Apocalipsis 8

1Na ornu biñ nu nac Shily ze' psug mi sey gagy ze', se ri zu la byac gyibaa tub cyaal or. 2Orze' gaze' nu bzaaca̱ gagy anc zuy lo Ñgyoozh. Orze' guud gagy trompet ni dey. 3Orze' gaze' nu bruu zac tub anc yad nuy tub psi'ñ yaal or. Orze' ingaab yaal guud niy. Orze' gua nuy ñi lo cuug nu zaay yuñ lat nu rnii nu dela mbecy Ñgyoozh. Rzaay yuñ lo cuug or nu zu par lo yashily, ze' nu riib ic Ñgyoozh. 4Orze' dzeeñ yaal ze' bruuñ yaa anc nu zu lo Ñgyoozh, orze' wes nañ ñi lat nu rnii nu de mbecy mi. 5Orze' gaze' nu anc ze' bdu' yaay psi'ñ yaal or ze'. Gaze' nu gush yu boo nu bruu lo cuug, bdu'y ñi nañ psi'ñ yaal ze'. Gaze' nu pshet lag yuñ lo yu. Gaze' nu mnii guzii. Nunu guc zu redz. Nunu bzu gyi ni guzii. Nunu briib duru. 6Orze' de gagy anc nu zu yaa gagy trompet ze' bzuub ru' dey trompet niy nu bzu lily yu nu laay ñi. 7Gaze' nu anc loga blaay trompet niy. Orze' bet gyey gye, nu gyi, nu reñ. Gu' can ñii ornu beet ñi lo yu. Orze' lo dela lugaar ni gyishlombecy, wic tub ga nac lugaar niñ. Ze' byeeñ cyup nac lugaar nu wanchic. Lo dela yag nu nash gyishlombecy, wic tub nac ñii. Orze' byeeñ se cyup nac ñii. Orze' lo dela gyish, wic tub nac ñii. Ze' byeeñ cyup nac ñii. 8Gaze' nu anc cyup blaay trompet niy. Orze' bet lag tub coz nu rca gyi. Nañ gal nu na tub bicy ily. Bet lag ñi lo nisyudoo. Orze' lo dela nis nu yu' gyishlombecy, tub nac ñii byac ñi reñ. Ze' cyup naca'ñ wangyac ñi reñ. 9Orze' lo dela bañcyug nu yu' lo nisyudoo, gut tub nac ma. Ze' byeeñ cyup nac ma. Nunu lo dela barc, mnit lo tub nac ñii. Ze' byeeñ se cyup nac ñii. 10Orze' gaze' nu blaa ga' anc chon trompet niy. Orze' bet lag tub bel baa ily. Rca gyi ma gal nu na tub yaa gyi gyegy. Bruu ma gal baa. Orze' lo dela gyoow ni gyishlombecy, bet lag ma lo tub nac ñii. Ze' wangyet lag ma lo cyup nac ñii. Orze' lo dela lugaar ze' nu driib nis, bet lag ma lo tub nac ñii. Ze' wangyet lag ma lo cyup nac ñii. 11Orze' nu la bel baa ze', nde' Bel Baa Lya. Orze' lo dela nis nu yu' gyishlombecy, tub nac ñii byalyañ. Ze' cyup nac ñii wangyalyañ. Orze' zigy mbecy gut yu nu nac nu go'y nis ze', gun byalyañ. 12Orze' gaze' nu anc tap blaay trompet niy. Orze' lo dela lugaar ni doo, bet cow tub nac ñii. Ze' cyup nac ñii wangyet cow ñi. Nunu lo dela lugaar ni beey, bet cow tub nac ñii. Ze' cyup nac ñii wangyet cow ñi. Nunu lo dela bel nu ta' baa bet cow lo tub nac ma. Ze' cyup nac ma wangyet cow lo ma. Orze' lo trocyup or ni tub dzi, bet cow tap or. Nunu lo trocyup or ni tub rel, bet cowa' tap or. 13Orze' bgüi̱i̱ baa. Bzaaca̱ tub psi. Gya zaab ma lo bi. Orze' güeña̱ nu ye la mnii ma. Orze' na ma: ―¡Lashta de mbecy nu rcyiiñ lo yu ornu glaa se chon de anc trompet niy! ―na psi ze'.

will be added

X\