Apocalipsis 13

1Orze' low dañ ze', ma ze' gusu ma ru' nisyudoo. Orze' bzaaca̱ tub bañ dañ bruu ma lo nisyudoo yad ma. Orze' ma ze' ricy cup ma gagy too ma. Nunu ricy cup ma tii nguaz ma. Orze' lo tub ga nguaz ma ri tub ga coron. Nunu laab de too ma ze' ta' de nu la nu za contr ni Ñgyoozh. 2Orze' bañ dañ nu bzaaca̱ ze' rabee ma gal nu rabee tub biidz. Ze' gyi' ma gal nu na gyi' os nañ. Nunu ru' ma gal nu na ru' bishtoo na. Orze' low dañ ze' bicy ma nu gac gyicy bañ dañ ze' la zi'l coz nu cyiiñ ma nu gyicy ma. Nunu briic ma yashily nu riib ic ma, ni bañ dañ ze'. Nunu briic ma rishbeey nu gyub ic ma ze'. 3Orze' lo gagy too bañ dañ ze', rlyu nu gud güiiñ, tub lo güii nu gyicy ñi nu gat ma. Tees ze' nu gud güii ze' ni ma mnit. Orze' dela mbecy nu yu' gyishlombecy za nu ic dey. Orze' za ca dey ich bañ dañ ze'. 4Orze' dela mbecy briib zily dey low dañ ze', gun ma ze' briic ma rishbeey ni bañ dañ ze' nu gyub ic ma. Nunu ni' zi'l briib zily dey bañ dañ ze'. Orze' na dey: ―¿Cyu ñuu lily na gal nu na bañ dañ ii? ¿Cyu gagye nu chucoo nu ma re? ―na dey. 5Orze' low dañ ze' bzaan ma nu rnii bañ dañ ze' riidz le' gal nu riidz nu za contr ni Ñgyoozh. Nunu briic ma rishbeey nu gyub ic ma cyuu zub cyup beey. 6Orze' ni bicy ma. Mnii ma riidz nu za contr ni Ñgyoozh. Mnii zi ma ni Ñgyoozh, nunu mnii zi ma ni yu' wedz nim, nunu mnii zi ma ni de anc nu yu' gyibaa. 7Nunu ni' zi'l low ze' bzaan ma nu gyicy ma gyel yuu nu de mbecy ni Ñgyoozh gashtal gyicy la ma gan. Orze' briica' ma rishbeey nu gyub ic ma dela nez mbecy, de mbecy nu yu' dela gyedz, de mbecy nu rnii de lo la riidz, nunu de mbecy ni dela nasyoong. 8Orze' dela mbecy nu yu' gyishlombecy briib zily dey bañ dañ ze'. Nomaas nil nese anzir nu sa' lagy Ñgyoozh gyishlombecy, bi ca nu la de mbecy lo libr ni mbecy nu gruu mbañ. Orze' de yu ze' wanriib zily dey ma. De yu ze' yu nu ca nu la lo libr nu ricy cup biñ nu nac Shily nu gut ze', de yu ze' wanriib zily dey ma. 9Orze' benu mbecy zub gyidag yu, orze' rlagy ñi nu zuub gyidag yu. 10Ze' benu tub mbecy ca lo cuen niy nu chay pres, orze' segur la chay. Ze' de yu nu ca lo cuen nu gat nu mandzicy, segur la gat dey nu mandzicy. Nde' nu de mbecy ni Ñgyoozh rlagy ñi nu gyicy cup dey pase̱z nunu rlagy ñi nu gyicy cup dey consuel lom. 11Orze' gaze' nu bzaaca̱ tuuba' bañ dañ. Briib ma lo yu yad ma. Orze' ma ze' zub cyup nguaz ma. Nañ gal nu na nguaz shily. Orze' mnii ma gal nu rnii low dañ ze'. 12Orze' bañ dañ cyup ze' bicy ma riiñ ni bañ dañ loga la ze'. Gun laaba' rishbeey nu ricy cup bañ loga ze' nu gyub ic ma mbecy, ni' zi'l laaba' rishbeey ze' ricy cup bañ cyup ze'. Orze' bicy ma nu briib zily dela mbecy nu yu' gyishlombecy bañ loga ze', bañcyug nu guud güii nu rlyu nu gat la. Ze' mnit ni ma. 13Ni' zi'l bañ cyup ze' bicy ma zañ nusuriidz. Lo rgüii la de mbecy bicy ma nu bruu gyi gal baa bet ñi lo yu. 14Orze' guud rishbeey nu gyicy ma nusuriidz laab ze' nu zu bañ loga la ze'. Orze' nu nac nusuriidz nu bicy ma ze', orze' bicy ma gan bguu ma dela mbecy nu yu' gyishlombecy. Orze' laab ma mnii ma lo dela mbecy nu zaa dey tub nab bañ loga ze', bañ nu gud güii nu mandzicy ze', tees gabee mbañ ma. 15Orze' bañ cyup ze' guud mod ni ma nu gyicy ma nu cui mbañ nab bañ loga ze', gun orze' nab ze' gniiñ, nunu gyicy ñi nu gat de mbecy, de yu nu wariib zily ñi. 16Orze' ma ze' bicy ma nu dela mbecy ca beey cyugay gal nu yaa beey. Mas yu gyidz, mas yu lily, mas yu guani'ñ, mas mbecy zi, mas moz, o mas patro̱o̱, tees dela dey ca beey dey. 17Ni tub la mbecy wac ziy, ni wac cut yu coz niy benu sac beey ze' cuerp niy. Ze' beey ze', nde' nu la bañ dañ ze', o numbr nu yaruuñ nu la ma. 18Orze' rlagy ñi mbecy nu siñ too par nu gyet lag yu cuen de nu nii. Gun yu nu gyet lag cuen gac gyicy yu nu gyet lag yu cuen lac yaruu numbr ni bañ dañ ze'. Gun numbr ze', nde' yaruuñ nu la tub mbecy. Nunu numbr ze', nde' shuup gaynal zub gayon zub shuup.

will be added

X\