pérsida. Ni' zi'l mi ze' tona' la bloo lom lat riiñ ni Shuaan den. 13Zeeda̱' ñgyoozh ni Rufo. Yu ze' tub mbecy ni Crisht nu dzi raso̱o̱. Nunu zeeda̱' ñgyoozh ni ñaay. Mi ze' nam gal na tub ña̱a̱. 14Nunu zeeda' ñgyoozh ni Asíncrito. Zeeda̱' ñgyoozh ni Flegonte. Zeeda' ñgyoozh ni Hermes. Zeeda̱' ñgyoozh ni Patrobas. Zeeda̱' ñgyoozh ni Hermas. Nunu zeeda̱' ñgyoozh ni de bicy na nu rded nu de yu ze'. 15Zeeda̱' ñgyoozh ni Filólogo. Zeeda̱' ñgyoozh ni Julia. Zeeda̱' ñgyoozh ni Nereo. Zeeda̱' ñgyoozh ni zan yu Olimpas. Nunu zeeda̱' ñgyoozh ni dela bicy na nu nac Crisht nu rded nu de yu ze'. 16Tub ga la der nap nii nu der losa'r. Dela mbecy ni Crisht nu yu' reña' lugaar zeed dey ñgyoozh ni der. 17Der bicy na, ya̱ rnishba̱a̱ lo der nu gyicy cuidad der nis cyiid mbecy nu gyicy yu nu tub su der losa'r, nis cyiid de yu nu gyicy nu can shcab ni der nu nac de coz ni Crisht. De yu ze' rza dey contr ni de riidz nu bdulyuu ni der. Bruu chu der lo de yu ze'. 18Gun de yu ze' wagyicy dey coz nu rlagy Shuaan den Jesucrisht, sinu coz nu rlagy ub zi'l dey ricy yu. Tona' la nap za riidz nu rnii dey, nunu ryabic dey gyel mbecy ni mbecy, gun orze' rguu dey de mbecy nu dzi ton na. 19Dela mbecy rad lagy dey nu tona' la nap rzuub gyidag der ni Crisht, nde' nu ya̱ dzi yet lagya̱ nu nac de ru. Ya̱ rlagya̱ nu gyicy cup der shcab par nu gyicy der coz nap, tees cue' par nu gyicy der coz a̱' nap. 20Benu ni, orze' Ñgyoozh, biñ nu gyicy nu cheti ri añ ni der, mi ze' sñuu ga cyich ñgye'm nuras. Gabish yu yeñ gyi' der. Shuaan den Jesucrisht nap gyicy num der. 21Timoteo zeed yu ñgyoozh ni der. Yu ze' losa̱' nu bicy du̱ riiñ. Ni' zi'l de losa̱' Lucio, Jasón, Sosípater, de yu ze' zeed dey ñgyoozh ni der. 22Ya̱, Tercio, yu nu pcaa lo gyicy ii de riidz nu mnii Baly, zeeda̱' ñgyoozh ni de ru nu nac Shuaan den. 23Gayo, yu nu briic yu' nu cyiiña̱, yu ze' zeeda'y ñgyoozh ni der. Nañ yu' yu ze' ryatublaazh de mbecy ni Crisht. Erasto, yu nu nac tesorer ni gyedz, yu ze' zeeda'y ñgyoozh ni der. Nunu bicy na Cuarto zeeda'y ñgyoozh ni der. 24Shuaan na Jesucrisht nap gyicy num der. Laab ni gac ñii. 25Orze' rlagy ñi gyabic den gyel mbecy ni Ñgyoozh, gun mi ze' gac cuic mi fers ni den nu nac de riidz nu sac nim, nu rshaala̱ lo der. Riidz ze' rniiñ coz ni Jesucrisht, nunu saap ñi de riidz nu wangad lagy mbecy gulas tees rshaal ñi coz nu psa' lagy Ñgyoozh nese anzir nu bzub gyi' gyishlombecy. 26Tees gal na rad lagy den nu nde' nac ñii de riidz ni de yu nu mnii por cuen ni Ñgyoozh. Na rad lagy de lo la mbecy de riidz ze' nu nac nu ni bi mnii Ñgyoozh, biñ nu zu tub la, gun orze' gac gyicy yac dey niñ nunu gyicy cup dey consuel lo Crisht. 27¡Tub zi la Ñgyoozh, mi ze' laab mi, nunu tub zi la mi ze' rad lagy mi dela coz! ¡Mi ze' zi'l rlagy ñi nu gyabic den gyel mbecy nim tub la nu nac Jesucrisht! Laab ni gac ñii.

will be added

X\