Apocalipsis 21

1Orze' gaze' nu bzaaca̱ gyibaa cub nu gyishlombecy cub. Orze' mnit gyibaa nu psa' lagy Ñgyoozh nu loga la, nunu mnita' gyishlombecy nu psa' lagy mi nu loga la. Nunu saca' nisyudoo. 2Orze' bzaaca̱ gyedz ni Ñgyoozh. Gyedz ze' lañ Jerusaleeng cub. Orze' bzaaca̱ ñii bruuñ lo Ñgyoozh gyibaa bet ñi. Bi zu lily ñii gal nu zu lily tub nob mñaa nu chelaam ñgyeem. 3Orze' güeña̱ nu ye la zaab ti' rnii. Ti' ze' bruuñ ze' nu riib ic Ñgyoozh. Orze' nay: ―Na Ñgyoozh bi rcyiiñ mi lat de mbecy. Nunu cyiiñ num dey par lo. Nunu de yu ze' gac dey mbecy nim. Nunu laab Ñgyoozh gac num dey. Nunu mi ze' gac mi Ñgyoozh ni dey. 4Orze' mi ze' cyib mi nis urlo dey. Orze' de yu ze' rila wata'y, ni wayicy shni ga' dey, ni wuna' dey, ni wagatowa' ni dey. Gun dela coz nu gu' gulas bi bded niñ ―nay. 5Orze' biñ nu riib ic lo yashily ze' nam: ―Na gyicy cuba̱ dela coz ―nam. Orze' na ga'm rab mi ya̱: ―Pcaa de riidz ii, gun nii riidz rishli, riidz nu gac gyicy cup ru consuel lo ―nam. 6Orze' mnii ga'm lo̱. Orze' nam: ―Bi bya' loñ. Ya̱ naca̱ A, nunu naca̱ zeta. Naca̱ biñ nu nil zu nese nu loga la. Nunu naca̱ biñ nu nil zu ornu gya' loñ. Orze' benu ca na mbecy rbigy yu nis, orze' ya̱ leew la rica̱ nis go'y. Rica̱ nis nu druu ze' nu driib nis nu cuic gyel mbañ go'y. 7Cyu zi'l mbecy nu gyicy gan, orze' rica̱ de nis ze' go'y. Orze' ya̱ gaca̱ Ñgyoozh ni dey, nunu de yu ze' gac yu i'ña̱. 8Tees de' zir mbecy dugyi dey nu chay reña' se'. De mbecy dzidz, de mbecy nu wacheña lagy, de mbecy nu shiñ ricy, de mbecy nu rut losa', de mbecy nu ricy gyel che̱', de mbecy nu ricy fis gyel tu', de mbecy nu driib zily nab, dela de yu nu rguu, dela de yu ze' dugyi dey nu chay lo gyel nu rca gyi nu asufre. Nde' nu gat dey nu cyupa'. 9Orze' gagy anc zu yaay gagy taz ni cashtig. Laab nde' la cashtig nu blazh. Orze' lat de yu ze' bruu tub yu biid yu lo̱. Orze' nay rab yu ya̱: ―Da. Orze' lyu̱u̱ nob lor. Mi ze' biñ nu gac mñaa biñ nu nac Shily ―nay. 10Orze' pcaal mniiñ lo̱ nu nac Espiriit Yon ni Ñgyoozh. Orze' mniiñ nu gua nu tub anc ya̱ too tub bicy nu gya. Orze' blyuuy gyedz Jerusaleeng lo̱. Nde' gyedz ni Ñgyoozh nu bruu gal lom gyibaa bet ñi. 11Orze' gyedz ze' tona' la cyit zu. Ryal rabeeñ nu nac gyel lily ni Ñgyoozh. Ryal rabeeñ gal nu rabee tub gyita' nu dzi gya sac, gal nu rabee gyita' nu la jaspe. Orze' rabee loñ gal nu rabee tub gyita' nu rdugyi yaa lo. 12Zu tub lo' gya dub yub la ru' gyedz ze'. Orze' lo' ze' ricy cup ñi trocyup ro'. Ze' yu' trocyup anc. Tub gay riib ic yu tub ga ro'. Orze' lo de ya ro' ze' ca nu la de trocyup nac nez de mbecy Israeel. 13Orze' tub la' ga cuit ñi ca chon ro'. Par ze' nu driib doo ca chon ro'. Na ornu güiin par ze' nu rza doo, ca ga' chon ro'. Na par yaa reg na ca ga' chon ro'. Na par yaa been, ca ga' chon ro'. Orze' tub la' ga cuit ñi ca chon ro'. 14Orze' lo' ze' zub ñi too trocyup gyita' ily. Ze' lo de gyita' ze' ca nu la de trocyup aposht ni biñ nu nac Shily. 15Orze' anc nu mnii lo̱ nuuy tub ya beey or par nu tush peey gyedz ze', nu ro' niñ, gal nu lo' niñ. 16Orze' gyedz ze' cuadrad riñ. Nu she nu nu tuñ tub zi'l nañ. Orze' anc ze' ptush peey gyedz ze' nu ya beey niy. Orze' nde' yu'ñ cyup miily zub cyup gaynal kilometros nu tuñ. Nde' nu tuñ ñi. Nu tuñ, nu gyañ, nu nu sheñ tub zi'l beey yu'ñ. 17Orze' anc ze' brugyi' nu rtush peey lo' niñ. Orze' nde' gayon zub gaay metr nu gya, dub gal nu na ya beey nu bicy nuy riiñ. Nunu ya beey ze' ricy ñi mod nu ricy ya beey ni cualcyer la mbecy. 18Orze' lo' ze' byaañ nu tub lo gyita' nu la jaspe. Nunu gyedz ze' byaañ nu du ub or la. Nunu rabeeñ gal nu rabee guan nu nap byecy lo. 19Orze' de simient ni lo' ze', nde' bdudiiñ nu gyita' nu dzi gya sac. Orze' gyita' loga la ni simient ze', nde' tub gyita' nu la jaspe. Ze' gyita' cyup, nde' tub gyita' nu la zafiro. Ze' gyita' chon, nde' tub gyita' nu la ágata. Ze' gyita' tap, nde' tub gyita' nu la esmeralda. 20Ze' gyita' gay, nde' nu la ónice. Ze' gyita' shup, nde' tub gyita' nu la cornalina. Ze' gyita' gagy, nde' tub gyita' nu la crisólito. Ze' gyita' shuñ, nde' tub gyita' nu la berilo. Ze' gyita' ga, nde' tub gyita' nu la topacio. Ze' gyita' ti, nde' tub gyita' nu la crisoprasa. Ze' gyita' trotub, nde' tub gyita' nu la jacinto. Ze' gyita' trocyup, nde' tub gyita' nu la amatista. 21Orze' lo trocyup ro' ze', orze' tub ga ro' byaañ nu tub urndub nu dzi ñgyup sac. Orze' de cay nu nguaa lat gyedz ze', byaañ nu ga ub or la. Rabeeñ gal nu rabee guan nu nap byecy lo. Ni rabeeñ. 22Na ya̱ wansaca̱ ni tub yu' wedz lat gyedz ze'. Gun Ñgyoozh Shuaan den, biñ nu gac gyicy dela coz, nunu biñ nu nac Shily, de mi ze' nac mi yu' wedz ni gyedz ze'. 23Orze' gyedz ze' walagy ñi yaa ni doo ni yaa ni beey, gun gyel lily ni Ñgyoozh, nde' rbic ñi yaa. Nunu biñ nu nac Shily ze', mi ze' nam gal nu na candiil ni gyedz ze'. 24Orze' dela mbecy nu yu' gyishlombecy chesa dey nu nac yaa ni gyedz ze'. Nunu de rey nu yu' gyishlombecy cha zeeñ dey gyel nap niy gyedz ze'. 25Orze' de ro' ze' naal ñi dub dzii la. Ni wasoowa' dey ñi gun saca' rel. 26Orze' cha zeeñ de mbecy nu yu' gyishlombecy dela gyel nap niy nu dela coz cyit na niy gyedz ze'. 27Orze' ni tub coz a̱' nap wac chu'ñ lat gyedz ze'. Ni mbecy nu shiñ ricy, ni mbecy nu rguu wac chu'y lat gyedz ze'. Tub zi la de yu nu bi ca nu la lo libr ni biñ nu nac Shily, lo libr nu ta' nu la de mbecy nu gruu mbañ, tub zi la de yu ze' gac chu'y gyedz ze'.

will be added

X\