Romanos 15

1Orze' de ub na, mbecy nu rad lagy nap de coz ni Crisht, rlagy ñi nu locyuub den losa'n ornu wagad lagy nap dey. Walagy ñi gyicy den coz nu rlagy ub zi'l na, 2sinu tub ga la den rlagy ñi gyicy na coz nu gyet lagy losa'n. Rlagy ñi gyicy den coz nu nap par de yu ze', gun orze' gyafert dey nu nac de coz ni Crisht. 3Gun mas Crisht wangyicy mi coz nu rlagy ub zi'l mi, sinu bicy mi nu byu' niñ gal nu rniiñ lat de riidz ni Ñgyoozh ze' nu rniiñ: “De riidz nu mnii zi mbecy nir, nde' bgoñ to̱o̱ ya̱, na Mesías rab mi Ñgyoozh”, rniiñ. 4Tees dela riidz nu byeeñ gulas lat de riidz ni Ñgyoozh, byeeñ ñi par nu lyuuñ ni den, gun orze' riidz ze' gyicy ñi nu gagye den, nunu cuic ñi baloor ni den. Nunu nu nac nde' grish lo den nu ruu nap na. 5Nunu Ñgyoozh, biñ nu gyicy nu gagyen, biñ nu rbic baloor ni den, mi ze' locyuub mi de ru nu gyicy der tub zi'l shcab nu losa'r. Locyuub mi der nu gyicy der gal nu bicy Jesucrisht. 6Gun orze' nu tub zi'l shcab, nunu tub zi'l tiem gyabic den gyel mbecy ni Ñgyoozh, Uz Shuaan den Jesucrisht. 7Orze' pshet ic der nu chu' mbecy lat der gal nu Jesucrisht pshet ic mi nu chu' den lom. Ni bicy mi par nu gabe nu Ñgyoozh dzi lily nam. 8Gun riidz nu rne̱e̱, nde' nu Crisht byac mi tub biñ nu rzu bich nu nac de mbecy Israeel, gun orze' za' lom dela riidz nu mniim lo de gyitoo bel ni dey nu segur la gyicy mi. Orze' rabee nu Ñgyoozh ricy yac mi ni de riidz nu rniim. 9Ni' zi'l biid mi, gun orze' de mbecy nu walab mbecy Israeel gyabic dey gyel mbecy nim nu nac nu gushni lagy mi dey, gal nu rnii tub nac riidz nim: Nde' nu ya̱ gyabica̱ gyel mbecy ni Ñgyoozh lat de mbecy nu walab mbecy Israeel, nunu ya̱ dula̱ lor, rniiñ. 10Tub naca' riidz ni Ñgyoozh rniiñ: De ru mbecy nu walab mbecy Israeel, gucyit lagy der nu de mbecy ni Ñgyoozh, rniiñ. 11Tub naca' riidz ni Ñgyoozh rniiñ: De ru mbecy nu walab mbecy Israeel, byabic der gyel mbecy ni Ñgyoozh. Dela de ru mbecy mnii der nu dzi zily nac mi, rniiñ. 12Ni' lat de riidz nu bzeeñ Isaías rniiñ: Cyid tub mbecy nez Isaí. Mi ze' gruu zac mi par nu gyub ic mi de mbecy nu walab mbecy Israeel. Orze' dela mbecy ze' cyish lo dey lom, rniiñ. 13Ñgyoozh, biñ nu drish lo den lo, gyicy mi nu gacyit lagy der, nunu cuic mi gyel ri zu nañ lardoo der nu nac nu ricy cup der consuel lom, gun orze' Espiriit Yon nim gyicy mi nu fert zir cyish lo der lom. 14Der bicy na, ya̱ rad lagya̱ nu de ru ricy za' la der de coz nap, nunu rad lagya̱ nu nap rad lagy der de coz ni Crisht, nunu rad lagya̱ nu cyiiñ der nu lyuur ni de losa'r. 15Tees yu' la be riidz nu pca̱a̱ lo gyicy ii nu fert zañ, gun orze' cue' nit lagy der ñii. Ni bicya̱ nu nac nu Ñgyoozh nap bicy num ya̱ ornu bzum ya̱ riiñ ii. 16Ze' riiñ ze', nde' nu ricya̱ de riiñ ni Jesucrisht lat de mbecy nu walab mbecy Israeel. Nde' nu ya̱ na gal na tub uz nu zu riiñ lugaar nu driib zily mbecy Israeel Ñgyoozh. Orze' rshaala̱ de riidz nu sac ni Crisht lo de mbecy nu walab mbecy Israeel, gun orze' gyac dey gal nu na tub gun nu rbic dey lo Ñgyoozh. Na dey gal nu na tub gun nu “O” niim gash mi, gal na tub gun nu bloo chu Espiriit Yon nu gac ni Ñgyoozh. 17Como nac du̱ Jesucrisht, orze' yet lagya̱ nu nac de riiñ ni Ñgyoozh nu ricya̱. 18Gun ya̱ ricy cuidada̱ de riidz nu rne̱e̱. Tub lo zi'l coz nu bicy Crisht nu nac ya̱, nde' rzata̱ lo de ru. Bicy mi nu rzuub gyidag de mbecy nu walab mbecy Israeel ni Ñgyoozh nu nac de riidz nu mne̱e̱, nunu nu nac de coz nu bicya̱. 19Bzuub gyidag dey nim nu nac nu bzaac dey de nusuriidz nu bicy mi. De nusuriidz ze', nde' par nu gad lagy dey nu laab mi, nunu par nu cha nu ic dey. Nunu bzuub gyidag dey nim ornu bzaac dey de coz ily nu bicy Espiriit Yon nim. Orze' nese Jerusaleeng, gashtal dela lo yu ni Iliria ya̱ pshaala̱ dela riidz nu sac ni Crisht. 20Coz nu rlagya̱, nde' nu shaala̱ riidz nim de lugaar nu nigul gyeñ mbecy de riidz ze', gun orze' cue' cha̱ nu gyicya̱ riiñ ni Crisht ze' nu bi bzuub reña' mbecy gyi' riiñ nim. 21Sinu gal nu rnii riidz nim, ni mod rlagya̱: De yu nu nigul dunii la riidz nim lo, orze' de yu ze' gad lagy dey. De yu nu nigul gyeñ la riidz nim, de yu ze' gyet lagy dey cuen, rniiñ. 22Nu nac nde', orze' wangad la mod nu nyap güi̱i̱ der mas zañ tir ngulagya̱ nu nyap güi̱i̱ der. 23Tees na bi bya' lo riiñ nu ricya̱ lugaar ii. Nunu nil bi rac ña'n rlagya̱ yap güi̱i̱ der. 24Nde' nu drish lo̱ nu gac yap güi̱i̱ der nez nu deda̱ nu cha̱ par España. Na ornu bi bdo ñuun riidz, nunu bi bicy ñuun gusht, orze' ya̱ drish lo̱ nu locyuub der ya̱ nu de coz nu galagy ñi ne̱ nez nu cha̱. 25Tees na gya̱ tub riiñ Jerusaleeng. Gya̱ du̱ tub gun ni de mbecy ni Crisht nu yu' ze'. 26Gun de mbecy ni Crisht nu yu' lo yu ni Macedonia, gal nu de mbecy ni Crisht nu yu' lo yu ni Acaya, de yu ze' mnii too dey nu zeed yu tub gun par nu locyuub dey de mbecy zi nu yu' lat de mbecy ni Crisht Jerusaleeng. 27Mnii too dey nu nap benu ni gyicy yu, nunu laab nde' coz nu yad ñi nu gyicy dey, gun de mbecy Israeel blocyuub dey de mbecy nu walab mbecy Israeel nu nac de coz ni Crisht. Orze' de mbecy nu walab mbecy Israeel rlagy ñi nu locyuub dey de mbecy Israeel nu de coz nu galagy ñi ni dey. 28Na ornu bi za' lo̱' riiñ ze', nunu gyabica̱ de gun ze' yaa dey, orze' cha̱ España. Nez deda̱, orze' zaab lo̱ der. 29Ornu yapa̱, orze' rad lagya̱ nu Ñgyoozh ricy za' lam coz nap num den nu nac Crisht. 30Der bicy na, ya̱ rnishba̱a̱ lo der nu nac Shuaan den Jesucrisht, nunu rnishba̱a̱ lo der nu nac Espiriit Yon ni Ñgyoozh biñ nu rlocyuub den nu caan losa'n. Rnishba̱a̱ lo der nu co lo der tublaazh nu ya̱ ornu cyiñ der lo Ñgyoozh ne̱. 31Cyiñ der lo Ñgyoozh nu cue' zaan mi nu shiñ gyicy nu de mbecy Judea ya̱, de yu nu wagyicy cup consuel lo Crisht. Nunu cyiñ der lo Ñgyoozh nu de mbecy ni Crisht nu yu' Jerusaleeng nu gyet lagy dey riiñ nu cha̱ loy. 32Gun orze' benu Ñgyoozh rlagy mi, orze' tona' la zu cyit lagya̱ ornu yapa̱ lo der, nunu gyag ñuu lagya̱ lat nu cyiiña̱ lat der. 33Ñgyoozh, biñ nu ricy nu zu cyit lagy na, mi ze' nac num der. Laab ni gac ñii.

will be added

X\