Apocalipsis 11

1Orze' guud tub ya beey ne̱ nañ gal nu na tub yagyi. Orze' na dey rab yu ya̱: ―Wes su. Orze' tush peer yu' wedz ni Ñgyoozh. Nunu tush peer lo cuug. Nunu glab ru de mbecy nu driib zily Ñgyoozh nañ yu' ze'. 2Tees cue' tush peer loli' nu riib par ich yu', gun Ñgyoozh bzaan mi gyu'ñ yaa de mbecy nu walab mbecy Israeel. Orze' de yu ze' zub gyi' dey too gyedz ni Ñgyoozh cyuu zub cyup beey. 3Orze' ya̱ zuu neza̱ cyup teshtig ne̱ nu cha nii dey por cuen ne̱ nañ trocyup gaynal zub gayon dzi. Ze' de yu ze' zu dey negy nu byaa nu duu gyedz. 4’Orze' cyup de teshtig ze' nac yu cyup ya oliva, nunu nac dey cyup candeler nu zu lo Ñgyoozh Shuaan den, biñ nu nac Ñgyoozh ni gyishlombecy. 5Benu ca na tub mbecy galagy yu shiñ gyicy nuy dey, orze' grib gyi ru' dey nu gnit lo mbecy ze'. Orze' ni mod gat cyu zi'l mbecy nu galagy nu shiñ gyicy nu de yu ze'. 6Orze' de yu ze' ricy cup yu rishbeey nu soow yu baa nu cue' gyet gyey lat nu shaal dey riidz ni Ñgyoozh. Ni' zi'l ricy cup dey rishbeey par nu gyicy yu nu nis gyac ñi reñ. Nunu ricy cup dey rishbeey nu gyicy yu nu gzac zi de mbecy gyishlombecy nu de lo la mod nunu la zi'l be tir nu galagy dey. 7Na ornu gya' lo nu nii dey por cuen ni Ñgyoozh, orze' tub bañcyug dañ nu gruu gabily, ma ze' chucoo nu ma dey. Orze' gyicy ma gan cut ma dey. 8Orze' cuerp ni dey gabish ñi lat cay ni gyedz ily, ze' nu pca Shuaan den Jesuuz lo cruuz. Orze' gyedz ze' lañ Sodoma, nunu lañ Egipto, benu nu riidz tiily. 9Orze' mbecy nu gruu dutuub la gyishlombecy, güii dey cuerp ni de yu ze' par chon dzi nu. Mbecy nu gruu dela gyedz, mbecy nu gruu lat de lo la nez, mbecy nu rnii de lo la riidz, mbecy nu gruu dela nasyoong, dela dey güiiy lo cuerp ni de yu ze'. Ni wazaan dey nu cach mbecy de cuerp ze'. 10’Orze' de mbecy nu yu' gyishlombecy gyet lagy dey nu nac cyup mbecy nu gut ze'. Par nu tanta' yet lagy dey, orze' cuic dey coz ni losa'y leew la. Gun cyup de mbecy nu mnii por cuen ni Ñgyoozh ze' bicy dey nu bzac zi de mbecy nu yu' gyishlombecy. 11Tees ornu gza' chon dzi nu, orze' Ñgyoozh gyicy mi nu gyabañ dey. Orze' gyeshte dey. Orze' dela mbecy tona' la dzib dey. 12Gaze' nu gyeñ de yu nu byabañ ze' nu zaab ti' nu rnii gashtal gyibaa. Orze' nam: ―¡Gup der gal ii! ―nam. Orze' chup dey gyibaa lat za, nunu de losa' yuu dey gzac yu. 13Orze' laab or la ze' griib tub duru ily. Orze' lo dela lugaar ni gyedz ze', nit lo tub nac lugaar niñ. Ze' wanit lo se gaa nac lugaar ze'. Nunu nit lo gagy miily mbecy nu nac duru ze'. Orze' de' zir de mbecy tona' la dzib dey. Orze' cugyi' nu griib zily dey Ñgyoozh, biñ nu zub gyibaa. 14Orze' bi bza' cyup tir nu shiñ rac. Sñuu ga bi cyid tir chon. 15Orze' gaze' nu anc gagy blaay trompet niy. Orze' ye la zaab ti' nu rnii gal gyibaa. Orze' nam: Na bi bri gyel gubier ni Ñgyoozh, Shuaan den, gal nu Jesuuz, Mesías nim. Orze' de mi ze' gyub ic mi tub la. 16Gaze' nu gal zu tap de yu bel nu zub par lo nu lo nu yashily ze' nu riib ic Ñgyoozh, gusab tiily dey lo yu. Orze' briib zily dey Ñgyoozh. 17Orze' na dey: Gric de̱ gras nir, Ñgyoozh, Shuaan de̱. Ru biñ nu gac gyicy dela coz. Ru guc ru par ich, nunu ru nac ru na. Na cugyi' nu gyub ic ru gyishlombecy. 18Orze' de mbecy nu walab mbecy Israeel tona' la rzi lagy dey, gun na bi pshuub dzi nu cuic ru cashtig ni dey. Nunu ni' zi'l pshuub dzi nu ri beer ni de mbecy gut. Nunu pshuuba' dzi nu gyabic ru i de moz nir, de yu nu mnii por cuen nir, gal nu ni de yu nu bzu chu nu gac nir, nunu ni de yu nu pca lagy lor. Orze' gyabic ru i dey mas nac yu yu lily o mas nac yu yu gyidz. Nunu na bi pshuub dzi nu nit lor de mbecy nu rnit lo gyishlombecy ii, na gal zu tap de yu bel ni mbecy Israeel. 19Orze' byaal ro' wedz ni Ñgyoozh gal gyibaa. Orze' nañ yu' wedz ze' bruu zac gyiñ nu ri choow trat nim. Gaze' nu bzu gyi ni guzii, nunu guc zu redz, nunu mnii guzii, nunu briib duru, nunu tona' la bet gyey gye.

will be added

X\