Apocalipsis 15

1Orze' gaze' nu bzaaca̱ tub muesht baa. Coz ily tona' la guc, nunu tona' la za du ica̱. Orze' zu gagy anc. Nunu zu gagya' cashtig. Laab nde' la cashtig blazh, gun laab nde' la nu blazh pcha' ic Ñgyoozh. 2Gaze' nu bzaaca̱ tub coz nu rlyu nu nac ñii nisyudoo guan gu' can ñii nu gyi. Nunu bzaaca̱ nu ru' nisyudoo ze' yu' de mbecy nu bicy gan. Wanriib zily dey bañ dañ ze'. Ni wanriib zily dey nab ma. Ni wanca numbr ni ma cyuga dey. Numbr ze', nde' yaruuñ nu la ma. Nunu zu yaa dey tub lo beeñ nu la arpa nu briic Ñgyoozh ni dey. 3Orze' de yu ze' biil dey cant ni Moisees, yu nu bicy de coz nu mnii Ñgyoozh. Nunu biil dey cant ni biñ nu nac Shily ze'. Orze' rul dey: Ñgyoozh Shuaan de̱, biñ nu gac gyicy dela coz, tona' la coz ily ricy through. Za du la ic de̱ nu nac ñii. Ru nac ru rey ni dela nasyoong. Dela mod nu ricy ru ricy ru tub mod nu se'ñ, nunu ricy ru tub mod nu rishli. 4Shuaan de̱, dela mbecy rdzib dey lor. Dela mbecy gyabic dey gyel mbecy nir. Tub zi la ru nac ru biñ yon. Orze' mbecy nu gruu dela gyedz gru'ña dey lor nu griib zily dey ru, gun orze' dela mbecy zac dey de coz nap nu ricy ru. Ni mod biil de mbecy ze'. 5Na ornu blazh de nu nde', orze' bgüi̱i̱. Orze' bzaaca̱ nu byaal lugaar yon ni yu' wedz ni Ñgyoozh, laab lugaar ze' nu ri choow trat nu bicy mi nu de mbecy. 6Orze' ze' bruu gagy anc, yad nu dey gagy cashtig. Orze' de anc ze' zu dey tub negy cacy nu la lino. Tona' la ryal ñi. Ze' ri sinch or lyush yu. 7Orze' brusu tub mbecy laab lat tap mbecy mbañ nu psa' lagy Ñgyoozh ze'. Orze' briic yu gagy gya'n ni de anc ze'. Ze' nañ gya'n ze' yu' cashtig ily ni Ñgyoozh, biñ nu rcyiiñ tub la. 8Lugaar yon ni yu' wedz, dza laa nañ ñi yu' dzeeñ nu bruu lo gyel lily ni Ñgyoozh, gal nu lo fers nim. Orze' ni tub la mbecy wangac chu'y nañ yu' ze' gashtal bya' lo la gagy cashtig nu za nu gagy anc ze'.

will be added

X\