Romanos 13

1Dela mbecy rlagy ñi nu zuub gyidag dey ni de fushtiz. Gun dela riiñ nu zu fushtiz, nde' coz nu psa' lagy Ñgyoozh, nunu de yu nu zu riiñ ze', Ñgyoozh bzum dey. 2Nde' nu de mbecy nu rza contr ni de fushtiz, yu ze' rzay contr ni tub coz nu bzu Ñgyoozh, nunu mbecy nu rza contr ze', cha dey lo cashtig. 3Gun de fushtiz walab nu nguaa dey par nu chiib yu de mbecy nu nap ricy, sinu nguaay par nu chiib yu de yu nu shiñ ricy. Benu walagy der nu chiib de fushtiz ru, orze' nap bicy der. Gun orze' gyet lagy dey. 4Gun fushtiz, Ñgyoozh bzum dey par nu gyicy yu coz nap nuy de ru. Tees benu shiñ gyicy der, orze' rlagy ñi nu dzib der lo dey. Gun segur la ricy cup dey rishbeey nu cuic yu cashtig ni der. De yu ze' zuy riiñ ni Ñgyoozh par nu cuic yu cashtig mod nu rlagy ñi ni de mbecy nu shiñ ricy. 5Nde' nu rlagy ñi nu zuub gyidag der ni de fushtiz. Walab tub lo zi'l nu zuub gyidag der ni dey par nu ruu chu der lo cashtig ni Ñgyoozh, sinu zuub gyidaga' der ni dey par nu cue' gat lo der. 6Gyi' nde' nu rgyish der tiñ cuen ni dey, gun zu dey riiñ ni Ñgyoozh ornu ricy dey gyel fushtiz niy. 7Orze' bicy nu der tub ga la mbecy dub gal mod nu rlagy ñi. Benu cyiñ mbecy tiñ lo der por cuen ni fushtiz, orze' briic der ñii. Benu tuuba' mbecy rbooy cuen yagyi' lo der, orze' briish der ñii. De mbecy nu yad ñi nu ca lagy der lo, pca lagy der loy. De mbecy nu yad ñi nu gyicy zily der, bicy zily der yu. 8Cue' gzab der tiñ ni ni tub la mbecy. Tub zi coz gac zab der ni de mbecy: coz ze' nde' nu ca tub ca tub zi'l der losa'r, gun mbecy nu rca losa', yu ze' ricy yac yu dela coz nu rnii leey ni Ñgyoozh. 9Leey ze' rniiñ: “Cue' gal der mbecy nu wanchelaar. Cue' cut der losa'r. Cue' gyicy der gubaan. Cue' gyicy saap lagy der de coz ni losa'r”, rniiñ. Dela de coz ze', gal nu de' zir coz nu rnii laab leey ze', nde' coz nu yaruu stub zi riidz. Riidz ze' nde' rniiñ nu pca der losa'r gal nu rcar ub ru. 10Cyu zi'l mbecy nu rca losa', rila wagyicy yu shiñ nu losa'y. Orze' benu ca den losa'n, orze' ricy yac za' la den ni de leey ni Ñgyoozh. 11Ni rlagy ñi nu gyicy der, gun bi rad lagy der la tiem yu' den. Rlagy ñi nu gyicy den gal nu ricy tub mbecy nu rgyish yaa nu zu lily yu par tuuba' dzi, gun dzi nu gruu mbañ den bi yad gaab zir ñi na gaze' nese tiem nu loga la nu brugyi' nu ricy cup den consuel lo Ñgyoozh. 12Bi yad rlazh rel. Sñuu ga zi'l za' yu. Rlagy ñi nu glaa yaa den de coz nu ricy na ze' nu cow, nunu gyicy den tub mod nu ricy mbecy nu rded ze' nu yu' yaa. 13Rlagy ñi gyicy den mod nu laab ñi gal nu ricy mbecy nu rded or widoo. Walagy ñi nu cha den ze' nu yu' gyel cyit. Walagy ñi nu gzugy den. Walagy ñi nu gal den mbecy nu wanchelaan. Walagy ñi zu den tub mod nu a̱' cyit rabee. Walagy ñi gyicy deet den nu losa'n. Walagy ñi gyicy saap lagy den. 14Walagy ñi gyicy den dela nde', sinu rlagy ñi nu fert gac du den Shuaan na Jesucrisht. Nunu rlagy ñi nu cue' gric den lugaar nu gyicy na de coz a̱' nap nu yu' nañ lardoon.

will be added

X\