Apocalipsis 18

1Na ornu bded ni de nu nde' na, gaze' nu bzaaca̱ tuuba' anc bruuy gyibaa bet yu. Ricy cup yu rishbeey nu gyicy yu zañ coz. Ze' par nu tona' la ryal rabee, orze' bzu la yaa dutuub la gyishlombecy. 2Orze' ye la brish tiy. Orze' nay: ―Gyedz Babilonia gulas dzi gya bzuñ. Ze' na byagash zuñ. Na zigy nuras guchu'y lugaar ze'. Byac ñi teez chigyiñ a̱' nap, chigyiñ nu gyiñ lagy na lo. 3Gyedz ze', nde' nañ gal nu na tub biñ mñaa. Orze' dela mbecy rzugy dey nu nac ñup nim. Orze' ñup ze', nde' yaruuñ bis ni gyel che̱'. Nunu de rey nu yu' gyishlombecy bicy dey gyel che̱' nu biñ mñaa ze'. Nunu de yu nu ricy dalje̱z byaguani'ñ dey nu nac nu bicy shaad mi de gusht a̱' nap nim. 4Orze' güeña̱ nu zaab ti' tuuba' mbecy rniiy gal gyibaa. Orze' nam: ―De ru mbecy ne̱, bruu der lo biñ mñaa nu nac gyedz ze', gun orze' cue' nu gyicy der de cyi nu ricy mi, nunu cue' nu zac der lo cashtig nu dugyim. 5Gun bi byañ cyi nu ricy mi gashtal gyibaa bi pshuub ñi. Nunu Ñgyoozh ca ic mi de coz a̱' nap nu ricy biñ mñaa ze'. 6Orze' gyicy nu der mi dub gal mod nu bicy num de ru. Nunu de coz nu bicy num mbecy, nde' cyup tant gyabic der nim. Cuic der cyup tant ñup nu fert zir go'm gaze' ñup nu briic mi go' der. 7Gyicy der nu gzac zim, nunu gyicy shnim dub gal mod nu bicy le'm, nunu dub gal mod nu bicy mi gusht. Gun rniim nañ lardoom: “Ii zuba̱ na gal nu na tub rey. Ya̱ walab byud naca̱. Nunu rila wayicya̱ sentiir”, rniim nañ lardoom. 8Nu nac nu ni rniim, orze' dela cashtig nu yad goñ toom nañ tub dzi zi'l. Ze' cashtig nu gad nim, nde' nu gat mi, nu gzac zim, nunu nu gyan mi. Nunu ca gyim, gun Ñgyoozh Shuaan den, biñ nu gri bee nim, mi ze' tona' la fert mi. ―Ni mnii riidz nu zaab ti' gal gyibaa. 9Orze' de rey nu yu' gyishlombecy, de yu nu bicy gyel che̱' nu biñ mñaa ze', de yu nu bicy gusht nu mi ze', orze' de yu ze' tona' la gun dey nunu tona' la gyicy dey sentiir ornu zac dey nu grib dzeeñ nu ca gyim. 10Orze' zet chechu' dey nu dzib yu lo cashtig nu dugyim. Orze' nii dey gab yum: ―¡Dzi ga coz ily! ¡Lashta ru, gyedz Babilonia! Ru tub gyedz nu dzi gya bzu. Nunu tona' la fert ru. Tees nañ tub or zi'l, orze' bru'ña cashtig lor ―nii dey. 11Orze' ni' zi'l de mbecy nu bicy dalje̱z gyishlombecy ii gun dey, nunu gyicy dey sentiir nu nac mi. Wada' cyu nu gzi suu dey. 12Wasa'ya' or ni dey. Wasa'ya' plat ni dey. Wasa'ya' gyiib nu ñgyup sac ni dey. Wasa'ya' urndub nu dzi ñgyup sac. Wasa'ya' negy lino. Wasa'ya' negy sed. Wasa'ya' negy ña, nu negy bizat. Wasa'ya' yala nu zguul ti'. Wasa'ya' coz nu byaa nu lay grambesht. Wasa'ya' yala ñgyup. Wasa'ya' gyiib cach. Wasa'ya' gyiib cacy. Wasa'ya' gyita' mármol. 13Wasa'ya' canel, ni coz zguul, ni yaal, ni mirra, ni nis zguul. Wasa'ya' ñup. Wasa'ya' asecy. Wasa'ya' arin. Wasa'ya' trig. Wasa'ya' chigud, ni shily, ni cuay. Wasa'ya' caret ni ma. Wasa'ya' moz por fers la. Ni Wasa'ya' mbecy. Orze' dela nde' Wasa'ya' ni de yu nu ricy dalje̱z ze'. 14Gaze' nu nii de mbecy nu ricy dalje̱z gab yu biñ mñaa ze': ―Dela coz nu ngulagy der nu gad nir, dela nde' mnit loñ. Nunu mnit lo ga' dela gyel nap nir, gal nu de coz nu cyit na nir ―na dey. 15Orze' de mbecy nu ricy dalje̱z, de yu nu byaguani'ñ nu nac riiñ nu bicy dey lat gyedz ze', de yu ze' zet guchu' dey nu rdzib yu lo cashtig nu guud nim. Nunu ruun dey nunu ricy dey sentiir. 16Orze' na dey: ―¡Dzi ga coz ily! ¡Lashta gyedz lily re! Gulas nañ gal nu na tub biñ mñaa nu bzu negy cyit na. Bzum negy lino. Nunu bzum negy coloor bizat nu coloor ña. Nunu bdiim ub mi nu or, nu gyita' nu dzi ñgyup sac, nu urndub nu dzi ñgyup sac. 17Tees nañ tub or zi'l mnit lo dela gyel nap nim ―na dey. Orze' zet guchu' ga' de yu nu riib ic nañ barc, gal nu de yu nu rded nañ ñi, gal nu de yu nu ricy riiñ nañ barc ze', gal nu dela de' zir mbecy nu ricy gan tiñ lo nisyudoo. 18Orze' gzac dey nu grib dzeeñ nu ca gyi gyedz ze'. Orze' cush ti dey. Orze' nii dey: ―Warusuu ga' tuuba' gyedz nu na gal nu na gyedz lily ii ―nii dey. 19Orze' coo dey yu gyedz tooy par nu nac nu gyicy dey sentiir. Orze' gun dey nu gyicy yu sentiir. Orze' nii dey: ―¡Dzi ga coz ily! ¡Lashta gyedz lily re! Nu nac gyel nap ni gyedz re, dela mbecy nu ricy cup barc nu zaab lo nisyudoo byaguani'ñ dey. Tees nañ tub or zi'l mnit lo delañ ―na dey. 20Orze' gucyit lagy de ru mbecy nu yu' gyibaa. Nunu gucyita' lagy der aposht, gal nu de ru mbecy nu mnii por cuen ni Ñgyoozh, gal nu de ru mbecy nim, gun Ñgyoozh bi briic mi cashtig ni biñ mñaa ze'. Ñgyoozh bicy mi mod nu se'ñ nu biñ mñaa ze' nu nac de coz nu bicy nu biñ mñaa ze' de ru. 21Gaze' nu tub anc fert pshes nañ yu tub gyita' nu na gal nu na tub gyita' gyech ily nu rdugu. Gaze' nu bzaan yuñ zañ lo nisyudoo. Orze' nay: ―I mod nu byagash zu gyedz Babilonia, tub gyedz nu dzi gya bzu. Orze' rila wansaca' mbecy ñi tuuba' tir. 22Ni wayeña' dey di ni musiic ni arpa, ni ni bdzi, ni ni trompet lat gyedz ze' tuuba' tir. Ni' zi'l wayicya' mbecy dalje̱z lat gyedz ze'. Ni wazigya' molin lat gyedz ze'. 23Ni wacaa ga' gyi ni candiil lat gyedz ze'. Ni a̱' zaab ti' ga' la nu rnii nob gyeey nu nob mñaa. Gulas de mbecy nu bicy dalje̱z lat gyedz ze' lily zir na dey gaze' de' zir mbecy nu ricy dalje̱z gyishlombecy. Nunu gyedz ze' bguuñ dela mbecy gyishlombecy nu nac de coz tu' nu ricy ñi ―na anc ze'. 24Gun gyedz ze', ze' gyad reñ dela de yu nu mnii por cuen ni Ñgyoozh, nunu reñ de mbecy nim. Gyad reñ dela mbecy nu gut gyishlombecy nu nac Ñgyoozh.

will be added

X\