Filipenses 4

1Der bicy na, ya̱ rca̱ de ru. Nu gusht ne̱ guc nu gac na na la zaca̱ der. De ru ricy der nu dzi nap zu lagya̱. Nu nac de ru rabee nu nap bruu riiñ nu ricya̱. Ya̱ rlagya̱ nu zaab gzu fert la der como de ru bi nac nu der Shuaan den Jesuuz. 2Ya̱ rnishba̱a̱ lo de ru, Bod nu Síntique, nu gyicy der se tub zi'l shcab. Chu' der gal nu rzu' mbecy nu bily mi nu nac Shuaan den Jesuuz. 3Ze' ru losa̱' nu tona' la ricy paa, losa'n nu bicy na riiñ ni Ñgyoozh tublaazh la, ya̱ rlagya̱ nu locyuub ru de biñ mñaa ze' nu gyicy nap dem riidz nu losa'm. De biñ mñaa ze' fert bicy dem riiñ nu ya̱ par nu shaal de̱ de riidz nu sac ni Jesuuz. Bicy de̱ riiñ ze' tublaazh la nu Clement gal nu de' zir mbecy nu bicy riiñ nu ya̱. Dela de yu ze' bi ta' nu la dey lo libr ni Ñgyoozh, libr ze' nu ta' nu la de mbecy nu ca lo cuen nu cui mbañ. 4Dub laa tiem zaab bet la lagy der gyi' nu nac nu der Shuaan den Jesuuz. Nunu cush cya̱' ga̱' nu ne̱e̱ lo der tuuba' tir bet lagy der. 5Bicy der nu gad lagy dela mbecy nu nac der mbecy nu nap ri lardoo. Pcaa ic der nu sñuu ga shuub dzi nu cyid Shuaan den Jesuuz. 6Cue' sug ic der nu nac ni tub la coz, sinu ornu deet rac nañ lardoo der, orze' mnii nu der Ñgyoozh. Orze' bdiiñ der coz nu rlagy ru lom. Nunu briic der gras nim. 7Orze' Ñgyoozh gyicy mi nu cheti ri añ ni der. Nunu de mbecy rila wagyet lag dey cuen lagu nu gac cheti ri añ ni der. Nde' gyicy ñi nu wac deet nañ lardoo der nunu wac deet nañ shcab ni der nu nac nu der Jesucrisht. 8De ru bicy na nu dzi rca̱, laab nii la riidz nu ne̱e̱ lo der. Mnii too der nu nac la zi'l coz nap, nunu nu nac la zi'l coz nu gyicy ñi nu gyed gyel mbecy. Gush der shcab nu nac la zi'l coz nu se'ñ. Gush der shcab nu nac la zi'l coz nu sac falt ni. Gush der shcab nu nac la zi'l coz cyit na. Gush der shcab nu nac la zi'l coz nu lily na. Orze' gush der shcab nu nac la zi'l coz nap, gal nu de coz nu gyicy nu gyed gyel mbecy. 9Bicy der dela coz nu ya̱ blyu̱u̱ ni der gal nu de riiñ nu bdu̱' yaa der. Bicy der dub gal mod nu güeñ der de riidz nu mne̱e̱, nunu dub gal na mod nu bzaac der ni de coz nu bicya̱. Benu gyicy der dela nde', orze' Ñgyoozh, biñ nu ricy nu rzeti ri añ ni der, gac num de ru. 10Ya̱ tona' la yet lagya̱ nu nac Shuaan den Jesuuz, gun rabee nu bi byeza' ga' lagy der ya̱ tuuba' tir. Walab nu rne̱e̱ nu rishli mnit lagy der ya̱, sinu rne̱e̱ nu wangad mod ni der nu locyuub ru ya̱. 11Walab nu ni rne̱e̱ par nu nac nu ricy falt la coz ne̱, gun ya̱ bi gube̱e̱ lac mod gaca̱ mbecy nu nap zu lagy mas lac zi'l mod nu rdeda̱. 12Bi neña̱ ornu wagad sheñ. Nunu bi neña̱ ornu rad sheñ. Lac zi'l mod nu rcyiiña̱, bi gube̱e̱ lac gaca̱ mbecy nu nap zu lagy. Ya̱ bi gube̱e̱ lac gaca̱ mbecy nu nap zu lagy ornu dza naña̱, lac gaca̱ mbecy nu nap zu lagy ornu rana̱, lac gaca̱ mbecy nu nap zu lagy ornu yu' sheñ la coz ne̱, lac gaca̱ mbecy nu nap zu lagy ornu sac ñi ne̱. 13Ya̱ gac gagye̱ la zi'l coz nu cyid nu nac Crisht nu rbic mi fers ne̱. 14Tees de ru tona' la nap bicy nu der ya̱ ornu blocyuub der ya̱ lat nu bzac zi̱. 15De ru, mbecy Filipos, de ru bi neñ der nu lat nu pshaala̱ riidz ni Ñgyoozh nu loga la ornu bru̱u̱ lo de yu ni Macedonia, wancyuu su ni tub mbecy nu mbic yu tiñ nu cyiiñ ne̱, sinu de ru zi'l briic ru. Ni bicy nu der ya̱ nu nac nu ni' ya̱ blocyuuba̱ de ru nu nac de coz ni Ñgyoozh. 16Mas lat nu pcyiiña̱ Tesalónica, gyedz nu ri lo yu ni Macedonia, ti la be la tir bzeed der tiñ par nu blocyuub der ya̱. 17Walab par nu rnii to̱o̱ nu gad gun ne̱, nde' nu ni rne̱e̱, sinu nu rlagya̱ nu gyicy der gan sheñ zir coz nap par lo Ñgyoozh. 18Ya̱ bi ricy cupa̱ dela coz nu rlagy ñi, nunu gashtal drusuba' lañ ne̱. Guud dela coz nu cyiiñ ne̱, gun Epafrodito bri nuy de coz nu bzeed der. De coz nu bzeed der nañ gal nu na coz zguul, tub gun nu “O” mnii Ñgyoozh nu byash mi, nunu bet lagy mi. 19Ñgyoozh cuic za' lam dela coz nu ricy falt ni der nu nac nu tona' la coz ily de coz cyit na nu ricy cup mi. Ni gyicy mi num de ru nu nac Jesucrisht. 20¡Orze' rlagy ñi gyabic den gyel mbecy ni Ñgyoozh, Uz den, tub la! ¡Laab ni gac ñii! 21Gab der de mbecy ni Ñgyoozh shnuy por cuen ne̱, de yu nu nac nu Jesucrisht. De bicy na nu rcyiiñ nu ya̱ ii zeed dey ñgyoozh ni der. 22Nunu ni' zi'l de mbecy ni Ñgyoozh nu yu' ii zeed dey ñgyoozh ni der. Nunu nu loga la de yu nu zu riiñ yu' rey César, de yu ze' zeed dey ñgyoozh ni der. 23Shuaan den Jesucrisht gyicy mi faboor nu nap gyicy num dela der.

will be added

X\