Romanos 10

1Der bicy na, ric la añ ne̱ nu gruu mbañ de losa̱'. Nunu tona' la rdiña̱ lo Ñgyoozh ni dey. 2Ya̱ gac ne̱e̱ tub coz nap nu ricy dey: tona' la rboo lo dey nu nac Ñgyoozh. Nomaas nu wagad lagy nap dey de coz nu ricy yu. 3Wangyicy cuen dey mod nu rlagy Ñgyoozh par nu gyanap mbecy lom, sinu ryub dey tub mod nu rlagy ub zi'l yu. Nde' nu wagnii la dey “O” nu mod nu rlagy Ñgyoozh. 4Gun nu nac Crisht, bded ni mod nu rnii leey par nu gyanap mbecy lom, gun orze' de yu nu ricy cup consuel lom gyanap dey. 5Tees riidz nu bzeeñ Moisees, nde' rniiñ lac mod gyanap mbecy par lo Ñgyoozh nu nac leey. Rniiñ nu benu tub mbecy ricy yac za' lay ni leey, orze' cui mbañ yu. 6Tees i mod za riidz nu rnii lac mod gyanap den lom nu nac nu gyicy cup den consuel: “Cue' nii toor, ¿cyu chup gyibaa?” rniiñ. Gun walagy ñi gyicy mbecy nu gyet Crisht. 7Nunu; rnii ga'ñ: “Ni cue' nii too der, ¿cyu cha lat de mbecy gut?” rniiñ. Gun walagy ñi nu gyicy mbecy nu gyabañ mi. 8Orze' ni mod za riidz ze': “Riidz ze' garee zuñ lo der. Bi rzat ru ñii. Nunu bi ca ic ruñ.” Nde' riidz nu rnii nu gyanap den nu nac nu gyicy cup na consuel lom. Laab riidz ze' rshaal de̱ na. 9Benu nu ru'r niir nu Jesuuz nac mi Shuaan ru, nunu benu nañ lardoor cheña lagy ru nu Ñgyoozh bicy mi nu byabañ mi, orze' gruu mbañ ru. 10Gun nu nac nu gyicy cup den consuel lo Crisht nañ lardoon, nde' gyicy ñi nu gyanap den lo Ñgyoozh. Nunu nu nac nu zat den Jesucrisht nu ru'n, nde' gyicy ñi nu gruu mbañ den. 11Riidz ni Ñgyoozh rniiñ: “Cyu zi'l mbecy nu ricy cup consuel lom, orze' rila washi'ñ yu baloor, gun walab nu leew bicy cup yu consuel lom”, rniiñ. 12Tub zi'l na dela mbecy. Gal nu ricy num de mbecy Israeel ni' zi'l ricy num de mbecy nu walab mbecy Israeel. Laab tub zi'l mi ze' Shuaan dela dey, nunu nap ricy num dela mbecy nu nishbaa lom. 13I mod za riidz ni Ñgyoozh: “Dela de mbecy nu rnishbaa lo Shuaan den, de yu ze' gruu mbañ dey”, rniiñ. 14Tees ¿lac mod nishbaa dey lom benu wagyicy cup yu consuel lom? Nunu ¿lac mod gyicy cup dey consuel lom benu wangyeñ dey de riidz nim? Nunu ¿lac mod gyicy yu nu gyeñ yu riidz nim benu washaal mbecy ñi loy? 15Nunu ¿lac mod shaal dey riidz ze' benu wazuu nez dey cyu nu cha shaal ñi loy? Gal nu rnii riidz ni Ñgyoozh: “Dzi ga nap ornu ryiid de yu nu rshaal de riidz nap ni Ñgyoozh”, rniiñ. 16Tees walab dela mbecy “O” mnii dey ni de riidz nap ze', gun i mod za riidz ni Isaías. Orze' nay: “Shuaan de̱, ¿ca ñuu na mbecy guña lagy yu de riidz nir nu mne̱e̱?” na Isaías rab yu Ñgyoozh. 17Orze' nde' nu ricy cup den consuel lo Crisht nu nac nu reñ na riidz nim. Nunu reñ na riidz nim nu nac nu rshaal mbecy ñi lon. 18Tees ya̱ rdugyi̱' tub coz: ¿a rishli wangyeñ de mbecy de riidz ze'? Segur la güeñ dey ñi. Gun riidz ni Ñgyoozh rniiñ: Bzu laa riidz nu mnii dey dutuub la gyishlombecy. Gashtal ze' nu blaazha' zir nu zet ni gyishlombecy brush las riidz nu mnii dey, na Ñgyoozh. 19Orze' na rdugyi̱' tuuba' tir: Tees ¿a wangyet lag de mbecy Israeel cuen nu de riidz ze', nde' par dela mbecy? Laab Moisees mniiy lac mod nu loga la. Ornu nay: Ñgyoozh nam: “Ya̱ gyicya̱ nu gyicy saap der ich tub nac mbecy nu wancyuu lat de mbecy ne̱. Ya̱ gyicya̱ nu gazi lagy der lo tub nac mbecy nu wagad lagy”, na Ñgyoozh, na Moisees. 20Despuees naal la mnii Isaías ornu pcaay: Ñgyoozh nam: “De mbecy nu wanyub ya̱, byap dey ya̱. Ya̱ bruu zaca̱ lo de mbecy nu wancugyi' ya̱”, nam. Ni pcaa Isaías. 21Ze' par de mbecy Israeel, Isaías pcaay: “Ñgyoozh nam: Ya̱ gua la dzi bzaab ya̱a̱ lo tub mbecy wagyeñ, nunu mbecy rnid ru', nam.” Ni mod pcaa Isaías.

will be added

X\