Apocalipsis 10

1Orze' gaze' nu bzaaca̱ tuuba' anc fert. Orze' bruuy gyibaa bet yu. Orze' za baa rsoow ñi cuerp niy. Ze' tooy riib shelcuit. Ze' ya loy briic ñi yaa gal nu na yaa ni doo güidz. Ze' gyi'y rabeeñ gal nu rabee tub yabi gyi. 2Orze' zu yaay tub gyicy mi'. Orze' bi ndiily loñ. Orze' bzu gyi' beey lo nisyudoo. Ze' gyi' reg yu bzuy ñi lo yu wach. 3Orze' ye tona' la brish tiy gal nu rbish ti biidz. Na ornu brish tiy na, orze' mnii guzii gagy se'. 4Na ornu mnii guzii gagy se' na, orze' bicy pe̱e̱ nu nca̱a̱ lo gyicy. Orze' güeña̱ nu zaab ti' gal gyibaa. Orze' nam: ―Riidz nu mnii guzii gagy se' ze', cu' choow ru ñii nañ lardoor. Cue' caar ñii lo gyicy ―nam. 5Gaze' nu bzaaca̱ anc nu zu gyi' lo nisyudoo gal nu lo yu wach, orze' yu ze' pshes nañ yaa beey par baa. 6Orze' bzat yu Ñgyoozh par nu gabe nu segur la gac gal nu mniiy. Ñgyoozh rcyiiñ mi tub la. Mi ze' psa' lagy mi baa, nu gyishlombecy, nu nisyudoo, nu dela coz. Orze' anc ze' bzat yu mi ze'. Orze' nay: ―Walagy ñi nu tuñ lez naa na. 7Tees ornu anc gagy ze' cugyi' nu laay trompet niy, orze' Ñgyoozh gza' lom coz nu rnii toom nu gyicy mi. Coz ze', nde' wangad lagy de mbecy. Tees pshaal mi ñii lo de moz nim, lo de yu nu mnii por cuen nim ―nay. 8Orze' güeña̱ nu zaab ti' nu rnii tub tira' laaba' gal gyibaa. Orze' nam: ―Gua na, nunu gush gyicy mi' nu bi ndiily lo nu zu yaa anc nu zu gyi' lo nisyudoo gal nu lo yu wach ―nam. 9Orze' gua̱ lo anc ze'. Orze' bdiña̱ gyicy mi' ze' loy. Orze' yu ze' nay rab yu ya̱: ―Gush ñi gow ru. Ornu gow ru ñii, orze' ish ñi gal nu ish dziñ. Tees ornu chetiñ nañ ru, orze' gyalyañ ―na anc ze'. 10Orze' brusha̱ gyicy mi' nu zu yaa anc ze'. Orze' bda̱w ñii. Orze' ish row ñi gal nu ish dziñ. Tees ornu gutiñ naña̱, orze' byalyañ. 11Orze' de mbecy mniiy lo̱: ―Orze' na tub tira' rlagy ñi nu shaal ru de riidz nu druu lo Ñgyoozh nu rniiñ lac na de coz nu gzac zañ nac nasyoong, gal nu zañ nac nez de mbecy, gal nu zañ lo riidz, gal nu zañ rey ―na dey rab yu ya̱.

will be added

X\