Romanos 12

1Nde' nu der bicy na, como Ñgyoozh dzi nap ricy num den, ya̱ rnishba̱a̱ lo der nu gyicy der ub ru par tub gun mbañ nu rbic der ni Ñgyoozh, par tub gun nu zu chu par tub lo zi'l riiñ ni Ñgyoozh, par tub gun nu dzi gyet lagy mi, gun nde' mod rishli nu rlagy ñi griib zily den Ñgyoozh. 2Nunu cue' gyicy der mod nu ricy cualcyer la mbecy nu yu' gyishlombecy, sinu gush der tub shcab cub, gun orze' gac der tub mbecy nu reña' na par mod nu na der gulas. Gun orze' gad lagy der de coz nu rlagy Ñgyoozh. Gad lagy der la na de coz nap. Gad lagy der la na coz nu rlagy mi. Gad lagy der la na coz nu sac falt ni. 3Como Ñgyoozh nap bicy num ya̱ nu bzum ya̱ riiñ ii, orze' na ne̱e̱ tub coz lo dela der. Cue' gyicy der ub ru par tub mbecy nu gya zir zu par mod nu na der, sinu tub ga la der rlagy ñi gash ru schab mod ni mbecy raso̱o̱ ben lac na ub der. Dub gal lac ricy nu Ñgyoozh tub ga la der dub ni rlagy ñi gash der shcab ben lac na der. 4Gun tub cuerp ni mbecy ricy cup ñi zañ lugaar niñ, nunu tub ga la lugaar rcyiiñ ñi par reñ ga la riiñ. 5Ni' zi'l de ub na. Mas zigy den yu'n, tees nac den tub zi'l cuerp nu nac Crisht. Orze' na den gal nu na de reñ ga la lugaar ni laab tub zi'l cuerp ze'. 6Dub gal lac rlagy Ñgyoozh, dub ni ricy mi nu cyiiñ tub ga la den nu gyicy na reñ ga la riiñ nim. Orze' rlagy ñi nap gyicy den riiñ ze'. Benu Ñgyoozh gyicy mi nu cyiiñ tub den nu shaal na riidz nu druu lom, orze' ni' zi'l rlagy ñi nu gyicy den, dub gal lac mod nu ricy num den. 7Benu Ñgyoozh gyicy mi nu cyiiñ tub den nu gyicy na coz nu rlagy reña' mbecy, orze' rlagy ñi nu nap gyicy nañ. Orze' benu Ñgyoozh gyicy mi nu cyiiñ tuuba' den nu lyuun ni losa'n, orze' rlagy ñi nu ni gyicy na. 8Benu Ñgyoozh gyicy mi nu cyiiñ tuuba' den nu gric na baloor ni losa'n, orze' ni gyicy na. Cyu zi'l mbecy nu rbic coz ni losa', rlagy ñi nu cue' nu ziy coz nu cuic yu ni losa'y. Yu nu riib ic losa' rlagy ñi nu mod nap gyub ic yuy. De yu nu nap ricy nu losa', rlagy ñi nu dub gusht la gyicy yuñ. 9Rlagy ñi nu rishli ca der losa'r. Guzi lagy der lo de coz a̱' nap. Bzu fert der nu nac de coz nap. 10Pca tub pca tub zi'l der losa'r como nac yu bicy der nu nac Crisht. Bzu der altant par nu ca lagy der lo losa'r. 11Cue' gazed der, sinu bloo lo der nu dutuub la lardoor lat nu gyicy der de coz nu rlagy Shuaan den. 12Gucyit lagy der nu nac nu rgyish lo der lo Ñgyoozh. Bicy cup der pase̱z ornu deet rzac der. Nunu dub laa tiem bdiiñ der lo Ñgyoozh. 13Ornu galagy ñi la coz ni de mbecy ni Crisht, orze' briic der ñii ni dey, nunu nap bicy nu der de yu nu ryiid yu'r. 14Bdiiñ der lo Ñgyoozh nu nap gyicy num de mbecy nu rshet zi de ru. Bdiiñ der lom nu nap gyicy num dey. Cue' ca nu shiñ gyicy num dey. 15Ornu tub mbecy racyit lagy yu, orze' ni' zi'l de ru gucyita' lagy der. Nunu ornu ricy shni dey, orze' ni' zi'l bicy shni ga' der. 16Nap gu' der nu losa'r. Cue' gac der mbecy le'. Nunu pshet ic der nu chesa nur de mbecy shni. Cue' nii too der nu dzi yu' shcab ni der. 17Benu tub mbecy shiñ ricy nuy de ru, orze' cue' gyicy gal ga der ñii. Byub der tub mod nu gyicy ru coz nu nap par dela mbecy. 18Bicy der ca na la coz nu gac gyicy ru par nu nap chu' der nu de losa'r. 19Rila cue' gyicy gal ga der ornu mbecy shiñ ricy nuy der, sinu zaan der nu Ñgyoozh cuic mi cashtig ni dey. Gun lat de riidz nim rniiñ: “Ñgyoozh nam: nde' cuen ne̱ ya̱ nu grica̱ cashtig. Ya̱ naca̱ biñ nu gyabic i mbecy nu shiñ ricy, nam.” Ni rniiñ. 20Lugaar nu gyicy gal gaa der, orze' i mod rniiñ nu gyicy der: “Benu losa' yuur ran yu, orze' briic coz nu goy. Benu rbigy yu nis, orze' briic nis go'y, gun ornu ni gyicy ru, orze' gyicy ru nu gat loy”, rniiñ. 21Cue' zaan der nu gyicy coz a̱' nap gan der, sinu bicy der coz nap. Orze' gyicy der gan, cue' gyicy der coz a̱' nap.

will be added

X\