Filemón 1

1Ya̱ Baly ri̱ pres nu nac Jesucrisht. Orze' na ca̱a̱ gyicy ii tublaazh la nu biicy na Timoteo nu zeeda̱ lo ru Moong. Ru losa̱' de̱ nu tona' la rca̱. Nunu tub zi'l riiñ ni Crisht ricy den. 2Orze' zeeda̱ gyicy ii lo ru, gal nu lo dela de mbecy ni Crisht nu yatublaazh yu'r, gal nu lo zan den Apia, gal nu lo Arquipo. Yu ze' nay gal nu na tub soldad ni Crisht nu nac losa̱' nu rded du̱ tublaazh. 3Orze' Ñgyoozh Uz den gal nu Shuaan den Jesucrisht gyicy dem faboor nu nap gyicy num ru, nunu gyicy dem nu cheti ri añ nir. 4Dub laa tiem drica̱ gras ni Ñgyoozh ornu yeza' lagya̱ ru lat nu rne̱e̱ du̱m, 5gun ya̱ bi güeña̱ nu zaab riidz nu tona' la rcar dela mbecy nim nunu dzi ricy cup ru consuel lo Shuaan den Jesuuz. 6Nunu rdiña̱ lom nu ornu cuic ru nu gad lagy mbecy nu la na consuel ricy cup ru, orze' nde' gyicy ñi nu nap zir gyet lag dey cuen ni dela coz nap nu ricy nu Ñgyoozh de ub na nu nac Crisht. 7Ya̱ dzi yet lagya̱ nunu guti ye lagya̱ nu nac nu dzi rcar losa'r. Orze' shnu lar, bicy na, gun bicy ru nu guti ye lagy de yu nu ricy cup consuel lom. 8Orze' como ya̱ naca̱ tub aposht ni Crisht, orze' ricy cupa̱ rishbeey nu gyicya̱ mandaar lor nu gyicy ru ca na coz nu rlagy ñi. 9Tees yet zir lagya̱ nishba̱a̱ lor nu ni gyicy ru nu nac nu rca den losa'n. Ya̱ Baly. Nunu bi gubela̱. Nunu ri pres nu nac Jesucrisht. 10Orze' na ya̱ diña̱ tub faboor lor par nu nac Onésimo. Yu ze' bi byac yu gal nu na tub yu feñ ne̱ nu nac de coz ni Ñgyoozh lat nu ri̱ nañ yu' gyiib ii. 11Gulas, yu ze' se la la pcyiiñ yu nir, tees na rcyiiñ yu par ru nunu rcyiiñ yu par ya̱. 12Ya̱ zuu neza̱ yu nu gyed yu lor tuuba' tir. Orze' bicy nuy gal nu ricy nur ya̱. 13Ya̱ ngulagya̱ nu ñgyiyeeñ yu lo̱ ii, gun orze' ñgyicy yu riiñ ne̱ lugaar ni ru lat nu ri̱ nañ yu' gyiib nu nac de riidz nu sac ni Crisht. 14Tees ya̱ wangalagya̱ ñgyicya̱ ni tub la coz benu walab nu nac rishbeey nir. Gun ornu gyicy ru faboor nur ya̱, orze' cue' gyicy ru ñii por fers la, sinu gyicy ru ñii nu dub gal rii la lagy ru. 15Cyup ridz Onésimo bruu chuy lor par la be tiem, gun orze' na cyiiñ yu lor tub la. 16Na walaba' nu cyiiñ yu lor nu nac yu moz por fers la, sinu na gya zir zuy gaze' tub moz por fers la. Nac yu tub bicy ru nu dzi rcar nu nac Crisht. Ya̱ tona' la rca̱ yu. Tees ru nap zir rcar yu na, gun na walab tub lo zi'l nu nac yu moz nir, sinu ni' zi'l nac yu bicy ru nu nac Shuaan den Jesuuz. 17Nde' nu beni, benu ru ricy ru ya̱ par bicy ru nu nac Crisht, orze' nap nii nur yu ornu griy lor gal nu nap nii nur ub la ya̱ ornu yapa̱ lor. 18Ze' benu yu ze' bicy yu la na tub coz nuy ru, o benu zaab yu nir, orze' ya̱ grisha̱ ñii nir. 19Ya̱ Baly ca̱a̱ lo gyicy ii nu letr yaa: Ya̱ grisha̱ ñii nir. ¡Mas ñgyicya̱ nu gyeza' lagy ru nu yu' di'ñ ru gyi' lardoor lo̱! 20Orze' laab ru, bicy na, bicy tub faboor nu ya̱ nu nac nu ricy cup na consuel lo Shuaan den Jesuuz. Orze' bicy na nu nac Crisht, briic consuel nañ lardo̱o̱. 21Ya̱ zeeda̱ gyicy ii lor, gun ya̱ rad lagya̱ nu gzuub gyidag ru ne̱. Nunu neña̱ nu sheñ zir gyicy ru gaze' coz nu diña̱ lor. 22Ni' zi'l ne̱e̱ lor nu zu yer tub lugaar ze' nu cyiiña̱, gun ya̱ drish lo̱ lo Ñgyoozh nu gyicy mi gal nu rnii der ornu rgyiiñ ru lom. Orze' cuic mi lugaar nu yap güi̱i̱ der. 23Epafras, losa̱' nu ri nañ yu' gyiib nu nac Jesucrisht, yu ze' zeed yu ñgyoozh nir. 24Nunu ni' zi'l Marc, nu Aristarco, nu Demas, nu Luc, de yu nu rlocyuub ya̱ nu nac de riiñ ni Crisht, de yu ze' zeed yu ñgyoozh nir. 25Orze' Shuaan den Jesucrisht gyicy mi faboor nu nap gyicy num der.

will be added

X\