Romanos 1

1Ya̱ Baly, tub yu nu ricy de coz nu rnii Jesucrisht. Ñgyoozh bzum ya̱ nu naca̱ aposht nunu pcuim ya̱ par nu shaala̱ de riidz nu sac nim. 2Riidz nu sac ze', nde' tub coz nu tona' la gulas mnii Ñgyoozh nu segur la gyicy mi. Ni mniim lat de riidz nim nu bzeeñ de yu nu mnii por cuen nim. 3Riidz ze' rniiñ de coz ni I'ñ mi, Shuaan den Jesucrisht. Byac mi tub mbecy gyishlombecy nu nac nu bruum lat nez Dabi. 4Tees Espiriit Yon bicy mi nu gud lagy den nu mi ze' nac mi i'ñ Ñgyoozh nu nac coz ily nu guc ornu byabañ mi nu gut mi. 5Nunu nap bicy nu Ñgyoozh ya̱ ornu bicy mi nu Jesuuz bzum ya̱ nu gaca̱ aposht. Ni bicy mi, gun orze' locyuuba̱ de mbecy nu yu' gabi' naañ la ni gyishlombecy nu gyicy cup dey consuel lom, nunu zuub gyidag dey nim, gun orze' ca lagy dey lom. 6Gaza' de ru de mbecy Rom nu bzu Ñgyoozh nu gac ni Crisht. 7Nde' nu ya̱ zeeda̱ gyicy ii lo de ru, de mbecy ni Crisht nu yu' Rom. Ñgyoozh rcam de ru, nunu bzum der par nu gac der mbecy nim. Ñgyoozh Uz na nu Shuaan den Jesucrisht gyicy dem faboor nu nap gyicy num der, nunu gyicy mi nu cheti ri añ ni der. 8Nu loga la, nu nac Jesucrisht ya̱ drica̱ gras ni Ñgyoozh nu nac dela der, gun de ga la lugaar bi rnii de mbecy nu fert ricy cup der consuel lo Crisht. 9Nu dutuub la lardo̱o̱, ricya̱ de coz nu rlagy Ñgyoozh ornu rshaala̱ riidz ni I'ñ mi, Jesuuz. Nunu mi ze' rad lagy mi nu rzata̱ der lat nu rne̱e̱ du̱m. 10De tir la ornu rne̱e̱ du̱m, ya̱ rdiña̱ lom nu cuic mi tub mod nu yap güi̱i̱ der, benu nde' coz nu rlagy mi. 11Rlagya̱ yap güi̱i̱ der par nu locyuuba̱ der nu de coz nu druu lo Espiriit Yon ni Ñgyoozh, gun orze' gyafert zir der nu nac de coz ni Crisht. 12Mod nu rne̱e̱ ii, nii nu locyuub na losa'n. Ya̱ locyuuba̱ de ru nu nac de coz nu ricy Crisht num ya̱, nunu de ru locyuub der ya̱ nu nac de coz nu ricy Crisht num de ru. 13Der bicy na, ya̱ rlagya̱ nu gad lagy der nu zañ tir bicy pe̱e̱ nu nyap güi̱i̱ der, tees mas gashtal dzi na wagad mod nu yapa̱. Rlagya̱ yapa̱, gun orze' za' lo̱ ñuu riiñ ni Crisht lat de ru, gal nu bicya̱ lat de' zir de mbecy nu walab mbecy Israeel. 14Ya̱ yad ñi ne̱ nu shaala̱ riidz ni Crisht lo dela mbecy: mas lo de yu lily, nunu mas lo de mbecy riidz, mas lo de mbecy nu nap rad lagy, nunu mas gal lo de yu nu wagad lagy, tees yad ñi ne̱ nu shaala̱ riidz ze' lo dey. 15Nde' nu ric la añ ne̱ nu shaala̱ de riidz nu sac ni Crisht lo de ru, mbecy nu yu' Rom. 16Ya̱ wagat lo̱ nu nac de riidz nu sac ni Crisht, gun nu nac de riidz ze' Ñgyoozh co mbañ mi de mbecy nu gyicy cup consuel lom. Nu loga la co mbañ mi de mbecy Israeel, tees ni' zi'l co mbañ mi de mbecy nu walab mbecy Israeel. 17Gun riidz ze' ricy ñi nu gad lagy den lac mod ricy Ñgyoozh par nu gyanap den lom. Tub zi la nu nac nu gyicy cup den consuel lom, orze' gyanap den par lom. Gun lat de riidz ni de yu nu mnii por cuen nim rniiñ: “Yu nu gyanap par lo Ñgyoozh nu nac nu ricy cup yu consuel lom, orze' yu ze' cui mbañ yu”, rniiñ. 18Rabee nu gal gyibaa gruu cashtig nu gzeed Ñgyoozh lat de mbecy nu ricy coz cyi, nunu lat de mbecy nu ricy coz a̱' nap nu losa', gun tona' la rzi lagy mi lo dey. De mbecy a̱' nap ze' ricy dey nu wagac gad lagy de mbecy de coz rishli nim nu nac de coz a̱' nap nu ricy dey. 19Tees naal la rabee de coz nu gac gad lagy dey nim, gun laab mi pshaal mi ñii lo dey. 20Gun de coz nim nu wac zac dey, gac gad lagy dey ñi nu nac nu rzac dey de coz nu psa' lagy mi. Gaal zi nese nu bzub gyi' gyishlombecy rad lagy dey nu mi ze' nac mi Ñgyoozh, nunu rad lagy dey nu rila walazh fers nim. Rad lagy dey nde' nu nac de coz nu psa' lagy mi. Nde' nu sac rishto' lo ni dey. 21Gun mas rgu' lo dey mi, tees waca lagy dey lom gal nu yad ñi nu gyicy dey lom, nunu ni wancuic dey gras nim. Lugaar nu gyicy dey nde', ca nu guton too dey, nunu mnu shcab ni dey. Wangac nii too dey ca na coz nu nap. 22Rnii dey nu nac yu mbecy nu yu' lo, tees nac dey mbecy ton. 23Pchaa dey gyel lily ni Ñgyoozh biñ nu rila wat. Orze' brugyi' driib zily dey tub nab mbecy nu gat. Driib zily dey nab chigyiñ, driib zily dey nab bily, driib zily dey nab de bañcyug tap gyi'. Dela nde' driib zily dey. 24Nu nac de nde', orze' bzaan Ñgyoozh nu ricy dey de lo la coz a̱' nap nu druu nañ lardooy. Bzaan mi nu ricy dey de lo la coz to' lo nu losa'y. 25Lugaar nu zuub gyidag dey de riidz rishli nim ca coz rguu rzuub gyidag dey. Driib zily dey de coz nu psa' lagy mi, nunu rzu bich dey nu nac de coz ze'. Ni ricy dey lugaar nu griib zily dey biñ nu psa' lagy dela coz. Rlagy ñi gyabic den gyel mbecy nim par tub la. Laab ni gac ñii. 26Par nu nac nde', Ñgyoozh bzaan mi nu de coz to' lo nu druu nañ lardoo dey chetib ic ñiy. Mas de biñ mñaa shiñ ricy dem. Lugaar nu dzeel mi yu gyeey mod nu rlagy ñi, ca nu losa' mñaa dem ral mi. 27Ni' zi'l de yu gyeey. Guca dey nu rdzeel dey biñ mñaa mod nu rlagy ñi. Ca nu ric la añ ni dey nu gal yu losa' gyeey yu. Ricy dey coz to' lo nu losa' gyeey yu. Ub la dey rnuy cuerp ni ub yu nu nac de coz a̱' nap nu ricy yu. Nde' cashtig nu ricy cup dey. 28Orze' Ñgyoozh bzaan mi nu byashiñ na shcab ni de mbecy, gun walagy dey caa ic yu de riidz rishli nim. Nde' nu ricy dey de coz nu a̱' yad ñi nu gyicy yu. 29Dzi bded ru' ga' ricy dey de lo la coz a̱' nap. Shiñ ricy nu dey losa'y. Ye rzac dey lo coz ni losa'y. Rzat zi dey losa'y. Rasaap lagy dey nu nac losa'y. Rut dey losa'y. Deet rzu' dey nu losa'y. Rguu dey losa'y. Ricy ras dey nuy losa'y. Ro dey rishcuen. 30Rnii zi dey ni losa'y. Wayet lagy dey Ñgyoozh. Nac dey mbecy rnid ru'. Nac dey mbecy le'. Ricy zily dey ub yu. Rboo ic dey lac mod gyicy yu coz a̱' nap. Wacsuub gyidag dey ni de mbel niy. 31A̱' nap dey. Wagyicy yac dey nu de riidz nu rniiy. Waca dey losa'y. Wagyag ic dey lo losa'y. Wagashni lagy dey losa'y. Dela nde' coz nu ricy dey. 32Nap rad lagy dey nu Ñgyoozh mniim nu cyu zi'l mbecy nu ni gyicy, orze' yu ze' yad ñi niy nu gat yu. Tees walab tub lo zi'l nu zaab ricy la de ub yu de coz ze', sinu shiñ zir ricy dey, gun gal yet la lagy dey ornu ni ricy reña' mbecy.

will be added

X\