Apocalipsis 7

1Despuees ni de nu nde', orze' bzaaca̱ tap anc zu tub gay za' tap la scyiñ ni gyishlombecy. Orze' de yu ze' bicy dey nu cuez za' tap la bi ni gyishlombecy, gun orze' cue' nu gruuñ lo nisyudoo, ni lo yu. Ni lo ni tub la yag waruuñ. 2Orze' bzaaca̱ tub anc yad yu par ze' nu driib doo. Yu ze' nuuy tub gyiib nu nac sey ni Ñgyoozh mbañ. Orze' anc ze' ye la brish ti nuy de tap anc ze', como bi guud rishbeey ni dey nu ted ziy lo yu gal nu lo nisyudoo. 3Orze' nay rab yu dey: ―¡Cue' ted zir lo yu, ni lo nisyudoo, ni lat de yag, gashtal gzuub la̱ de̱ sey cyuga de mbecy nu ricy coz nu rlagy Ñgyoozh! ―nay. 4Orze' güeña̱ nu rnii tub mbecy nu la be la tant mbecy de yu nu gzub sey cyuga ze'. Orze' nde' tub gaynal zub cyuu zub tap miily dey. De yu ze' bruuy lat dela nez mbecy Israeel. 5Orze' trocyup miily de mbecy Israeel nu bruu lat nez Judá, de yu ze' bzub sey cyuga dey. Ze' trocyupa' miily de yu nu bruu lat nez Rubén. Ze' trocyupa' miily de yu nu bruu lat nez Gad. 6Ze' trocyupa' miily de yu nu bruu lat nez Aser. Ze' trocyupa' miily de yu nu bruu lat nez Neftalí. Ze' trocyupa' miily de yu nu bruu lat nez Manasés. 7Ze' trocyupa' miily de yu nu bruu lat nez Simeón. Ze' trocyupa' miily de yu nu bruu lat nez Leví. Ze' trocyupa' miily de yu nu bruu lat nez Isacar. 8Ze' trocyupa' miily de yu nu bruu lat nez Zabulón. Ze' trocyupa' miily de yu nu bruu lat nez See. Ze' trocyupa' miily de yu nu bruu lat nez Benjamiing. 9Despuees ni de nu nde', orze' bgüi̱i̱, nunu bzaaca̱ nu yu' tub nac mbecy zigy tona' la. Par nu tanta' zigy dey, ni wagaca' dulab dey. Orze' de yu ze' bruuy lat de lo la nac mbecy. Bruu dey lat de lo la nez mbecy. Bruu dey lat de mbecy nu rnii de lo la riidz. Nunu mas gashtal lat dela mbecy bruu dey. Orze' bzu dey par lo yashily ze', nunu par lo biñ nu nac Shily ze'. Zu dey negy cacy duñ, nunu zu yaa dey yaa yagyiñ. 10Orze' ye la rbish ti dey. Orze' na dey: ¡Ñgyoozh, biñ nu zub lo yashily ze', nac mi biñ nu rboo mbañ de mbecy! ¡Ni' zi'l biñ nu nac Shily nac mi biñ nu rboo mbañ de mbecy! 11Orze' dela de anc yu'y dub yub la ze' nu zu yashily ze', gal nu ze' nu yu' de yu bel ze', gal nu ze' nu yu' tap de mbecy mbañ ze'. Orze' wes saa tiily dey gal lo yu la par ze' nu zu yashily ze'. Orze' briib zily dey Ñgyoozh. 12Orze' na dey: ¡Laab ni gac ñii! Yad ñi ni Ñgyoozh ni den nu gyed gyel mbecy nim. Yad ñi nim nu dugyim gyel lily. Yad ñi nim nu gad lagy mi dela coz. Yad ñi nim nu gyash mi de gras nu gric den nim. Yad ñi nim nu ca lagy den lom. Yad ñi nim nu gac gyicy mi dela coz. Yad ñi nim nu nac mi biñ fert. Dela nu nde' yad ñi ni Ñgyoozh ni den dub laa tiem par lo. ¡Laab ni gac ñii!, na dey. 13Orze' tub de yu bel ze' bdugyi'y lo̱. Orze' nay: ―¿Cyu mbecy, de yu nu zu negy cacy duñ? ¿Nunu ca bruu dey? ―nay. 14Orze' ya̱ mne̱e̱ loy: ―Ru rad lagy ru ca bruu dey ―mne̱e̱. Orze' nay rab yu ya̱: ―De yu re yu nu bruu lugaar ze' nu tona' la deet guc. De yu re yu nu gu shab, nunu bicy caacy dey ñi lo reñ biñ nu nac Shily. 15Nde' nu yu' dey ze' nu zu yashily nu riib ic Ñgyoozh. Dzi rel la ricy dey coz nu rlagy mi nañ yu' nim. Orze' biñ nu zub lo yashily ze' rsoow mi too dey par nu cue' nu shiñ gzac yu, gun yu' dey ze' nu zum. 16Ze' wazac zi ga' dey nu gyan yu. Ni nis wabigya' dey. Ni ba wachuu ga'ñ cuerp ni dey. Ni nu zig wayicy seeda'ñ dey. 17Gun biñ nu nac Shily nu zu gazel ze' nu zu yashily ze', mi ze' gñam dey gal nu rña mbecy Shily niy. Orze' cha num dey ze' nu driib nis, nis nu rbic gyel mbañ. Orze' Ñgyoozh cuiigy mi dela nis nu druu urlo dey ―nay.

will be added

X\