Apocalipsis 12

1Orze' gaze' nu bruu zac tub muesht ily gyibaa. Nde' tub biñ mñaa. Shab mi nu zum nañ gal nu na doo güidz. Ze' gyi'm ca tub coz nu na gal nu na beey. Orze' toom zub tub coron nu ricy cup trocyup bel baa. 2Orze' mi ze' se nu gaal zi'l mi mdoo. Orze' rbish tim nu rac nim nu gaal mi mdoo. 3Orze' bruu zaca' tuuba' muesht gyibaa. Nde' tub low dañ. Tona' la zily ma. Nunu ña coloor ma. Ma ze' zub gagy too ma. Nunu zub tii nguaz ma. Nunu ri tub ga la coron tub ga too ma. 4Orze' lo dela bel nu ta' baa ptel ne ma tub nac ma. Orze' byeeñ cyup nac de bel ze'. Orze' pshet lag ma de ma ze' lo yu. Orze' low ze' gusu ma lo biñ mñaa nu sñuu ga gal mdoo ze', gun orze' gow ma mdoo cuanzir nu gal mi. 5Orze' biñ mñaa ze' bgaal mi tub mdoo gyeey. Orze' mdoo ze', mi ze' gyub ic mi de lo la mbecy nu tub garot gyiib. Gaze' nu byash mbecy mdoo ze'. Orze' gua nu dey mi lo Ñgyoozh, ze' nu riib ic mi. 6Orze' biñ mñaa ze' bruu chum carer zam tub lugaar ub zi. Zam tub lugaar nu bi bzu lily Ñgyoozh. Gun ze' gad coz nu cyiiñ nim trocyup gaynal zub gayon dzi. 7Gaze' nu brugyi' tub gyel yuu gyibaa. Orze' Miguel nu de anc niy gua dey contr ni low dañ ze' gal nu de anc ni ma ze'. 8Tees wangagyee low dañ ze'. Orze' wangada' lugaar nu ñcyiiñ ma nu de anc ni ma gyibaa. 9Orze' pcyuu nu dey ma. Orze' laab low dañ ze', ma ze' bily nu nil zu nese gulas. Ma ze' bañ nu rnii dey nuras, bañ nu rguu dela mbecy gyishlombecy. Orze' pshet lag dey ma nu dela anc ni ma lo yu ii. 10Orze' ye la zaab ti' nu rnii gal gyibaa. Orze' na: ―Na bi pshuub dzi nu co mbañ Ñgyoozh mbecy. Pshuub dzi nu gyicy mi coz ily, nunu pshuub dzi nu gyub ic mi gal nu ricy rey. Nunu shuub dzi nu gyub ica' Mesías nim. Gun bi pcyuu nu dey yu nu driib gyidza too de losa' den. Yu ze' zuy dzi rel la lo Ñgyoozh nu driib yu gyidza too dey. 11Tees de losa'n bicy dey gan yu ze' nu nac reñ biñ nu nac Shily nu gua gun lo Ñgyoozh nunu nu nac de riidz rishli nu mnii dey. De yu ze' wanchib dey nu gat yu, sinu “O la” mnii dey mas gat yu. 12Orze' gucyit lagy de mbecy nu yu' gyibaa. Tees cuaa de ru mbecy nu yu' lo yu gal nu lo nisyudoo. Gun nuras bi bet yu lat der. Nunu tona' la rzi lagy yu, gun bi rad lagy yu nu wazu tuñ yu ―na gal gyibaa. 13Na ornu gud lagy low dañ ze' nu bi pshet lag dey ma lo yu, orze' brugyi' nu zaab ma ich biñ mñaa nu bgaal mdoo gyeey ze'. 14Orze' guud cyup lowe' ily ni psi ni biñ mñaa ze', gun orze' gyes nañ mi cham tub lugaar ub zi. Orze' byazet mi lo bily ze'. Orze' ze' gad dela coz nu cyiiñ nim chon ña'n nu. 15Orze' bily ze' bloo ma nis ru' ma, gun orze' byac ñi tub gyoow nu cha nuñ biñ mñaa ze'. 16Tees yu blocyuub ñi biñ mñaa ze'. Orze' byaal loñ. Go'ñ nis nu bruu ru' low dañ ze'. 17Orze' tona' la guzi lagy ma lo biñ mñaa ze'. Orze' gush nez ma za ma nu chucoo nu ma de' zir nez mi nu bruu zac despuees, gal nu dela mbecy nu rzuub gyidag de riidz nu mnii Ñgyoozh, laab de yu nu ricy paa nu de riidz rishli nu rshaal mbecy nu nac Jesucrisht.

will be added

X\