Apocalipsis 20

1Orze' bzaaca̱ tub anc bet yu nu bruuy gyibaa. Orze' yu ze' zu yaay ya gyiib ni gabily. Nunu nuu ga'y tub caden ily. 2Orze' anc ze' bicy yu gan low dañ ze'. Laab ma ze' nac ma bily nu nil zu nese gulas. Nunu nac ma nuras. Nunu nac ma nushow. Orze' ma ze' pcyiig yu ma nu caden par tub miily ña'n. 3Orze' pshet lag yu ma gyerye ily nu rnii dey gabily. Orze' psoow nicy yu ro' niñ. Orze' pcaay tub beey loñ. Gun orze' cue' ga' nu gad mod nu guu ma de mbecy nu yu' de lo la nasyoong gashtal za' la tub miily ña'n. Na ornu lazh tub miily ña'n ze', orze' rlagy ñi nu dulaa ma par ñuu zi zi'l tiem. 4Orze' bzaaca̱ de yashily ze' nu gyub ic mbecy. Nunu bzaaca̱ de mbecy nu zub lo de yashily ze'. Orze' Ñgyoozh briic mi rishbeey nu gri bee dey ni losa'y. Orze' ni' zi'l bzaaca̱ de espiriit ni de yu nu pcyug mbecy too nu nac nu bzat dey Crisht nunu nu nac nu pshaal dey riidz ni Ñgyoozh. Orze' de yu ze' wanriib zily dey ni bañ dañ ze' ni nab ma. Ni wanca beey ni ma cyuga dey, ni yaa dey. Orze' de yu ze' byabañ dey. Orze' byub ic dey tublaazh la nu Crisht par tub miily ña'n. 5De' zir de mbecy gut wangyabañ dey gal bza' la tub miily ña'n ze'. Nde' tir loga la nu gyabañ mbecy. 6¡Dzi ni de mbecy benu gaza'y gyabañ yu tir loga la! ¡De yu ze' nac yu mbecy ni Ñgyoozh! Saca' mod nu gat dey tuuba' tir. Orze' de yu ze' gac dey uz nu gzu riiñ lo Ñgyoozh gal nu lo Crisht. Nunu gyub ic dey tublaazh nu mi ze' tub miily ña'n. 7Na ornu za' tub miily ña'n na, orze' dulaa nuras gruuy nañ gyerye ze'. 8Orze' yu ze' cha guuy de mbecy nu yu' dela nasyoong nu yu' dutuub la gyishlombecy. Cha guuy nasyoong Gog nu Magog. Orze' gyicy tublaazh yu dey par gyel yuu. Zigy dey gac yu gal nu nguaa yu uzh ru' nisyudoo. 9Orze' rush las dey dutuub la gyishlombecy. Orze' ri lo' dey lugaar ze' nu gyeche de mbecy ni Ñgyoozh. Nunu ri lo' ga' dey gyedz nu dzi rcam. Orze' gruu gyi gal gyibaa gyet ñi. Orze' nde' nit loñ dey. Orze' gya' lo dey. 10Orze' nuras, yu nu bguu de yu ze', orze' shet lag dey yu lo tub gyel ni gyi nu asufre. Orze' bañ dañ ze' gal nu mbecy fals nu rnii por cuen ni Ñgyoozh ze', de yu ze' bi bet lag dey gyel ze' anzir. Orze' lugaar ze' gzac zi dey dzi rel la par tub la. 11Gaze' nu bzaaca̱ tub yashily. Zily nac ñii. Nunu caacy ñi. Nunu bzaaca̱ biñ nu zub lo yashily ze'. Lat nu zub mi lugaar ze' orze' mnit gyishlombecy, nunu mnita' gyibaa. Orze' wacabee la ca zañ. 12Orze' bzaaca̱ dela mbecy nu bi gut nu zu par lo ze' nu zu yashily ze'. De yu lily, nu de yu gyidz, dela dey zuy par lo yashily ze'. Gaze' nu byaal lo de libr. Orze' ni' zi'l byaal lo libr nu ta' nu la de mbecy nu cui mbañ. Orze' de mbecy nu bi gut duri bee ni dey dub gal mod nu bicy dey gal nu bi cañ lo de libr ze'. 13Gaze' nu dela añ nu ri lo nisyudoo bruu zaca' dey, nunu dela añ nu yu' lugaar ze' nu yu'y bruu zaca' dey. Orze' tub ga la dey duri bee niy dub gal nu na coz nu bicy dey. 14Orze' lugaar ze' nu cha mbecy ornu gat yu, lugaar ze' bet lag ñi lo gyel ni gyi ze'. Gyel ni gyi ze', nde' lugaar nu rnii dey nu gat mbecy nu cyupa'. 15Orze' cyu zi'l mbecy nu sac nu la lo libr nu ta' nu la de mbecy nu cui mbañ, orze' de yu ze' gyet lag yu lo gyel ni gyi ze'.

will be added

X\