Apocalipsis 19

1Ornu blazh de nu nde', orze' güeña̱ nu ye zaab ti' tub nac mbecy zigy rniiy gal gyibaa. Orze' na dey: ¡Rlagy ñi gyabic den gyel mbecy ni Ñgyoozh! Mi ze' nac mi biñ nu rboo mbañ. Nac mi biñ lily, nunu nac mi biñ fert, 2Gun mi ze' ri beem nu mod nu se'ñ, nunu ri beem nu mod nu rishli. Orze' bi mniim nu cha biñ congal nu dzi gya bzu ze' lo cashtig, biñ congal nu mnu dela mbecy nu yu' gyishlombecy nu nac gyel che̱' nim. Orze' Ñgyoozh briic mi cashtig ni biñ congal ze' nu nac nu bicy mi nu gut de yu nu ricy coz nu mniim. 3Gaze' nu brugyi' rnii ga' dey. Orze' na dey: ―¡Rlagy ñi gyabic den gyel mbecy ni Ñgyoozh! Orze' dzeeñ nu driib nu pca gyi gyedz nu gya bzu ze' rila wayecañ nu grib ñi ―na de mbecy zigy. 4Orze' de gal zu tap yu bel, gal nu tapa' de mbecy mbañ ze' gusab tiily dey gal lo yu la. Orze' brugyi' driib zily dey Ñgyoozh, biñ nu zub lo yashily lugaar ze' nu riib ic mi. Orze' na dey: ―¡Laab ni gac ñii! ¡Rlagy ñi nu gyabic den gyel mbecy ni Ñgyoozh! ―na dey. 5Orze' güeña̱ nu zaab ti' rnii gashtal ze' nu riib ic Ñgyoozh. Orze' rniiñ: Gyabic der gyel mbecy ni Ñgyoozh nin, de ru mbecy nu ricy coz nu rniim, gal nu de ru mbecy nu rca lagy lom. Gyabic der gyel mbecy nim, tant de mbecy gush tant de mbecy feñ, rniiñ. 6Gaze' nu güeña̱ nu zaab ti' gal nu zaab ti' tub nac mbecy zigy ornu rniiy. Güeña̱ nu rzigy gal nu rzigy ze' nu yet nis ily. Rzigy gal nu rac nu yet guzii. Gaze' nu güeña̱ nu rnii mbecy. Orze' nay: Rlagy ñi nu gyabic den gyel mbecy ni Ñgyoozh. Gun Ñgyoozh Shuaan den, biñ nu gac gyicy dela coz, mi ze' nac mi rey. 7Orze' rlagy ñi nu gyet lagy na nunu zu cyit lagy na. Nunu rlagy ñi nu gyabic den gyel mbecy nim nu dzi lily nam. Gun bi pshuub dzi nu chelaa biñ nu nac Shily. Nunu biñ mñaa nu chelaam bi zu lily mi. 8Nunu bi guud negy nu bya nu lino nu gzum. Nde' negy cacy, nunu ryal rabee loñ. Gun negy ze' yaruuñ de coz nap nu ricy de mbecy ni Ñgyoozh, na dey. 9Orze' mnii tub anc lo̱. Orze' nay: ―Pcaa coz nu ya̱ ne̱e̱: “Dzi ni mbecy benu bredz dey yu chay lo fandang ni biñ nu nac Shily” ―nay. Orze' gaze' nu na ga'y: ―De nii riidz rishli ni Ñgyoozh ―nay. 10Orze' ya̱ bzu tiba̱ yeñ gyi' anc ze' nu riib zilya̱ yu. Orze' yu ze' nay: ―Cue' ni gyicy ru lo̱. Gun ya̱ naca̱ losa'r nu nac ru moz ni Ñgyoozh nu de' zir de losa'r, de yu nu ricy paa nu de riidz nu mnii Jesuuz, sinu briib zily Ñgyoozh ―na anc ze' rab yu ya̱. Gun de riidz nu mnii Jesuuz, laab nde' riidz nu briic Espiriit Yon ni de mbecy nu mnii por cuen ni Ñgyoozh. 11Gaze' nu bzaaca̱ gyibaa nu byaal ñi. Orze' bruu zac tub cuay cacy. Ich cuay ze' riib tub mbecy nu la Biñ nu Ricy Paa nunu Biñ nu Rishli Rnii. Gun mi ze' riib ic mi mod nu se'ñ. Nunu zuub mi gyi' gyel yuu mod nu se'ñ. 12Orze' urlom ryal ñi gal nu ryal lyush gyi. Nunu toom ri zañ coron. Ca tub nu la ich mi. Nunu ni tub la mbecy wagad lagy yu lac rniiñ. Tub zi la ub mi rad lagy mi. 13Nunu dutuub la negy nu zum ta' reñ mi. Orze' mi ze' lam Riidz ni Ñgyoozh. 14Orze' ich mi ze' yad ca de soldad nu yu' gyibaa. Negy nu zu dey, nde' negy lino cacy. Nunu laaba' cuay cacy riib dey. 15Orze' ru'm briib tub mandzicy ri'ñ. Orze' nu mandzicy ze' gyicy mi gan mbecy ni dela nasyoong. Orze' dzi ta gyub ic mi dey. Orze' gal nu rshi̱i̱ mbecy urbyay, ni mod gri beem ni mbecy. Orze' gyicy mi nu go' dey ñup nu yu' nañ taz ze'. Ñup ze', nde' yaruuñ cashtig nu cuic Ñgyoozh, biñ nu gac gyicy dela coz. Cuic mi ñii par nu tanta' rzi lagy mi. 16Orze' lo negy nu zum gal nu lo cuiigy mi ta' letr nu rniiñ: “Biñ nu nac rey ni de yu nu nac rey nunu biñ nu nac Shuaan de yu nu nac shuaan”, rniiñ. 17Gaze' nu bzaaca̱ tub anc nu zu lo doo güidz. Orze' ye la rbish tiy. Orze' nay rab yu de chigyiñ nu zaab lo bi: ―¡Da der, gyatublaazh ru nu gow der coz ily nu cuic Ñgyoozh, 18gun orze' gow der beel de rey, gow der beel de jeneraal, gow der beel de soldad balient, gow der beel cuay, gow der beel yu nu riib ma, gow der beel dela mbecy, mas mbecy nu sac shuaan, mas yu nu zu shuaan, mas yu feñ o yu gush! ―nay. 19Gaze' nu bzaaca̱ bañ dañ, gal nu de rey nu yu' gyishlombecy, gal nu de soldad ni dey bi yu' tublaazh dey nu chucooy nu biñ nu riib cuay ze' gal nu de soldad nim. 20Orze' bdub dey bañ dañ ze', gal nu mbecy fals nu mnii por cuen ni Ñgyoozh ze', yu nu bicy nusuriidz lo rgüii la bañ dañ ze'. Nu nac nusuriidz nu bicy yu ze', orze' bguuy de yu nu pca beey ni bañ dañ ze', de yu nu briib zily nab ma. Orze' gua nu dey de yu ze' pres. Orze' pshet lag dey bañ dañ ze', gal nu mbecy fals nu mnii por cuen ni Ñgyoozh ze' gyel nu rca gyi nu asufre. 21Orze' dela soldad ni dey gut yu nu nac mandzicy nu driib ru' biñ nu riib cuay ze'. Orze' de chigyiñ bdow gyel la ma beel dey.

will be added

X\