Apocalipsis 14

1Gaze' nu bgüi̱i̱. Orze' bzaaca̱ biñ nu nac Shily zum too tub bicy nu la Sión. Orze' yu' tub gaynal zub cyuu zub tap miily mbecy yu' dey nuy mi. Orze' cyuga de yu ze' bi ca nu lam gal nu nu la Ñgyoozh. 2Gaze' nu güeña̱ nu zaab ti' rnii gal gyibaa. Orze' rzigy gal nu rzigy ze' nu yet sheñ nis. Nunu rzigy gal nu rnii guzii. Zaab ti' ze' gal nu zaab ti' nu rshet dey lo zañ beeñ nu la arpa. 3Orze' tub gaynal zub cyuu zub tap miily mbecy ze' rul dey yu'y ze' nu zu yashily ze' nu riib ic Ñgyoozh, nu lo de tap mbecy mbañ ze', gal nu lo de yu bel ze'. Orze' ni tub la mbecy wagac dey cant ze'. Nomaas tub gaynal zub cyuu zub tap miily mbecy ze', de yu nu bruu mbañ lat de mbecy gyishlombecy, de yu ze' guc yu cant ze'. 4Orze' de yu ze' mbecy nu wangal biñ mñaa. Nac dey mbecy yon. Orze' za ca dey ich biñ nu nac Shily ze' ca zi'l ze' nu cham. Orze' bruu mbañ dey lat de mbecy gyishlombecy, nunu nac dey mbecy loga nu byash Ñgyoozh, gal nu biñ nu nac Shily ze'. 5Nunu rila wanguu dey. Nunu sac la falt ni dey. 6Gaze' nu bzaaca̱ tub anc nu gya tona' la zaab yu baa. Orze' yu ze' rded nuy riidz nu rila walazh nu rnii lac mod gruu mbañ mbecy. Orze' pshaal yu riidz ze' lo dela mbecy gyishlombecy. Gush lañ mbecy nu bruu dela nasyoong, mbecy nu bruu de lo la nez, mbecy nu rnii de lo la riidz, mbecy nu bruu de ga la gyedz. Lo de yu ze' pshaal anc ze' de riidz ze'. 7Orze' ye la mniiy. Orze' nay: ―Pca lagy der lo Ñgyoozh nunu byabic der gyel mbecy nim. Gun na bi pshuub or nu gri beem ni de mbecy. Orze' briib zily der mi ze', biñ nu psa' lagy gyibaa, gal nu gyishlombecy, gal nu nisyudoo, gal nu dela ze' nu driib nis ―nay. 8Orze' yad tuuba' anc. Yu ze' anc cyup. Orze' gua cay ich anc loga ze'. Orze' ye la mniiy. Orze' nay: ―Byagash zu gyedz Babilonia, tub gyedz nu dzi gya bzu, gun gyedz ze', nde' nañ gal nu na tub biñ mñaa nu bicy nu rzugy mbecy dela gyedz nu ñup nim. Ze' ñup ze', nde' yaruuñ gyel che̱' nim ―nay. 9Gaze' nu yad tuuba' anc. Yu ze' yu chon. Orze' yu ze' gua cay ich yu cyup ze'. Orze' ye la mniiy. Orze' nay: ―Orze' cyu zi'l mbecy nu griib zily bañ dañ ze' nu nab ma, nunu cyu zi'l mbecy nu ricy cup beey ni ma cyugay o yaay, 10orze' yu ze' gzuub ru'y taz ñup nu cuic Ñgyoozh. Ze' ñup ze', nde' cashtig nu cuic gyel lam ni dey. Nde' yu'ñ nañ taz nu gzuub ru' dey. Orze' dela de mbecy nu zuub ru' taz ze', gzac zi dey nu gyi gal nu asufre lo la de anc ni Ñgyoozh. Nunu lo biñ nu nac Shily ze' wayeca lañ nu zac zi dey. 11Orze' dzeeñ nu grib lo gyi nu gzac zi de yu ze', gyes nañ ñi tub la. Nunu wada' nu gyag lagy de mbecy nu griib zily bañ dañ ze' nu nab ma. Wada' nu gyag lagy de yu nu ca beey nu yaruuñ nu la ma. 12Orze' dela de mbecy ni Ñgyoozh rlagy ñi nu gyicy cup dey pase̱z. De yu nu rzuub gyidag nim, de yu nu ricy paa ni Jesuuz, dela dey rlagy ñi nu gyicy cup dey pase̱z ―nay. 13Orze' gaze' nu güeña̱ nu zaab ti' nu rnii gal gyibaa. Orze' rniiñ: ―Pcaa nu nii: “Dzi ni de mbecy benu nac yu mbecy ni Ñgyoozh ornu gat yu par lo.” Ni pcaa. Gaze' nu mnii Espiriit Yon ni Ñgyoozh. Orze' nam: ―Laab, gun gad nu zu lagy dey, nunu gya nu dey gyel nap ni de coz nu bicy yu ―nam. 14Orze' gaze' nu bgüi̱i̱ par baa. Orze' bzaaca̱ tub za cacy. Orze' too za ze' zu Jesuuz. Rabeem gal nu rabee tub yu gyeey. Ze' toom ri tub coron or. Zu yaam tub os ri'ñ. 15Gaze' nu bruu tuuba' anc nañ yu' wedz ni Ñgyoozh. Orze' ye la mnii nuy Jesuuz, biñ nu zu too za ze'. Orze' nay: ―Bicy riiñ nu os nir. Pte' cosech, gun bi guc niñ. Cosech ni gyishlombecy ii bi pshuub dzi niñ ―nay. 16Orze' Jesuuz, biñ nu zu too za ze' bdu' ted mi os nim lo yu. Orze' pte'm cosech nu yu' gyishlombecy ii. 17Gaze' nu bruu tuuba' anc nañ yu' wedz ni Ñgyoozh nu zub gyibaa. Nunu ni' zi'l yu ze' zu yaay tub os ri'ñ. 18Gaze' nu bruu tub anc lo cuug, yu nu riib ic gyi. Orze' ye la mniiy ornu bredz yu anc nu zu yaa os ri'ñ ze'. Orze' nay: ―Bicy riiñ nu os nir. Orze' pcyug de ic urbyay nu zaab dela ze' nu nash gyishlombecy, gun na bi guuñ ―nay. 19Gaze' nu anc ze' bdu' ted yu os niy lo yu nu shi'ñ yu de urbyay. Gaze' nu pshet lag yu urbyay ze' nañ tub zo nu dushi̱i̱ñ. Orze' zo ze', nde' yaruuñ cashtig ni Ñgyoozh. 20Orze' zet ru' gyedz bdushi̱i̱ urbyay ze' nañ zo ze'. Orze' bruu reñ nañ zo ze'. Orze' byac ñi tub gyoow. Yu' chon gaynal miily metr nu tuñ nu yaañ. Ze' nu gyi nu ri reñ ze', nde' pshuub ñi gal fren la ni cuay.

will be added

X\