Apocalipsis 9

1Orze' gaze' nu anc gay blaay trompet niy. Orze' bzaaca̱ tub mbecy nu na gal nu na bel baa. Orze' bruuy baa bet lag yu lo yu. Orze' yu ze' guud ya gyiib ni gyerye ily nu rnii dey gabily niy. 2Orze' pshaal yu ro' ni gabily. Orze' ru' gabily ze' bruu tub dzeeñ ily gal nu druuñ ru' tub yo ily. Orze' dzeeñ ze' psoow ñi lo ba ni doo, gal nu lo bi, nunu wacabee napa' la gyishlombecy. 3Orze' gushagy bruu de ma lat dzeeñ ze' bet ma lo yu. Orze' ma ze' cyiiñ ma nu gyicy ma gal nu ricy gune. 4Orze' ma ze' gua raso̱o̱ lo ma nu cue' gyicy ma da̱y nu de gyish, ni cue' gyicy ma da̱y nu de yag, ni cue' gyicy ma da̱y nu ni tub la coz ca'. Sinu tub zi la mod nu gyicy ma, nde' nu shiñ gyicy nu ma mbecy nu sac sey ni Ñgyoozh cyuga. 5Orze' de gushagy ze' wangad rishbeey nu cut ma de mbecy ze'. Nomaas guud rishbeey ni ma nu shet zi zi'l ma mbecy gaay beey. Nunu gyicy ma nu gac ni mbecy gal nu rac nu rgod gune. 6Orze' lat gaay beey ze', orze' de mbecy yub yu tub mod nu gat yu. Tees wayap dey ñi. Nunu mas galagy dey nu gat yu, tees rila wad mod nu gat dey. 7Orze' de gushagy ze' rabee ma gal nu rabee cuay ornu bi zu lily ma par gyel yuu. Too ma zub tub coz nu na gal nu na coron or. Nunu lo ma nañ gal nu na lo mbecy. 8Ze' gyich too ma nañ gal nu na gyich too biñ mñaa. Ze' lay ma nañ gal nu na lay biidz. 9Orze' lyush ma noow ñi nu tub coz nu na gal nu na gyiib. Nunu lowe' ma rzigy ñi gal nu rzigy zañ caret ornu rca yu cuay ornu rash ma carer nu rshet yaa dey losa' yuuy. 10Zub ne de ma. Nañ gal nu na ne gune. Nunu zub ngooch ma looñ. Nunu nu nac ne ma, cyiiñ ma nu shet zi ma mbecy lat gaay beey ze'. 11Orze' zu tub mbecy nu riib ic gushagy ze'. Yu ze' nac yu anc ni gabily. Orze' yu ze' lay Abadón benu nu riidz hebreo. Ze' benu nu riidz griego, orze' lay Apolión. Nde' yaruuñ yu nu rnit lo. 12Orze' bded tir loga la nu shiñ guc. Ze' ricy falt ru' se cyup tir nu shiñ gac. 13Orze' gaze' nu anc shup blaay trompet niy. Orze' güeña̱ nu zaab ti' nu rnii par de tub ga scyiñ ni cuug or nu zu lo Ñgyoozh. 14Orze' riidz ze' rniiñ lo anc shup nu ricy cup trompet ze': ―Glaar de tap anc nu nag ru' gyoow ily nu la gyoow Eufrates ―rniiñ. 15Orze' ni mod bdulaa de tap anc ze', gun orze' lo dela mbecy nu yu' gyishlombecy, cut dey tub nac yu. Orze' gyiyeeñ se cyup nac yu. Gun de yu ze' bi yu' lily laa dey par or na, nu dzi na, nu beey na, nu ña'n na. 16Orze' yu' cyup gaynal miyo̱o̱ de soldad nu riib cuay. 17Orze' pcaal mniiñ lo̱ nu bzaaca̱ de cuay ze' gal nu de yu nu zub ich ma. De yu ze' bi ca tub cyug nu rsoow ñi lyush yu. Ze' cyug ze', nde' nañ gal nu na gyi, nunu ca' la rgüiiñ, nunu caach rgüiiñ. Nunu cuay ze' na too ma gal nu na too biidz. Nunu ru' ma driib lyush gyi, gal nu dzeeñ, gal nu asufre. 18Orze' lo dela mbecy nu yu' gyishlombecy, gut tub nac yu nu nac chon coz nu driib ru' ma ze'. Orze' byeeñ se cyup nac yu. Chon coz ze', nde' gyi, nu dzeeñ, nu asufre. 19Gun de cuay ze' cyiiñ ma nu nac ru' ma nunu nu nac ne ma. Orze' ne ma nañ gal na bily. Zub too ma. Orze' nu too ma shet zi ma mbecy. 20Tees de' zir mbecy nu wangat nu nac de coz dañ ze' wancheca dey nu gyicy yu de coz a̱' nap nu ricy yu, ni wancheca dey nu rcay de nuras a̱' nap, nu de nab nu byaa nu or, nu de nab plat, nu de nab nu byaa nu gyiib cach, nu de nab nu byaa nu gyita', nu de nab nu byaa nu yag. Wancheca dey nu rcay nab nu wacsac, ni wagyeñ, ni wacsa. 21Ni wanne' dey cyi nu ricy yu. Cyi ze', nde' nu rut dey losa'y, nunu ricy dey gyel tu', nunu ricy dey cyi nu ral yu mbecy nu wanchelaay, nunu ricy dey gubaan. Dela cyi ze' wanne' dey ñi.

will be added

X\