Apocalipsis 17

1Orze' gaze' nu brusu tub anc lat gagy de yu nu nuu taz ze'. Orze' biid niiy lo̱. Orze' nay: ―Da, gun lyu̱u̱ lor cashtig nu gad ni biñ congal zub lo. Biñ congal ze', nde' tub gyedz nu ri garee ru' nis sheñ. 2De rey nu yu' gyishlombecy bicy dey gyel che̱' nuy mi. Nunu dela mbecy nu yu' gyishlombecy rzugy dey nu ñup nim. Ze' ñup nim, nde' yaruuñ gyel che̱' ―na anc ze'. 3Gaze' nu mnii pcaal lo̱ nu nac Espiriit Yon ni Ñgyoozh nu gua nu anc ze' ya̱ tub lugaar ub zi. Orze' bzaaca̱ tub biñ mñaa riib mi ich tub bañcyug dañ, tub bañ coloor ña. Orze' dutuub la ich ma ta' riidz a̱' nap, riidz nu za contr ni Ñgyoozh. Nunu zub gagy too ma. Nunu zub tii nguaz ma. 4Ze' biñ mñaa ze' zum negy bizat. Nunu zu ga'm negy ña. Nunu dutuub la cuerp nim bdudii nu or, nu gyita' nu dzi ñgyup sac, nu urndub nu dzi ñgyup sac. Ze' zu yaam tub taz or. Dza laa nañ ñi yu' coz bag nu coz a̱' nap nu bruu lo gyel che̱' nim. 5Ze' cyugam ca tub nu la. Tiily cañ. Orze' nu la ze', nde' Babilonia. Mi ze' tub gyedz nu gya zu, tub gyedz nu nac ñaa dela biñ congal gal nu dela coz a̱' nap nu yu' gyishlombecy. Nde' nu lam. 6Orze' bzaaca̱ biñ mñaa ze' rzugy mi nu nac nu go'm reñ de mbecy ni Ñgyoozh, gal nu reñ de mbecy nu gut nu nac Jesuuz. Na ornu bzaaca̱ nde', tona' la za du ica̱. 7Orze' na anc ze' rab yu ya̱: ―¿Lagu dzi za nu ic ru? Ya̱ ne̱e̱ lor lac yaruu biñ mñaa re gal nu lac yaruu bañ dañ nu riib mi ich ze', bañ nu zub gagy too gal nu tii nguaz. 8Bañ dañ nu bzaac ru, ma ze' gulas mbañ ma, tees na saca' ma. Tees sñuu ga grib ma gabily. Orze' gaze' nu cha ma gat ma tub tir zi'l. Na yu' mbecy nu sac nu la dey lo libr, ze' nu ta' nu la de mbecy nu gruu mbañ nese anzir nu sa' lagy Ñgyoozh gyishlombecy. Orze' de yu ze' güii dey lo bañ dañ ze'. Orze' tona' la cha nu ic dey. Gulas ma ze' mbañ ma. Na saca' ma. Tees gruu zac ma tuuba' tir. 9’Nii tub coz nu rlagy ñi nu grush na shcab. Gagy too ma, nde' yaruuñ gagy bicy, ze' nu zub biñ mñaa ze'. Nunu yaruu ga'ñ lo gagy too ma, nde' gagy rey. 10Orze' lo gagy de rey ze', gaay dey bi gut yu. Ze' tub yu gabee riib ic yu. Ze' tuuba'y gabee nigul cyiid yu. Na ornu cyid yu, wacyiiñ yu tuñ. 11Ze' bañ dañ, bañ nu gulas mbañ ze', ze' na saca' ma, laab ma ze' nac ma rey shuñ mas bruu ma laab lo gagy rey ze'. Tees orze' despuees, orze' gat ma tub tir zi'l. 12’Na lo tii nguaz ma, nde' yaruuñ tii rey. De yu ze' nigul zub gyi' nu gyub ic yu. Tees gad rishbeey ni dey nu gyub ic yu tub or zi'l tublaazh la nu bañ dañ ze'. 13Orze' tub zi'l shcab bicy dey za' tii lay. Orze' fers nu ricy cup dey, nu rishbeey nu ricy cup dey nu gyub ic yu, de nu nde' cuic dey ni bañ dañ ze'. 14Orze' de rey ze' chucooy nu biñ nu nac Shily ze'. Tees biñ nu nac Shily ze' gyicy mi gan de rey ze'. Nunu de yu nu bi bzu chu Ñgyoozh, de yu nu ricy paa nim nac nu dey mi. Gun mi ze' nac mi Shuaan de yu nu nac shuaan, nunu nac mi rey ni de yu nu nac rey ―na anc ze'. 15Orze' na ga' anc ze': ―Nis nu bzaac ru ze' nu bzu biñ mñaa lo ze', nde' yaruuñ mbecy dela nasyoong, mbecy dela gyedz, mbecy de lo la nez, mbecy nu rnii de lo la riidz. 16Orze' de mbecy nu nac tii nguaz ze', gal nu bañ dañ ze' gazi lagy dey lo biñ congal ze'. Orze' co dey dela coz nu ricy cup mi. Orze' gyid yaagy lam chesum. Orze' gow dey beel mi, nunu chuu dey mi nu gyi. 17Gun Ñgyoozh bicy mi nu mnii too dey nu gyicy yu coz nu rlagy mi. Nde' nu bicy dey tub zi'l shcab, nunu briic dey rishbeey nu gyub ic bañ dañ ze'. Ni bicy dey gal gyu' la niñ gal nu mnii Ñgyoozh. 18Orze' biñ mñaa nu bzaac ru ze', mi ze' yaruum gyedz ily nu riib ic dela rey ni gyishlombecy ―na anc ze'.

will be added

X\