Romanos 14

1Benu tub mbecy wagad lagy nap yu de coz ni Crisht, orze' “O” mnii der nu chu'y lat der. Cue' zi go nu der yu riidz nu nac de coz nu rnii tooy. 2Gun yu' mbecy, rnii tooy nu gac gow mbecy la zi'l coz. Ze' yu' ga' mbecy, yu nu wagad lagy nap, rnii tooy nu tub lo zi'l coz gac goy, nde' coz nu rbic ya mni zi'l. 3Mbecy nu row la zi'l coz, walagy ñi nu güii naañ yu lo mbecy nu wagow. Ze' de mbecy nu wagow, walagy ñi nu nii ziy ni de yu nu row, gun Ñgyoozh shet ic mi nu chu' de yu ze' lom. 4¿Cyu guc ru par nu niir nu yu' falt ni moz ni reña' mbecy? Nde' cuen ni patro̱o̱ niy nu gniiy ti gruu nap moz niy o nu waruu nap yu. Nunu segur la gruu nap yu, gun Ñgyoozh cyiiñ mi nu locyuub mi dey nu gruu nap yu. 5Na yu' mbecy nu ricy zily zir dey ca na tub dzi gaze' de' zir dzi. Ze' yu' ga' mbecy nu rnii too dey nu tub zi'l na dela dzi. Tub ga la mbecy rlagy ñi nu nap gad lagy yu mod nu ricy ub yu. 6Mbecy nu ricy zily tub dzi, ni mod ricy yu par nu rca lagy yu lo Shuaan den. Yu nu row la zi'l coz, yu ze' laaba' nu rca lagy yu lom, gun rbic yu gras nim nu nac de coz nu row yu. Mbecy nu walagy gow de coz ze', ni ricy yu par nu rca lagy yu lo Ñgyoozh, nunu ni' rbic yu gras nim. 7Gun sac ni tub la mbecy lat den nu cui mbañ yu nu nac de nu nde', gun nde' coz nu rlagy ub zi'l dey. Nunu sac ni tub mbecy lat den nu gat yu nu nac de nu nde', gun nde' coz nu rlagy laab uba' zi'l dey. 8Benu cui mbañ den, orze' nde' par nu gyicy den coz nu rlagy Ñgyoozh. Nunu benu gat den, orze' gat na gun nde' coz nu rlagy mi. Orze' mas mbañ den o nu gat den, tees nac naa nim. 9Gun Crisht gut mi. Orze' byabañ mi, gun orze' mi ze' nac mi Shuaan de mbecy mbañ nunu nac mi Shuaan de mbecy nu bi gut. 10Orze' a̱' nap benu nii der nu yu' falt ni de bicy ru. Nunu ni' a̱' nap benu güii naañ der lo dey. Gun dela den rlagy ñi nu gyecha'n lo Ñgyoozh par nu gri beem ni den. 11Gun riidz ni Ñgyoozh rniiñ: “Shuaan den nam, segur la ya̱ naca̱ biñ nu mbañ. Orze' dela mbecy zu tib dey lo̱, nunu dela mbecy gnii dey nu ya̱ naca̱ Ñgyoozh, nam”, rnii riidz nim. 12Orze' dela den rlagy ñi nu zeed cuen na lo Ñgyoozh dela coz nu bicy na. 13Nde' nu na rlagy ñi nu cue' nii den nu yu' falt ni losa'n, sinu rlagy ñi nu gzu fert den nu cue' gyicy den ni tub la coz nu gyicy ñi nu gya' ich de bicy na, ni cue' gyicy den ni tub la coz nu gyicy ñi nu gyicy de bicy na coz cyi. 14Ya̱ rad lagya̱ nu sac la coz nu row mbecy nu nil nac ñii coz nu a̱' caacy. Bguugy nap la lardo̱o̱ nu caacy dela coz nu row mbecy, gun ya̱ nac du̱ Shuaan na Jesuuz. Tees benu tub mbecy rnii tooy nu a̱' caacy la coz, orze' par yu ze' zi'l a̱' caacy ñi. 15Orze' benu de ru shi'ñ der baloor ni de bicy ru, orze' wagyicy der mod ni mbecy nu rca losa', gun ni' par de yu ze' gut Crisht. Orze' cue' zaan der nu gnuy nu nac de coz nu row der. 16Orze' cue' cuic der lugaar nu gzat zi mbecy de coz nu nap par de ru. 17Gun asunt ni gyel gubier ni Ñgyoozh, nde' walab nu rzat ñi de coz nu dow den o coz nu do'n, sinu asunt ni gyel gubier nim, nde' nu rlagy ñi nu gyicy den coz nu laab ñi. Rlagy ñi nu nap chu' den nu de losa'n. Rlagy ñi nu zu cyit lagy den nu nac Espiriit Yon ni Ñgyoozh. 18Gun cyu zi'l mbecy nu ni mod ricy de coz gal nu rlagy Crisht, yu ze' ricy yu mod nu yet lagy Ñgyoozh. Nunu ricy yu nu nap rnii de losa'y niy. 19Orze' rlagy ñi nu dub laa tiem yub den mod nu nap chu' dun losa'n, nunu rlagy ñi nu yub den mod nu gyafert zir dey nu nac de coz ni Crisht. 20Cue' gnu der de riiñ nu ricy Ñgyoozh lat losa'r nu nac coz nu row der, gun la zi'l coz nu gow mbecy caacy ñi. Orze' gac gow der, tees a̱' nap nu gow der ñii, benu gyicy ñi nu gyicy de losa'r coz cyi. 21Mod nu rlagy ñi, nde' nu cue' gow der beel, ni cue' go' der ñup ni urbyay, ni cue' gyicy der ni tub la coz benu nde' gyicy ñi nu gnu bicy ru. (Cue' zaan der nu gyicy cyi gan yu. Ni cue' zaan der nu gya' ich yu nu nac coz nu gyicy der. ) 22Mas rad lagy der nu par lo Ñgyoozh gac gyicy der mod ze', tees cue' nii der lo losa'r. ¡Gun dzi ni mbecy benu rad lagy yu nu sac falt niy nu nac coz nu ricy yu! 23Tees benu tub mbecy wagad lagy yu ti nap uti a̱' nap nu gow yu tub coz, o nu go'y, orze' Ñgyoozh niim nu yu' falt niy ornu goy ñi nunu ornu go'y ñi, gun wagad lagy yu ti gyicy yu coz nu wayet lagy Ñgyoozh. La zi'l coz nu gyicy den, benu rnii toon nu cyup ridz nde' coz nu walagy Ñgyoozh, orze' nde' cyi na.

will be added

X\