Apocalipsis 22

1Gaze' nu anc ze' blyuuy tub gyoow ni nis nu rbic gyel mbañ lo̱. Ryal ñi gal nu ryal tub gyita' nu rdugyi yaa lo. Orze' gyoow ze' bruuñ gal lugaar ze' nu riib ic Ñgyoozh gal nu biñ nu nac Shily. 2Orze' nde' ded ñi gazel nez zub lo ni gyedz ze'. Orze' rup chu la' ga' la ru' gyoow ze' nash yag nu rbic gyel mbañ. Orze' trocyup tir rbic ñi uugy nañ tub ña'n: tub ga tir tub ga beey. Nunu lyag niñ cyiiñ ñi par nu gyicy ñi guñaa nuñ de lo la mbecy. 3Orze' ni tub la coz nu bzaa lagy Ñgyoozh ni sac ñi lat gyedz ze'. Orze' lat gyedz ze' zu yashily ze' nu riib ic Ñgyoozh gal nu biñ nu nac Shily. Orze' de yu nu ricy coz nu rlagy Ñgyoozh driib zily dey mi lugaar ze'. 4Lo nu loo la rzac dey mi, nunu ca nu lam cyuga dey. 5Nunu lugaar ze' saca' rel. Nunu de mbecy nu yu' ze' walagya'ñ gyi ni candiil ni dey. Ni walagya'ñ ba ni dey. Gun Ñgyoozh Shuaan den rbic mi yaa lat dey. Nunu de mbecy ze' gyub ic dey tub la. 6Gaze' nu na anc ze' rab yu ya̱: ―De riidz ii, nii coz rishli, nunu gac gyicy cup ru consuel loñ. Orze' laab Ñgyoozh, biñ nu rbic Espiriit nim ni de yu nu rnii por cuen nim, mi ze' bzuu nez mi anc nim nu chay lo de yu nu ricy coz nu rniim, gun orze' cuic yu nu gad lagy dey la na coz nu sñuu ga gac. 7’Orze' na Jesuuz: “¡Ya̱ yap gyiilya̱! ¡Dzi ni de mbecy, yu nu gyicy yac ni de riidz nu bi ca lo gyicy ii!” nam ―na anc ze'. 8Orze' laab ya̱, Waa, bzaaca̱ nunu güeña̱ de coz ii. Na ornu blazh bzaaca̱ nunu güeña̱ de coz ii, orze' gusab tiilya̱ yeñ gyi' anc, yu nu blyuu de coz ze' lo̱. Ni bicya̱ par nu riib zilya̱ yu. 9Orze' nay rab yu ya̱: ―¡Cue' ni gyicy ru lo ya̱! Gun ru nu ya̱ nac naa losa'n nu ricy na de coz nu rnii Ñgyoozh, nunu nac naa mbecy nu ricy yac de riidz nu bi ca lo gyicy ii. Dela den tub zi'l nac naa. Orze' driib zily den Ñgyoozh ―na anc ze'―. 10’Orze' cue' cach ru'r de riidz ni Ñgyoozh nu bi ca lo gyicy ii, gun sñuu ga shuub tiem nu gyu' niñ. 11Orze' cyu zi'l mbecy a̱' nap, orze' zaab ricy lay coz a̱' nap. Orze' cyu zi'l mbecy cyi, orze' zaab ricy lay coz cyi. Orze' cyu zi'l mbecy nap zaab ricy lay coz nap. Nunu cyu zi'l mbecy ni Ñgyoozh, zaab ricy paa lay nuy mi. 12Gaze' nu na Jesuuz: ―¡Ya̱ yap gyiilya̱! Nunu yap du̱ i de mbecy. Orze' gyabica̱ ñii ni de mbecy dub gal nu na coz nu bicy dey. 13Ya̱ naca̱ A, nunu naca̱ zeta. Nunu naca̱ biñ nu nil zu nese nu loga. Nunu naca̱ biñ nu nil zu ornu gya' loñ. Nunu naca̱ biñ nu bzuub gyi'ñ. Nunu naca̱ biñ nu za' loñ ―na Jesuuz. 14Dzi ni de mbecy, benu racaacy yu shab yu, gun orze' ricy cup dey rishbeey nu gow yu uugy ni yag nu rbic gyel mbañ. Nunu ricy cupa' dey rishbeey nu chu'y ro' ni gyedz ze'. 15Orze' zet ru' gyedz chu' de mbecy a̱' nap. Yu' de mbecy nu ricy fis ni gyel tu'. Yu' de mbecy nu ricy gyel che̱'. Yu' de mbecy nu rut losa'. Yu' de mbecy nu driib zily nab. Yu' de mbecy rguu. Rguu dey nu nac mod nu ricy yu. Nunu rguu dey nu nac coz nu rniiy. Dela de yu ze' yu' dey par ich gyedz ze'. 16Orze' na Jesuuz: ―Ya̱, Jesuuz, bzuu neza̱ anc ne̱ nu chay lo de mbecy ne̱, gun orze' shaal yu de coz ze' lo dey. Orze' ya̱ naca̱ nez rey Dabi. Ya̱ naca̱ bel rza' yu nu dzi rbic yaa ―na Jesuuz. 17Orze' Espiriit Yon ni Ñgyoozh gal nu nob ni biñ nu nac Shily mnii dey. Orze' na dey: ―¡Da! ―na dey. Orze' de mbecy nu bzuub gyidag riidz ze' rnii ga' dey: ―¡Da! ―rnii dey. Orze' ca na de mbecy nu rbigy nis, benu rlagy yu, gac cyid yu go'y nis nu rbic gyel mbañ. Nunu leew la gad ñi. 18Orze' ya̱, Waa, do̱o̱ rishlo dela mbecy nu zuub gyidag de riidz ni Ñgyoozh nu bi ca lo gyicy ii. Benu ca na mbecy gzuub yu riidz lo de riidz nu bi ca lo gyicy ii, orze' ni' zi'l Ñgyoozh cuic mi cashtig nu bi ca lo gyicy ii ni dey. 19Nunu benu ca na mbecy shet naañ yu riidz ni Ñgyoozh nu bi ca lo gyicy ii, orze' Ñgyoozh com uugy nu dugyiy ni yag nu rbic gyel mbañ, nunu co ga'm yaay lugaar ze' nu dugyiy lat gyedz nim. De coz ze' bi cañ lo gyicy ii. 20Orze' biñ nu mnii dela coz ze' nam: ―Laab ni. ¡Ya̱ bi yap gyiilya̱! ―nam. Laab ni gac ñii. ¡Shuaan na Jesuuz, da! 21Orze' Shuaan den Jesuuz nap gyicy num dela de mbecy nim.

will be added

X\