Apocalipsis 5

1Orze' bzaaca̱ mbecy nu zub lo yashily ze' nuum tub gyicy nu ndudub nu yaa beem. Rup chu la' la lo gyicy ze' ta' letr. Orze' gagy se' nag nañ ñi nu duu iily. Tub ga se' nu nag de duu iily ze', ze' zub tub ga sey nu byaa nu biñ. 2Orze' bzaaca̱ tub anc nu dzi fert. Ye la rbish tiy nu rgugyi'y: ―¿Ca na mbecy nu cyiiñ yu sug yu sey ze'? Orze' tiily yu lo gyicy ze' ―na anc ze'. 3Tees wancyuu su ni tub la mbecy nu yu' gyibaa, ni mbecy nu yu' gyishlombecy ii, ni mbecy nu yu' lat de mbecy gut nu ñcyiiñ yu shaal yu loñ, ni nu güiiy loñ. 4Orze' tona' la bduna̱, gun wangad ni tub la mbecy nu ñcyiiñ yu shaal yu lo gyicy ze', ni nu ngüiiy loñ. 5Orze' na tub de yu bel ze' rab yu ya̱: ―Cue' gun ru, gun biidz, biñ nu bruu lat nez de mbecy Judá, biñ nu bruu cyong nez gyitoo rey Dabi, mi ze' bi bicy mi gan, nunu cyiiñ mi sug mi gagy sey ze'. Orze' tiily mi lo gyicy ze' ―na tub de yu bel ze'. 6Orze' gazel ze' nu zu yashily ze', laab ze' nu zu tap de mbecy mbañ ze', gal nu de yu bel ze'. Orze' ze' bzaaca̱ tub Shily. Rlyu nu ma ze' bi gua ma guc ma gun. Zub gagy nguaz ma, gal nu gagy urlo ma. Nde' yaruuñ Espiriit Yon ni Ñgyoozh, biñ nu nash numbr gagy. Mi ze' biñ nu bzuu nez Ñgyoozh nu cham dutuub la gyishlombecy. 7Orze' biñ nu nac Shily ze' guam lo biñ nu zub lo yashily ze'. Orze' gush mi gyicy nu ndudub nu zu yaa bee biñ nu zub lo yashily ze'. 8Na laab bdu' yaa lam gyicy ze', orze' de tap mbecy mbañ nu zu ze', nu de gal zu tap yu bel ze', dela dey gusu tib yu lo biñ nu nac Shily ze'. Orze' lo dela dey tub ga lay nuuy tub ga been nu la arpa. Nunu ni' dela dey nuuy tub ga bas or nu yu' yaal nañ. Orze' yaal ze', nde' yaruuñ ornu rnii nu de mbecy Ñgyoozh, de yu nu bi nac nim. 9Orze' biil dey tub cant cub. Orze' rul dey: Ru nac ru biñ nu cyiiñ nu gash gyicy nu ndudub. Orze' sug ru de sey niñ. Gun ru gut ru guc ru gun nu gua lo Ñgyoozh. Nunu pshu reñ ru. Gun orze' wiir de mbecy par nu cuic ru nim. Wiir de lo la nez mbecy, gal nu de lo la mbecy nu rnii reñ gal la riidz, gal nu de mbecy nu yu' dela gyedz, gal nu de mbecy nu yu' dela lugaar. 10De yu ze', bicy ru nu byac dey tub nac mbecy nu gyub ic Ñgyoozh. Nunu bicy ru nu byac dey uz par nu gac dey riiñ ni mi ze'. Nunu de yu ze' gyub ic yu gyishlombecy. Ni mod za de riidz nu biil dey. 11Gaze' nu bgüi̱i̱ nunu güeña̱ nu zaab ti' zigy tona' la anc nu yu' dub yub la ze' nu zu yashily ze', gal nu de tap mbecy mbañ ze', gal nu dela de yu bel ze'. Ze' yu' bee miyo̱o̱ la dey nac yu yu'y. 12Orze' ye la rbish ti dey. Orze' na dey: Biñ nu na gal nu na Shily nu gua gun lo Ñgyoozh, mi ze' yad ñi nim nu gyub ic mi dela coz, nunu yad ñi nim nu gyu' dela gyel nap yaam, nunu yad ñi nim nu gad lagy mi dela coz, nunu yad ñi nim nu nac mi biñ nu fert, nunu yad ñi nim nu ca lagy mbecy lom, nunu gyabic dey gyel mbecy nim, nunu griib zily dey mi, na dey. 13Orze' ni' zi'l güeña̱ nu rnii dela coz nu psa' lagy Ñgyoozh: dela coz nu yu' gyibaa, nu de coz nu yu' gyishlombecy ii, nunu de coz nu bi gut, gal nu de coz nu yu' lo nisyudoo. Orze' na dela nde': Gyabic den gyel mbecy ni biñ nu riib ic lo yashily, ni biñ nu nac Shily. Nunu ca lagy den lom, nunu grib zily den mi, nunu mi ze' gyub ic mi dela coz dub laa tiem, na de coz ze'. 14Orze' za' tap la de mbecy mbañ ze' rnii dey: ―¡Laab ni gac ñii! ―nay. Ze' de gal zu tap de yu bel ze' gusu tib dey. Orze' briib zily dey mi.

will be added

X\