Apocalipsis 1

1De riidz ii rshaal ñi de coz nu rnii Jesucrisht. Ñgyoozh bicy mi nu Jesucrisht pshaal mi ñii lo de mbecy nu ricy de coz nu rlagy mi par nu gad lagy dey ni de coz nu sñuu ga gac. Briic mi nu gad lagy dey nu nac nu bzuu nez mi anc nim biid yu lo ya̱, Waa, tub yu nu ricy coz nu rlagy mi. 2Orze' pca̱a̱ dela coz nu rishli nu bzaaca̱, nunu naca̱ teshtig ni de riidz ni Ñgyoozh. Naca̱ tub yu nu rzat Jesucrisht lo de mbecy. 3Dzi ni de mbecy nu rsya' de riidz nu bruu lo Ñgyoozh ii. Nunu dzi ni de mbecy nu reñ ñi gal nu de yu nu rzuub gyidag ni de riidz nu bi ca ii, gun bi yad shuub tiem nu gac ñii. 4Ya̱ Waa. Ya̱ gzeeda̱ gyicy ii lo gagy nac mbecy ni Crisht nu yu' lat de gyedz ni Asia. Orze' Ñgyoozh, Shuaan den, gal nu Jesucrisht, gal nu Espiriit Yon nim gyicy dem faboor nu nap gyicy num der, nunu gyicy dem nu cheti ri añ ni der. Laab Ñgyoozh nac mi biñ nu nac na, nunu nac mi biñ nu guc par ich, nunu nac mi biñ nu cyid par lo. Na Espiriit Yon nim nac mi biñ nu nash numbr gagy, nunu nac mi biñ nu zu lugaar ze' nu riib ic mi. 5Na Jesucrisht nac mi biñ nu ricy paa nu de riidz nu rniim. Nunu nac mi biñ nu byabañ nu loga la ornu gut mi. Nunu riib ic mi dela gubier nu riib ic gyishlombecy ii. Orze' de mi ze' gyicy mi faboor num de ru, nunu gyicy dem nu cheti ri añ ni der. Na Crisht tona' la rcam de ub na, nunu bicy mi nu bla den ni de coz ily nu ricy nu cyi den nu nac nu pshu reñ mi. 6Bicy mi nu gyub ic den dun mi. Bicy mi nu nac naa uz par nu zu biich na nu nac Uz mi, biñ nu nac Ñgyoozh nim. ¡Yad ñi nim nu dugyim gyel lily nim nunu yad ñi nu dugyim nu nac mi biñ nu gac gyicy dela coz dub laa tiem! ¡Laab ni gac ñii! 7Crisht yad mi lat za baa. Orze' dela mbecy zac dey mi. Gashtal de yu nu bicy nu gut mi, nunu de lo la nez mbecy nu yu' gyishlombecy gyicy dey sentiir, nunu gun dey nu nac mi. ¡Laab ni gac ñii! 8Orze' na Ñgyoozh Shuaan den: “Ya̱ naca̱ A, nunu naca̱ zeta. Nunu naca̱ biñ nu nil zu nese nu loga. Nunu naca̱ biñ nu nil zu ornu gya' loñ.” Ni na Ñgyoozh, biñ nu nac na, biñ nu guc par ich, nunu biñ nu cyid par lo. Mi ze' biñ nu gac gyicy dela coz. 9Ya̱ Waa bicy de ru. Gyub ic den tublaazh la ze' nu gyub ic Ñgyoozh. Nunu tublaazh la zac zin nu nac Crisht. Nunu Ñgyoozh cuic mi fers ni den nu gagyen. Dela nde' ricy Ñgyoozh nu nac Crisht. Ya̱ ri̱ pres lo tub nac yu nu ri gazel nisyudoo nu la Patmos. Ri̱ pres nu nac nu pshaala̱ de riidz ni Ñgyoozh, nunu nu nac nu bzata̱ Jesucrisht lo dela mbecy. 10Orze' tub dzi noming, dzi ni Shuaan den, orze' byub ic Espiriit Yon ni Ñgyoozh ya̱. Orze' par icha̱ güeña̱ nu zaab ti' mbecy. Ye rniiy gal nu zaab ti' tub trompet. 11Orze' nay: ―Pcaa lo tub cuader de coz nu rzac ru. Orze' zeed ru ñii lo gagy nac mbecy ni Crisht. Zeed ru ñii lo de mbecy ni Crisht nu yu' Éfeso, gal nu lo de mbecy nu yu' Esmirna, nu lo de mbecy nu yu' Pérgamo, nu lo de mbecy nu yu' Tiatira, nu lo de mbecy nu yu' Sardis, nu lo de mbecy nu yu' Filadelfia, gal nu lo de mbecy nu yu' Laodicea. Lo de yu ze' zeed ru ñii ―na mbecy nu zaab ti' rnii ze'. 12Orze' bish cya̱ bgüi̱i̱ par icha̱ ze' nu zaab ti' mbecy nu rnii nu ya̱ ze'. Na ornu bish cya̱, orze' bzaaca̱ gagy candeler or. 13Nunu lat de gagy candeler ze' zu tub mbecy nu rlyu nu nac yu mbecy nu yu' gyishlombecy. Mi ze' zum tub nertub zily duñ. Zaab ñi gal yeñ gyi' lam. Nunu ri tub sinch lyush mi nu byaañ nu or. 14Nunu gyich toom cacy iily lañ. Caacy ñi gal nu caacy gyey. Nunu rabee urlom gal nu rabee lyush gyi. 15Nunu ryal gyi'm gal nu ryal gyiib cach nu ryanap nañ yo. Nunu ti'm rzigy ñi gal nu rzigy ze' nu yet nis. 16Ze' nu yaa beem zu yaam gagy bel baa. Ze' ru'm briib tub coz nu na gal nu na mandzicy nu rup dzu la' la ru' ri'ñ. Ze' lom ryal ñi gal nu ryal doo güidz ornu tona' la nap rzu yaa. 17Ornu bzaaca̱m, orze' wes sa̱a̱ la̱ yeñ gyi'm. Gugyita̱ gal nu zegyit tub mbecy gut. Orze' briib mi yaa beem icha̱. Orze' nam: ―Cue' dzib ru. Ya̱ naca̱ biñ nu nil zu nese nu loga la, nunu naca̱ biñ nu nil zu ornu gya' loñ. 18Nunu naca̱ biñ mbañ. Guta̱ tees na cui mbaña̱ tub la. Nunu ya̱ ricy cupa̱ rishbeey nu shaala̱ nez nu ya par ze' nu yu' mbecy nu bi gut. 19Pcaa lo gyicy dela coz nu rzac ru. Pcaa dela coz nu rac na gal nu dela coz nu gac par lo. 20Lo gagy bel baa nu rzac ru nu zu yaa be̱e̱, gal nu gagy candeler ii, de nii yaruuñ tub coz nu wagad lagy la mbecy. Na do̱o̱ rishlor lac yaruuñ. De gagy bel baa ze', nde' yaruuñ gagy anc ni de gagy nac de mbecy ne̱. Ze' gagy candeler or ze', nde' yaruuñ laaba' de gagy nac mbecy ne̱.

will be added

X\