Apocalipsis 6

1Gaze' nu bzaaca̱ biñ nu nac Shily ze' psug mi tub sey lo gagy ñii. Orze' lo tap mbecy mbañ ze' güeña̱ nu rnii tub yu gal nu rnii guzii. Orze' nay: ―¡Da! ―nay. 2Orze' bgüi̱i̱. Orze' bzaaca̱ tub cuay cacy zu ma. Ze' yu nu riib cuay ze' zu yaay tub guaz. Nunu guud tub coron nu ri tooy. Orze' gush nez yu zay nu gyicy yu gyel yuu, nunu gyicy yu gan. 3Na ornu biñ nu nac Shily ze' psug mi sey cyup, orze' güeña̱ nu rnii mbecy cyup nu bruu lo tap mbecy mbañ ze'. Orze' nay: ―¡Da! ―nay. 4Orze' bruu zac tuuba' cuay coloor ña. Ze' yu nu riib ma ze', yu ze' guud rishbeey niy nu coy gyel ri zu gyishlombecy, nunu gyicy yu nu cut mbecy losa'y. Orze' guud tub mandzicy ily niy. 5Na ornu biñ nu nac Shily ze' psug mi sey chon, orze' güeña̱ nu rnii mbecy chon nu bruu lo de tap mbecy mbañ ze'. Orze' nay: ―¡Da! ―nay. Orze' bgüi̱i̱, nunu bzaaca̱ tub cuay cas zu ma. Ze' yu nu riib ma zu yaay tub igat beey. 6Orze' güeña̱ nu zaab ti' rnii lat de tap mbecy mbañ ze'. Orze' riidz ze' rniiñ: ―Nomaas tub cyil zi trig, nde' i mbecy tub dzi. Ze' chon cyil mbigy sebada, nde' laaba' i dey par tub dzi. Tees cue' gan ru asecy. Ni' zi'l ñup urbyay cue' gan ru ñii ―rniiñ. 7Na ornu biñ nu nac Shily ze' psug mi sey tap ze', orze' güeña̱ nu rnii mbecy tap nu mbañ ze'. Orze' nay: ―¡Da! ―nay. 8Orze' bgüi̱i̱, nunu bzaaca̱ tub cuay mñush. Orze' yu nu riib cuay ze', yu ze' lay Gyel Gut. Nunu ich yu ze' zaab tuuba' mbecy nu yaruuñ lugaar ze' nu yu' de añ. Orze' de yu ze' guud rishbeey niy nu cut yu tub nac mbecy lo tap nac yu. Ni mod gyicy dey dutuub la gyishlombecy. Gyicy dey nu gat mbecy nu mandzicy. Gyicy dey nu gat mbecy nu gyel yuu. Gyicy dey nu gat mbecy nu cubiñ. Gyicy dey nu gat mbecy nu güii. Nunu ni' zi'l gyicy dey nu cut de bañ gyish de mbecy. 9Na ornu biñ nu nac Shily ze' psug mi sey gay, orze' par nañ mez ni cuug bzaaca̱ nu yu' de mbecy nu gut yu yaa de mbecy nu nac nu bzu fert dey nu nac de riidz ni Ñgyoozh, nunu nu nac nu bicy paa dey nu bzat dey Ñgyoozh. 10Orze' de yu ze' ye la rniiy. Orze' nay: ―Ñgyoozh yon nu gya zir zu par dela mbecy, biñ nu ricy paa, ¿gul shuub dzi nu gri beer ni dela mbecy nu yu' gyishlombecy? Orze' gyabic ru i de mbecy nu biit de̱ ya̱ ―na dey. 11Orze' tub ga la dey guud tub negy cacy duñ zuy. Orze' bdunii nu gyicy cup dey pase̱z se tub tiem mi' zi'l, gashtal gza' la numbr ni de mbecy nu ricy riiñ ni Crisht, de yu nu ca lo cuen nu gat gal mod nu gut de yu nu bi gut ze'. 12Na ornu psug biñ nu nac Shily ze' sey shup, orze' bzaaca̱ nu briib tub duru ily. Orze' bet cow lo doo güidz gal nu na negy nu rzu mbecy ornu rat famil niy. Ze' beey byaña lo ma gal nu na reñ. 13Ze' de bel baa bet lag ma lo yu gal nu yet lag de urlas ca' ornu fert druu tub bi ily. 14Orze' mnit baa gal nu rzac tub lyag gyicy ornu rtub mbecy ñi. Orze' dela bicy nu dela yu nu ri lo nisyudoo, delañ bruu chuñ se'ñ. 15Orze' de rey ni gyishlombecy gua cach lo dey nañ de gyita' blyuu gal nu de lat gyita' ily ni de logyi'. Tublaazh la za dey nu de mbecy nu zu riiñ, gal nu de mbecy nu riib ic de soldad, gal nu de mbecy guani'ñ, gal nu de mbecy nu dzi cyiiñ, gal nu de mbecy nu byac moz por fers la, gal nu de mbecy nu a̱' nac moz por fers la. 16Orze' na dey rab yu de gyita' ily ze', gal nu de bicy ily: ―¡Bet lag to̱o̱ de̱ par nu cach ru de̱ ya̱, gun cue' nu gzac de̱ lo biñ nu zub lo yashily re, nunu cue' nu gzac de̱ lo cashtig nu cuic biñ nu nac Shily re! 17Gun bi pshuub dzi nu blaazha' zir dzi ily, dzi nu cuic mi cashtig. Orze' ¿cyu gac gagye loñ? ―na dey.

will be added

X\