Romanos 11

1Orze' na rdugyi̱' ga̱': ¿a mne' Ñgyoozh tub nac de mbecy nu bicy nim ze'? ¡Rila walab ni bicy mi! Laab ya̱ naca̱ mbecy Israeel. Abraham, yu ze' gyitoo bel ne̱. Neza̱ Benjamiing. 2Ñgyoozh wanne'm de mbecy Israeel, de yu nu nil nese nu loga la gud lagy mi nu nac yu nim. ¿Walab gaal wagad lagy der lac yaruu riidz ni Ñgyoozh ze' nu Elías bdu' cyiy de mbecy Israeel lat nu mnii nuy Ñgyoozh? 3Elías nay rab yu Ñgyoozh: “Shuaan de̱, bi biit dey dela yu nu rnii por cuen nir, nunu ptily dey de mez ze' nu driib zily de mbecy ru. Stub zi la ya̱ byeeña̱, nunu rlagya' dey cut yu ya̱”, nay. 4Orze' na Ñgyoozh rab mi yu: “Ya̱ bi bloo su̱ gagy miily yu gyeey nu griib zily dey ya̱. De yu ze' wansu tib dey nu nriib zily yu nab nu la Baal”, nam. 5Gal nu bicy Ñgyoozh tiem ni Elías, ni' zi'l ricy mi na. Ñgyoozh bicy mi faboor nu pcuim la be de mbecy par nu gac nim. 6Tees Ñgyoozh pcuim de mbecy ze' nu nac faboor nu bicy num dey. Walab nu pcuim dey nu nac la na de coz nu ricy dey. Gun benu ncuim dey nu nac la na coz nu ricy dey, orze' nde' walab tub faboor. 7Orze' na ¿lac mod? De mbecy Israeel wangyad dey tub mod nu gyanap yu par lo Ñgyoozh, sinu de yu nu pcui Ñgyoozh zi'l byap dey ñi. Ze' de' zir dey bicy mi nu byacyigy nañ lardooy. 8Ni mod rnii riidz ni Ñgyoozh: “Ñgyoozh bicy mi nu byacyigy lardoo dey. Bicy mi nu mas zub urlo dey tees wacsac dey. Bicy mi nu mas zub gyidag yu, tees wagyeñ dey. Ni na dey mas gashtal dzi na”, rniiñ. 9Ni' zi'l mnii Dabi lat de riidz ni Ñgyoozh ornu nay: Rlagy ñi gyet lag dey nañ caa ni de coz nu row dey. De coz ze' gyicy ñi nu gadza dey. Orze' cha dey lo cashtig. 10Rlagy ñi nu gyow urlo dey, gun orze' cue' zac dey. Rlagy ñi dzong ich dey par tub la nu nac nu dzi ye yuu nu ca ich yu, na riidz nu mnii Dabi. 11Na rdugyi̱' ga̱': ¿A bdune' de mbecy Israeel tub la nu nac nu gudza dey? ¡Rila walab ni! Sinu nu nac nu wansuub gyidag dey ni Ñgyoozh, nde' nu guud mod nu gruu mbañ de mbecy nu walab mbecy Israeel, gun orze' ni' de mbecy Israeel galagy dey nu gruu mbañ yu. 12Orze' nu nac nu gudza de mbecy Israeel, nde' nu guud mod nu nap ricy nu Ñgyoozh dela mbecy. Nunu nu nac nu wangyicy de mbecy Israeel ze' gan, orze' nap bicy num de mbecy nu walab mbecy Israeel. ¡Benu ni, orze' dzi zir nap gyicy num de mbecy Israeel ornu cush cya ga' dey lom tuuba' tir! 13Na ricy cupa̱ tub riidz nu rlagya̱ ne̱e̱ lo de ru, mbecy nu walab mbecy Israeel. Como Ñgyoozh bzum ya̱ nu yapa̱ gyicya̱ riiñ lat der, ya̱ ricy zilya̱ riiñ nu ricya̱, 14gun orze' dzi ga galagy de losa̱' nu gyicy dey gal nu ricy de ru, gun orze' gruu mbañ la be dey. 15Gun ornu mne' Ñgyoozh dey, orze' guud mod nu gyanap de' zir mbecy nu yu' gyishlombecy lom. Orze' ornu cush cya ga' dey lom, orze' gzac dey gal nu zac tub mbecy gut ornu gyabañ yu. 16Como de gyitoo bel ni de mbecy Israeel guc dey mbecy nu pcui Ñgyoozh nu gac nim, orze' ni' zi'l de mbecy Israeel nac dey mbecy nu pcui Ñgyoozh. Gun benu nap na gyishtily nu bruu ni cub loga la, orze' ni' zi'l nap na de' zir gyishtily nu gruu ni de' zir cub ze'. Nunu benu nap na lyu tub yag, orze' ni' zi'l nap na de yaañ. 17De mbecy Israeel na dey gal nu na tub yag mni nu la ya oliva. Tees yu' la be de yaa yag mni ze' nu guch ñii. Orze' lugaar ze' nu guch niñ ze', ze' pcyiid dey yaa tuba' yag gyish. Orze' de ru, mbecy nu walab mbecy Israeel, na der gal nu na yag gyish ze'. Orze' na ral der dela gyel nap nu rbic Ñgyoozh ni de mbecy nim. 18Tees cue' nii too der nu nap zir der gaze' de mbecy nu guc gal nu na yaa yag nu guch ze'. Benu rash der shcab nu nap zir der, orze' cue' nit lagy der nu walab yaañ rbic ñi fers ni lyuñ, sinu lyuñ rbic ñi fers ni de yaañ. 19Tees dzi ga grusu tub mbecy nu niiy: “Laab ni, tees guch de yaa yag ze' par nu gad lugaar nu cyiid dey de ub na”, niiy. 20Laab ni gal nu niiy. Guch de yaañ ze' par nu nac nu wangyicy cup dey consuel lo Ñgyoozh. Tees de ru nicy nash der cyong yag ze' nu nac nu ricy cup zi'l der consuel lom. Orze' cue' gyicy le' der, sinu gudzib der nis wagyicy ru gan. 21Gun benu Ñgyoozh bloo chum de mbecy Israeel, de yu nu na gal nu na yaa yag mni ze', orze' ¿a rnii too der nu wabo chum de ru? 22Orze' bdu' cuen der nu Ñgyoozh dzi nap mi, nunu dzi ta nam. Ta nam par de mbecy nu shiñ ricy. Tees nap mi par de ru, benu zaab gyicy paa la der nu de gyel nap nim. Benu wayicy der nde', orze' shes mi de ru ich cyoong yag mni ze'. 23Ze' benu de mbecy Israeel, cush cya dey nu gyicy cup yu consuel, orze' Ñgyoozh cyiid cuba'm dey ich cyoong yag ze', gun mi ze' gac cyiid mi dey tuuba' tir. 24Gun de ru, mbecy nu walab mbecy Israeel, na der gal nu na yaa tub yag gyish ze'. Pshi'ñ dey yaa yag ze'. Orze' pcyiid dey ñi nu tub mod nu dzi biigy nu tub yag mni nu la ya oliva. ¡Benu gac gyicy mi ni mod nu de ru, orze' a̱' biigy zir cyiid mi ñii tuuba' tir, laab yaa ya oliva nu nac yag mni ze' ich laab cyong ñi! 25Der bicya̱, rlagya̱ nu gad lagy der tub coz nu wangad lagy mbecy gulas, gun orze' cue' gash der shcab nu nac der mbecy nu dzi rad lagy. Coz ze', nde' nu yu' mbecy Israeel nu bicy cyigy too dey. Walab nu bicy cyig too dey par tub la, tees bicy cyig too dey gashtal ornu lazh nu chu' dela mbecy nu walab mbecy Israeel lat de mbecy ni Ñgyoozh, de yu nu bi ca lo cuen nu chu'. 26Ornu ded ni de nu nde', orze' dela mbecy Israeel gruu mbañ dey gal nu rnii de riidz ni Ñgyoozh. Ñgyoozh nam: Biñ nu rboo mbañ mbecy, mi ze' gruum Sión nunu co chum dela cyi nu ricy mbecy nu bruu lat de nez Jacob. 27Orze' ya̱ za' lo̱ trat nu bicy du̱ dey ornu lo̱o̱ chu dela cyi nu ricy dey, nam. 28Na de mbecy Israeel za dey contr ni de riidz ni Crisht nu nac de ru, mbecy nu walab mbecy Israeel. Byac dey losa' yuu Ñgyoozh, gun orze' gad mod nu de ru gac nu der mi. Tees mi ze' gabee rcam dey, gun pcuim de gyitoo bel ni dey, Abraham, Isaac, nu Jacob. 29Gun rila wayasha'm de coz nap nu cuic mi ni mbecy, nunu ni wabo chum de mbecy nu bi pcuim nu gac nim. 30Ze' de ru gulas wansuub gyidag der nim. Tees na Ñgyoozh gushni lagy mi der nu nac nu wacsuub gyidag de mbecy Israeel nim. 31Ni zi'l wacsuub gyidag dey mas gashtal dzi na, gun orze' gal nu gushni lagy Ñgyoozh de ru, orze' ni' zi'l gashni lagy mi dey ze'. 32Gun Ñgyoozh ricy mi dela mbecy par mbecy nu wacsuub gyidag nim, gun orze' gashni lagy mi dela dey nu tub zi'l mod. 33¡Dzi ga coz ily gyel nap ni Ñgyoozh! ¡Nap tona' la rad lagy mi! ¡Nunu tona' la yu' shcab nim! Se cyu la gac shaal lagu nu ni rniim. Se cyu la gac nii lagu ni ricy mi. 34Gal nu rnii riidz nim: Ni tub la mbecy wac gyet lag yu cuen de shcab ni Ñgyoozh. Ni tub la mbecy wac cuic yu consef nim. 35Ni tub la mbecy wac cuic yu coz nu com, coz nu rlagy ñi nu gyabica'm ni dey, rniiñ. 36Gun dela coz druuñ lo Ñgyoozh. Psa' lagy mi delañ, nunu delañ, nac ñii coz nim. Rlagy ñi nu gyabic den gyel mbecy nim par tub la. Laab ni gac ñii.

will be added

X\