Apocalipsis 4

1Na despuees ni de nu nde', orze' bgüi̱i̱. Orze' bzaaca̱ tub ro' gashtal gyibaa. Naal ñi. Nunu güeña̱ nu zaab ti' mbecy, laab yu nu mnii nu ya̱ loga. Ti' nu rnii ze' zaab ti'ñ gal nu zaab ti' tub trompet. Orze' nay: ―Gup gashtal ii. Orze' lyu̱u̱ lor dela coz nu gac despuees ni de nu nde' ―nay. 2Laab or la ze', orze' gutib ic Espiriit Yon ni Ñgyoozh ya̱. Orze' bzaaca̱ tub yashily ze' nu riib ic mbecy gashtal gyibaa la. Ze' zub tub mbecy loñ. 3Orze' mbecy nu zub lo yashily ze' rabeey gal nu rabee tub gyita' nu ryaal gyi lo o gal nu rabee tub gyita' coloor gyee reñ. Nunu dub yub la ze' nu zu yashily ze' zu tub shelcuit nu na gal nu na tub gyita' ca' nu ryaal gyi lo. 4Orze' laab ze' nu zu yashily ze' dub yub la par loñ, zu ga' gal zu tap yashily ze' nu riib ica' mbecy. Ze' lo gal zu tap yashily ze', zub gal zu tap yu bel. Orze' dela dey zuy negy cacy iily la, nunu ri coron or too dey. 5Ze' nu nguaa de yashily ze' rzu gyi ni guzii. Orze' zaab ti' guzii, nunu pang la yet ñi. Orze' par lo yashily ze' zu gagy candiil rca gyi loñ. Orze' gagy candiil ze', nde' muesht ni Espiriit Yon ni Ñgyoozh, biñ nu nash numbr gagy. 6Nunu laaba' par lo yashily ze' ri tub coz nu na gal nu na tub nac nis ily, nu rabee gal nu rabee guan nu rdugyi yaa lo. Orze' laab gazel ze' nu zu yashily ze', dub yub la cuit ñi zu tap mbecy mbañ nu psa' lagy Ñgyoozh. De yu ze' ta' urlo dey dutuub la cuerp niy. Gal nu ta'ñ par lo dey ni' zi'l ta'ñ par ich yu. 7Orze' yu loga la nay gal nu na tub biidz. Ze' yu cyup nay gal nu na tor. Ze' yu chon rabee loy gal nu rabee lo mbecy. Ze' yu tap nay gal nu na tub psi ornu rded ma lo bi. 8Lo tap de mbecy ze' tub ga la dey zub shuup ga lowe'y. Nunu dutuub la cuerp ni dey ta' urloy. Dzi rel la wacheca dey nu rniiy: Ñgyoozh, biñ nu nac Shuaan de̱, biñ nu gac gyicy dela coz, mi ze' tona' la yon mi. Mi ze' biñ nu nil nac gulas, nunu biñ nu nac na, nunu laab mi biñ nu cyid par lo, rnii dey. 9Orze' de tap anc ze' ryabic dey gyel mbecy ni Ñgyoozh, biñ nu zub lo yashily, nunu zum tub la. Orze' briib zily dey mi, nunu briic dey gras nim. 10Na laab mnii la dey nde', orze' de gal zu tap yu bel ze' wes saa tiily la dey lo biñ nu zub lo yashily ze'. Nunu pca dey mi ze', biñ nu zu tub la. Orze' briib dey coron niy ze' nu zu yashily nu riib ic mi. Orze' na dey: 11Shuaan de̱, Ñgyoozh ne̱ de̱, ru yad ñi nir nu gyabic de̱ gyel mbecy nir, nunu yad ñi nir nu ca lagy de̱ lor, nunu yad ñi nir nu gac gyicy ru dela coz, gun dela coz yu'ñ par nu nde' coz nu ru rlagy ru. Nunu par nu nac nu nde' coz nu ru rlagy ru, nde' nu psa' lagy ru ñii, na dey.

will be added

X\