Apocalipsis 2

1’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Éfeso. Orze' i mod pcaa nam: “Biñ nu zu yaa gagy bel baa par yaa bee, biñ nu rded lat de gagy nac de candeler or ze', 2mi ze' gniim lor: Ya̱ rad lagya̱ dela coz nu ricy der. Rad lagya̱ nu rboo lo der nu nac riiñ ne̱, nunu rad lagya̱ nu ragyee der ornu deet rac nu nac ya̱. Nunu rad lagya̱ nu wacsaan der nu chesa nu mbecy a̱' nap ru. Sinu de ru bicy ru preb de yu nu rnii nu nac aposht, tees walab rishli nac dey, nunu byu' bee nu nac dey mbecy rguu. 3Gugyee der nu tona' la bzac zir nu nac ya̱, nunu wangazeed der lo de coz ne̱. 4Tees ya̱ ricy cupa̱ tub gyel cha' ic nu nac ru. Nde' nu waca ga'r ya̱ gal nu pcar ya̱ nu loga. 5Orze' bicy der nu gyeza' lagy ru nu gulas dzi gya zu der nu nac de coz ne̱. Ze' na byagash der. Orze' mne' der de cyi nu ricy ru, nunu bicy der gal nu bicy ru nu loga. Benu wane' der cyi nu ricy ru, orze' ya̱ yapa̱ lo der. Orze' lo chu̱ candeler nir lugaar niñ. 6Tees tub coz nu zañ faboor ni der. Nde' nu rzi lagy der lo de coz nu ricy mbecy Nicolaítas gal nu ni' ya̱ rzi lagya̱ looñ. 7¡De mbecy nu zub gyidag rlagy ñi nu gzuub gyidag dey coz nu rnii Espiriit Yon ni Ñgyoozh lo de mbecy ne̱! De mbecy nu gyicy gan, de yu ze' grica̱ rishbeey ni dey nu gow yu uugy nu ta' ni yag nu rbic gyel mbañ nu zub tuuba' lugaar cyit zu ni Ñgyoozh” ―nam―. 8’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Esmirna. Orze' i pcaa nam: “Biñ nu nil zu nese nu loga la, biñ nu nil zu ornu gya' loñ, biñ nu gut, nunu byabañ mi, mi ze' rniim, orze' nam: 9Rad lagya̱ nu tona' la bzac zi der par nu nac ya̱, nunu rad lagya̱ nu tona' la gyel zi zu der. Tees rishli, tona' la guani'ñ der nu nac de coz ni Ñgyoozh. Rad lagya̱ nu de mbecy nu rnii nu nac mbecy Israeel rnii zi dey ni der. Rnii dey nu nac yu mbecy Israeel tees walab rishli, sinu bruu dey lat de mbecy ni nuras. 10Cue' dzib der nu nac de coz nu gzac zir. Orze' nuras gyicy yu nu gyet lag la be der nañ yu' gyiib par nu gac preb der ben a ruu cyigy der. Orze' gzac zi der la be zi'l tiem. Orze' bicy paa der gashtal gat lar, gun orze' gyicya̱ nu gyicy der gan gyel mbañ. 11¡De mbecy nu zub gyidag rlagy ñi nu gzuub gyidag dey ni de coz nu rnii Espiriit Yon ni Ñgyoozh lo de mbecy ne̱! De mbecy nu gyicy gan, se la la coz zac dey ornu gat de mbecy tir cyup” ―nam―. 12’Pcaa lo gyicy de riidz nu rne̱e̱ par nu gad lagy anc ni de mbecy ne̱ nu yu' Pérgamo. Orze' i pcaa nam: “De riidz ii, nii riidz ni biñ nu nuu mandzicy nu rup chu la' la ru' ri'ñ. 13Rad lagya̱ ca lugaar rcyiiñ der. De ru rcyiiñ der ze' nu riib ic nuras. Mas ni, tees ricy paa der ne̱. Nunu wacheca der nu ricy cup ru consuel lo̱ mas lat de dzi nu biit mbecy Antipas, yu nu bicy paa nu rzat ya̱. Biit dey yu ledz der, ze' nu rcyiiñ nuras. 14Tees ya̱ ricy cupa̱ la be gyel cha' ic nu nac der. Lat de ru yu' la be mbecy nu walagy yu laa yaay de coz nu blyuu Balaam, yu nu briic consef ni Balac par nu gad lagy yu lac mod gyicy yu par nu gyicy yu nu gyicy mbecy Israeel coz cyi. Blyuuy ni dey nu gow yu de coz nu gua lo nab, nunu blyuuy ni dey nu gal dey losa'y nu wanchelaay. 15Ni zi'l yu' tub naca' mbecy lat der nu walagy dey laa yaay de coz nu rlyuu de mbecy Nicolaítas. 16Nde' nu na mne' der de cyi nu ricy ru. Gun benu wane' der cyi nu ricy ru, orze' yap gyiilya̱ lo der. Orze' chuco̱o̱ du̱ der nu mandzicy nu grib ru̱'. 17¡De mbecy nu zub gyidag, rlagy ñi nu gzuub gyidag dey de coz nu rnii Espiriit Yon ni Ñgyoozh lo de mbecy ne̱! Orze' de yu nu gyicy gan grica̱ tub lo gyit ni Ñgyoozh nu ri ngach nu la maná gow dey. Nunu ni' zi'l grica̱ tub gyita' cacy ni dey. Orze' ca tub nu la cub dey loñ. Nde' se cyu la rad lagy, sinu tub zi la yu nu gad ñi ni” ―nam―. 18’Pcaa tuuba' tir lo gyicy de riidz nu rne̱e̱ par nu gad lagy anc ni de mbecy ne̱ nu yu' Tiatira. Orze' i pcaa nam: “Nii de riidz nu rnii I'ñ Ñgyoozh, biñ nu na urlo gal nu na lyush gyi. Ze' gyi'm nañ gal nu na gyiib cach nu ryanap nañ yo. 19Rad lagya̱ dela coz nu ricy der. Rad lagya̱ nu dzi rca der losa'r. Rad lagya̱ nu ricy cup ru consuel lo̱. Rad lagya̱ nu dzi ricy der riiñ ne̱. Rad lagya̱ nu ragyee der ornu deet rac. Nunu rad lagya̱ nu fert zir ricy der ñii na gaze' nu loga. 20Tees ya̱ ricy cupa̱ tub gyel cha' ic nu nac der. De ru dzi ricy cup der pase̱z ni biñ mñaa nu la Jezabel. Mi ze' ricy mi nu rniim por cuen ni Ñgyoozh, tees rlyuum coz rguu ni de mbecy nu ricy de riiñ ne̱. Rlyuum ni dey nu gal dey losa'y nu wanchelaay. Nunu rlyuum ni dey nu gow yu de coz nu gua gun lo nab. 21Ya̱ brica̱ tiem nim par nu chaam mod nu gyicy mi, tees mi ze' wangalagy mi. Ni walagy mi laa yaam nu ral mi mbecy nu wanchelaam. 22Orze' ya̱ rica̱ güii nim par nu cham lo da'. Nunu ya̱ gyicya̱ nu tona' la zac zi de yu nu nac num benu wane' dey cyi nu ricy yu gal nu ricy mi ze'. 23Nunu gyicya̱ nu gat de I'ñ mi. Orze' gad lagy dela mbecy ne̱ nu ya̱ naca̱ biñ nu rad lagy dela coz nu yu' nañ lardoo mbecy, gal nu nañ shcab ni dey. Orze' ya̱ gyabica̱ i tub ga la der dub gal nu na coz nu bicy ru. 24Ze' na de ru mbecy nu yu' Tiatira nu wacsuub gyidag de coz nu rlyuum, de ru mbecy nu nigul gad lagy nap de coz ngach ni nuras, ya̱ wane̱e̱ lo der nu gyicy ru zañ zir coz. 25Nomaas nu rne̱e̱ lo der nu gzu fert ru nu de coz nu bi ricy cup ru gashtal shuub la dzi nu yapa̱ tuuba' tir. 26De yu nu ricy gan, gal nu de yu nu ricy coz nu rlagya̱ gal gat la dey, orze' rica̱ rishbeey ni dey nu gyub ic yu zañ nac mbecy 27gal nu briic Ñgyoozh rishbeey ne̱ ya̱. Gun Ñgyoozh nil bzat mi ya̱ ornu nam: Mi ze' gyub ic mi de lo la nac nez mbecy nu tub yangam nu byaa nu gyiib. Orze' gla'm dey nu yangam ze'. Nguzh nguzh la dey gyicy mi gal nu ricy dey ornu rla'y tub gyis, nam. 28Nunu Ñgyoozh cuic mi ya̱, biñ nu nac bel rza' yu, ni dey. 29¡De mbecy nu zub gyidag, rlagy ñi nu gzuub gyidag yu ni de coz nu rnii Espiriit Yon ni Ñgyoozh lo de mbecy ne̱!” ―nam―.

will be added

X\