Apocalipsis 3

1’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Sardis: “Nii de riidz ni biñ nu ricy cup Espiriit Yon ni Ñgyoozh, biñ nu nash numbr gagy, gal nu gagy de bel baa ze'. Ya̱ rad lagya̱ dela coz nu ricy der. Rad lagya̱ nu bi gut der, mas zaab riidz nu mbañ ru. 2Brish der yaa, gun na der gal nu na mbecy nu nas. Orze' bzu nap der de coz nap nu bicy ru, de coz nu bi zuu la nu nit lo, gun ya̱ rad lagya̱ nu yu' falt ni der par lo biñ nu nac Ñgyoozh ne̱ nu nac de coz nu ricy ru. 3Orze' bicy der nu gyeza' lagy ru de riidz nu bi güeñ ru, de riidz nu bi pshet ic der ni. Bzuub gyidag der ñii, nunu mne' der de cyi nu ricy ru. Ze' benu wayish der yaa, orze' ya̱ yapa̱ lo der gal nu ryiid tub gubaan. Tiem nu a̱' sa' la lagy der, orze' gru'ña̱ lor. 4Ze' yu' la be mbecy lat de ru mbecy Sardis nu wacsaan yu nu gabag shab yu nu nac cyi. Orze' de mbecy ze' gzu dey shab cacy yu. Orze' chesa nu dey ya̱, gun yad ñi ni dey. 5De mbecy nu gyicy gan, orze' gzu dey shab cacy yu. Orze' ya̱ rila wadiba̱ nu la dey lo lisht nu ri nañ libr nu ta' nu la de mbecy nu cui mbañ, sinu ya̱ du̱' lo̱ dey lo Ñgyoozh Uza̱ gal nu lo de anc nim. 6¡De mbecy nu zub gyidag, rlagy ñi nu gzuub gyidag yu de coz nu rnii Espiriit Yon ni Ñgyoozh lo de mbecy ne̱!” 7’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Filadelfia: “Nii de riidz ni biñ yon, ni biñ nu ricy paa. Nii de riidz ni biñ nu ricy cup rishbeey nu bruu lat de riidz nu mnii Ñgyoozh lo Dabi. Ricy cup mi rishbeey nu shaal mi nez, nez nu rila wac soow mbecy. Nunu ornu soow mi nez ze', orze' ni tub la mbecy wac shaal yu. 8Rad lagya̱ dela coz nu ricy der. ¡Güii! Ya̱ pshaala̱ tub nez par de ru nu ni tub la mbecy wac soow yu. Rad lagya̱ nu a̱' fert der. Mas ni na der, tees bicy paar nu de riidz nu mne̱e̱, nunu wancyuu der lo̱. 9Orze' de mbecy nu druu lat de mbecy ni nuras, de yu nu rnii nu nac mbecy Israeel, tees walab rishli nac dey, gun rguu dey, orze' gyicya̱ nu cyid dey lor. Orze' zu tib dey lo der, gun orze' gad lagy dey nu ya̱ rca̱ ru. 10De ru bicy paa der nu de riidz nu mne̱e̱ lor. Riidz ze', nde' bicy der nu gagyer. Nde' nu ya̱ zaab ica̱ de ru ornu shuub dzi nu zac zi dela mbecy nu yu' gyishlombecy, gun dzi ze' gyicya̱ preb dela mbecy nu yu' gyishlombecy. 11Bi yap gyiilya̱. Cue' laa yaa der coz nu bi ricy cup ru, gun orze' ni tub la mbecy wac coy ir. 12Dela de yu nu gyicy gan, gyicya̱ nu gac dey yabi ni yu' ni Ñgyoozh ne̱. Nunu rila waruu ga' dey lugaar ze'. Orze' ya̱ ca̱a̱ nu la Ñgyoozh ne̱ lo cuerp ni dey. Nunu ca̱a̱ ga̱' nu la gyedz nim, Jerusaleeng cub nu gruu gyibaa ze' nu zub mi. Ca̱a̱ ñii laaba' lo cuerp ni dey. Nunu ca̱a̱ ga̱' nu la cuba̱ laab lo cuerp ni dey. 13¡De mbecy nu zub gyidag, rlagy ñi nu gzuub gyidag dey de riidz nu rnii Espiriit Yon ni Ñgyoozh lo de mbecy ne̱!” 14’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Laodicea. “Nii de riidz ni biñ nu nac nu rishli, ni biñ nu ricy paa nu de coz nu rnii. Nunu rishli rniim. Nunu Ñgyoozh psa' lagy mi dela coz nu nac mi. 15Rad lagya̱ dela coz nu ricy der. Neña̱ nu walab nu dzi rca der ya̱, nunu walab nu waca der ya̱. Gyet zir lagya̱ benu dzi ca der ya̱, o gyet zir lagya̱ benu wacaa la der ya̱. 16Tees como beñ zi'l rca der ya̱, walab nu dzi rca der ya̱, ni walab nu dzi waca der ya̱, nde' nu ya̱ gaba̱ der. 17Orze' rnii der nu nac ru guani'ñ, nunu bi gup der, nu wagyicy falt ni tub la coz nir. Ze' wagad lagy der nu nac ru mbecy nu se la la sac. Nac ru mbecy shni. Nac ru mbecy zi. Nac ru lo ca'. Nac ru mbecy yagy. Ni mod na der par de coz ne̱ ya̱. 18Laab ni nde' nu rdo̱o̱ rishlor nu gyicy der gal nu rlagy ñi par nu gad gyel nap ne̱ ya̱ ni der, nunu par nu gad gyel nap nu na gal nu na or nu byanap nañ yo, gun orze' rishli gaal gyaguani'ñ der. Orze' gad shab cacy der nu soow ñi cuerp yagy ni der, gun orze' cue' nu to' lo chesa der. Orze' gad cuaan nu cab der urlor par nu gac zac ru. 19Gun de mbecy nu rca̱, rshuu du̱ dey, nunu ricy napa̱ dey. Orze' bloo lo der, nunu mne' der dela cyi nu ricy ru. 20Ya̱ ca̱ gyero' nir nu rne̱e̱ du̱ ru. Ze' benu cyu zi'l mbecy gyeñ yu nu rne̱e̱, orze' shaal yu ro' niy nu chu̱' nañ yu'y. Orze' da̱w du̱ yu tublaazh la. 21Orze' de yu nu gyicy gan, orze' ya̱ grica̱ rishbeey nu gzub nuy ya̱ lugaar ze' nu riib ica̱, ni' zi'l gal nu ya̱ bicya̱ gan, nunu guud cuit Uza̱ gusuba̱ lugaar ze' nu riib ic mi. 22¡De mbecy nu zub gyidag, rlagy ñi nu gzuub gyidag yu ni de coz nu rnii Espiriit Yon ni Ñgyoozh lo de mbecy ne̱!” ―na Jesucrisht.

will be added

X\